من اخر مرة راحت العربية الصيانة والكمبيوتر بتاعها خرف حبتين. والظاهر انو حصلله
”reset.
والحقيقة انه الموضوع ده اثر فى حياتى وحياة كتير من رفقاء الطريق الطويل من مطار القاهرة ولحد مدينة المهندسين يوميا.
الظاهر والله اعلم فى اوروبا والدول المتقدمة انه العادى بتاعهم ان نور العربية الواطى (لا مؤاخذة) يفضل منور. نوع من انواع الحرص يعنى والاحتياط والحاجات اللى بعد الشر عننا منها يعنى. وطبعا اضف لكدة انه الشمس الجريئة دى قليلة السطوع عندهم فبالتالى نور العربية له دور الكبير.
المهم من ساعة الحكاية دى وانا حاسة باهميتى اوى الحقيقة. انا حاسة انى متراقبة والعين عليا.
مش اقل من 5-6 كدة يوميا تقريبا هيقلبونى من فوق الكوبرى وبيعملوا 3-4 غرز كده لمجرد تنبيهى ان نور العربية والع. طيعا مش محتاجة اشرح حركة الايد اللى بيتم التعبير بيها بالنسبة للقلة القليلة اللى مابيعملوش غرز وهى باختصار شبه رقصة الكوكو واوا الشهيرة.
انا فعلا باكون محرجة جدا و شاكرة جدا لكل اللى قلبهم عليا وبيحاولوا ينبهونى للموضوع ده وبالتالى بحاول اعبر بحركات يدوية برضة عن امتنانى ومنها حركة ميه ميه وحركة باى باى حتى استلفت حركة السلام اللى هيه بتاعت "باشا" من السايس. والظاهر انه مش كفاية..
فى بعض الناس لما باعمل كدة بيستمروا فى حركة الكوكو واوا وفى ناس تانية بتتعصب فتعمل حركة روحى فى داهية وفى بعض السيدات قررن انهم يزاحموا الطريق وييجوا يمينى ويصرخوا بكل قوة "النوووووررر". طبعا دة بالاضافة للغلابة عابرى الطرق اللى بيقرروا يقفوا تقريبا فوق العربية عشان ينبهونى.
نيجى لملاكى كفر الشيج ال 7 راكب اللى كانت قدامى النهاردة. قاعد واحد ورا بيضحك ويهزر مع عربية 7 راكب جنبه. والحقيقة انه كان بيعمل اشارات بايدة برضة مش ولابد بس الحمد لله مش ليه... المهم لمحنى والصراحة طول الطريق مسابنيش..يشاور على النور واقولله يشاور تانى واشور ميه ميه . لحد ما فى الاخر لقيته استلف ورقة من زميله فى العربيه وبجد كتبلى على ورقة "النور" و فضل يشاور بيها...
يا جماعة متشكرة جدا على الاهتمام... سيبوا نور العربية فى حاله وسيبونى فى حالى وامشوا زى الناس فى الشارع وانا اوعدكوا لو البطارية قطعت سأحمل نفسى المسؤولية كاملة.
ملحوظة: انا مش عارفه اطفى النور فمضطرة انتظر لحد معاد الصيانة الجاى...
No comments:
Post a Comment