معظم الناس اللى تعرفنى تعرف انى عادة اميل للواقعية عنى منها للتفاؤل او التشاؤم! بمعنى اخر انا لا بتشائم اوى ولا بتفائل اوى من اى تغيير فى الاوضاع ولا الاحداث بس الشهادة لله انا اليومين دول بيجيلى مفاجأت الحقيقة كأبتنى من ناس كتير قوى اعرفهم .. مش عشان ارائنا مختلفة بل عشان وجهات النظر نابعة من عنجهية وتعالى وبعضها مش حاطة فى اعتبارها حق دم الناس اللى راحت هدر ولا عن المحابيس اللى المفروض هما اللى يبقو فى البرلمان او على الاقل معانا..
بمنتهى الامانة انا مش مكتئبة لا انا الحقيقة عندى شعور بالغثيان من الصرع والصراع على سلطة زائفة.. من قوى مالهاش اى دعوة بمطالب اى حد غير انها بس معاها فلوس..
عندى شعور بالغثيان من المغالاه فى التعصب لاحد الطرفين لدرجة مخليّة بعض الناس تتجاوز عن اخطاء لفظية او فعلية فى برامج او صحف تصل فى بعض الاحيان لدرجة اما البله والخلل العقلى او التواطؤ والعمالة..
وبين كل دول وبعض لا يتجاذب الناس اطلاقا المشكلات الاصلية بل انشغالهم بتعصب اعمى او هلع عبيط يساهم فيه بشكل عمدى على ما اظن اغلبية الاعلام اللى لا اصبح سوق زى الانتخابات للى يدفع اكتر..
انا مفهمش فى السياسة والصراحة برضه انا نزل من نظرى تماما الكتلة المصرية والاخوان (مع احترامى لمناصريهم على اى حال).. انما الشهادة لله اللى ضرب الرقم القياسى فى الانحطاط الاخلاقى انتخابيا هو حزب النور السلفى اللذى لم يكترث بشعاراته اصلا بل انه يؤازر رموز من النظام السابق ويزج برموز ما هى الا رموز للجهل لتثمثيلهم فى البرلمان.. انما وجه استيائى من ردائة ممارسة النور بالتحديد هو انه بيدع "بشرع الله" وانا مفهمش ايه نوع شرع الله فى مسانده ناس من نظام فاسد ومفسد ومزور..
لا تختلف الكتلة ولا الاخوان كثيرا بس هذا هو المتوقع يعنى! وفلوس تتبعت وفيديوهات لتشويه الناس واستغلال للدين والمتدينين واللعب على احتياجات الناس المادية والامنية والدينية..
يعنى بمنتهى الامانة انا لا اعيب اطلاقا على الغلابة فى اختيارهم حتى لو بشنطة تموين.. الغلبان فى مصر عارف انه فى ذيل قائمة الاولويات امام احتياجات النخبة من التصييف والفسح..
انما الحقيقة المخجلة الصراحة هو استعباط الجميع عن الناس اللى راحوا فى ماسبيرو ومصطفى محمود وامبابة ومسرح البالون والدويقه والثورة نفسها.. والليستة طويلة
الاستعباط الاكبر عن 12000 محبوس فى احكام عسكرية على الرغم انه قانون غير دستورى والبيانات واضحة بتحويلهم للقضاء الطبيعى..
الاستعباط عن كل اللى ماشيين بعين واحده.. الاستعباط عن فلوس الداخلية اللى جابوا بيها لبس جديد وخوذ جديدة وقنابل جديدة.. الاستعباط عن موظفين حولوا للتحقيق لرفضهم استلام 7 طن قنابل مسيلة للدموع.. الاستعباط عن حكومة محترمة.. الاستعباط عن اقتصاد منهار.. الاستعباط عن رؤية غير واضحه للمستقبل.. داحنا حتى مش عارفين المقاعد هتتحسب ازاى.. ولجنة فرز الصراحة انا مش عارفة الناس دى طلعت الارقام دى بناءا على سوق التلات اللى كانوا قاعدين فيه؟؟
انما الحقيقة انا مبسوطة من حاجة.. اهل الطبقة الراقية والمتوسطة عرفوا اخيرا ان فى ناس فى الحياة مايبفرقش معاهم خالص انك تصيف السنة دى عشان هما همهم رغيف عيش او انبوبة.. عرفوا برضه انهم لما بيضحكوا فى وشك وهما بيفتحولك باب العربية دا مش معناه اطلاقا انه مسامح ولا انه عايز يبقى باشا زيك وده من حقه...
عم حسن عامل النظافة اللى مخه يوزن بلد بيقوللى الغلابة جربو البشوات ومانافعوش قالوا يجربو اللى بجلاليب.. فى وجهة نظرى تفكير معقول!
اكتشفت برضه انه ما يقولون عن انفسهم طبقة متعلمة منهم من يتعامل بنفس منطق الغلابة فى التفكير النابع من العاطفة ومش من العقل..
فمنهم من اقتصرت مشاكله على تصريحات ابو اسماعيل المتعمدة لاثارة اعصابعهم عشان مقدم البرنامج يعمل شو.. محدش فكر مثلا ان تصريحات ابو اسماعيل لن تزيد المؤيدين الا تأييد وتزيد المعارضين معارضة.. كان ممكن جدا ان يتطرق مثلا المقدم بالنسبة لعمل المرأة عن خطط المرشح فى تحقيق ظروف معيشية مقبولة بما انه ينوى تقنين او منع عمل المرأة.. فحوالى 20% من اسر مصر تعولها امرأة.. ولذا فالمتوقع لتعويض المرأه والاسره بشكل عام..وذلك بمجانية تعليم محترم لا تضطر الام للعمل عشان الدروس ورعاية صحية ادمية بدل الذهاب للمستشفيات الخاصة.. بل واعانات بطالة ومعاشات قيمة حتى لا تضطر المرأة للعمل.. لم يتطرق المقدم لذلك واكتفى فقط بالفرقعة..
وللمفاجأة فقد اتفقت مع حازم ابو اسماعيل فى نقطة.. ايوا حصل! الراجل بيقول ان السيدات فى مصر يحتاجون لمرحلة طويله فى حياتهم لرعاية الاطفال.. وانا ارد واقول صحيح تمام.. ولذلك اتوقع من الشيخ المفوه اجازة وضع مدفوعة الاجر لمده سنيتين على غرار الدول الاسكندنافية..
اما بالنسبة للهلع من سيطرة الاخوان فهو غير مبرر.. دانتو مابتخافوش من اللى بيدوس على الناس بمدرعات ايه وجه الخوف من واحد بدقن.. دقنه وهو حر فيها.. (دا مع اختلافى مع الاخوان اصلا وانى مبصدقش خالص فى جو التدين .. هما فصيل سياسى محافظ رأسمالى ليس الا.. )
دا الهلع وصل بالناس لتأليف قصة عن نادى الشمس كذبت لاحقا.. اه وبالمناسبة لو قصة منع المزيكا على صوت عالى جوه النادى دى حقيقية فانا اؤيدها..ما دا نادى رياضى ومحدش برضه يقدر يسمع حماقى بالاسبوع!!
زى مانا اويد برضه وضع قانون صارم للتدخين والقيادة بعد الشرب.. دا فى امريكا يا مؤمنين قوانين السواقة دى تضحكك من فرط تعنتها والتدخين بل وانه ممنوع الشرب فى الشوارع اصلا فى معظم الولايات. الغرض بس تقنين الدنيا مش تطليع الدين!
ما هو اى نظام هيضطر يحط نظام ويسن قوانين الاخوان بقى ولا المصريين الاحرارهيضطرو يحطو قوانين فمفيش داعى للمغالاه قوى والتركيز على مين اللى حاططها..
نداء للى مسميين نفسهم ليبرليين.. الولولة اللى كانت متوقعة منكم كانت المفروض على واحد زى علاء عبد الفتاح اللى محبوس ظلم فى محكمة استثنائية ولا على قناص العيون اللى طلع فوتوشوب ولا على جميلة اسماعيل اللى عاشت عمرها كله تناضل وتاخد صابونه عشان صراع مادى بين الاخوان والكتلة ولا على جورج اسحاق الراجل اللى بدع الاعتراض على السلطه ومحدش بيناصرة ولا حتى ساويرس!! ولا على اللى ماتو ولا على اللى عنيهم راحت ولا على الاغتيال السياسى للبرادعى وابو الفتوح ولا على ارهاب شخصيات بارزه زى منى الطحاوى ولا على شباب ناجح زى ماجد السمنى!!
كفايه بقى ولولة على تفاهات.. وحكم على البشر بالجهل..
اللى اتحمقو قوى عشان الناس اتضايقت من ساويرس على الكلمتين الهبل انا احب بس اوضح.. اهو لما تم تبرئه 6 ابريل من تهمة التمويل الخارجى وقولنا ان فى مجموعات سلفية ممولة من الخليج محدش فتح بقه ليه؟ هه؟؟ ولما الكونجرس قال انه دخل 40 مليون دولار محدش سأل لمين ليه؟
واخيرا اذا كنتو متهيألكو ان الخليج لو بيبعت فلوس لبعض الجماعات السلفية هيبعتها من ورا امريكا دانتو تبقو على نياتكو قوى.. الخليج بيدفع عشان العروش وبيدفع نيابة عن امريكا المعذورة اليومين دول عشان الوضع يظل على ما هو عليه.. ديموقراطية مصر خطر على الاثتين بنفس القدر..
المهم يعنى.. الله يرحمها دى ثورة لا يساندها اهلها ويذهبون وراء سراب سلطة زائفة اخرتها صابونة وهياخدها الكل...
وما دايم الا الدايم ولا دايم غير الله
