ابو صندوق: اللى مش عاجبه يتفضل مع السلامة.

• ياخى دانتا اللى فى ستين سلامة...قلة ذوق!! ايوة  دى مش شتيمة ده وصف... يعنى اما واحد شايف ان اللى مش عاجبه الكلام...طب دلوقتى انا واختى قلنا لأ وابويا واخويا قالو اه.. نعمل ايه بقى..
• انا عموما فى الوقت العادى بكبّر من نوعية الناس دى، لكن طبعا نظرا ان الاعلام ماشاء الله بطل يجيب اى حد من خارج الحلقة الدينية..فا الواحد بيخرج عن شعوره.
• الاعلام يا حرام اتعودوا على النفاق. هما حسوا من خلال تهديدات مبارك ان الحاكم اللى جاى هيكون اسلامى قاللك ابتدى مسح جوخ بدرى بدرى... وقد كان...
• المشكلة الللى محدش واخد باله منها ان الخطاب الدينى اللى من النوع ده موجود ومن فترة طويييلة..امال ابويا كان بيتسلى فى ايه بعد صلاة الجمعة. كان بيصطادهم ويديهم درس اسبوعيا..
• يعنى الخطب دى مش جديدة ومن زمان تحت عين امن الدولة وكله امّال يا جماعة الشغل ييجى ازاى.. لازم شوية فلفل كده خطبة كده ولا كده ..خناقه هنا كنيسة هناك..بالظبط زى الواد سيد الشغال اما قاله (خبطةمطوة، لطشة سكينة) كده يعنى..
• امال يا جماعة احنا هنلهى الناس فى ايه..ماهو لازم نطلع بعبع الدقن ده اللى هو يعنى مش مفاجأة..والجهل اللى الناس فيه ابتديت احس انه كان متعمد..
• انا بس اللى حارق دمى بس انى كونى فى  مسلمة واعتز بدينى بقى جزء كبير من اليوم لازم اكرسه لتحسين الصورة اللى دول خربوها... ولما بسافر المهمة بنكون اصعب..كفاية بقى مش كل مانصلح حد يخرب حاجة
• الجديد بقى ان فعلا احنا بلعنا الطعم، يعنى الرجل الصندوقى صدق نفسه ان هو والدين السبب فى ال"نعم". الانكت انه احنا صدقناه وقلنا الاخوان هيمسكوا البلد، مع العلم ان السلف مابيطيقوش الاخوان، خدنا انجاز السلف اديناه للاخوان وخوّفنا نفسنا منهم قام الاخوان حسوا انه "ايه ده..طب ما فعلا انا جدع انا جدع..انا اللى هكسب هيه هيه...
• الاخوة المكتئبين ولخائفين.. دول هارونا نواح لما خلاص البكاء وصل للركب..ارحمونا يا جماعة.. ما هو انا مش عارفه حضرتك   افتكرت ان عشان الناس اتلمت من الفيسبوك هنتحول ديموقراطيا خلاله؟ طب يا عزيزى ما الخدعة دى الكل بيستخدمها برضه بما فيهم عناصر مريبة هى برضه بتدخل وتربيلنا الرعب والاكتئاب..انزل ام الشارع بقى!!
• حد خد باله من شويه ناس على فيسبوك بتخش اى جروب عشان تخوف الناس وتشتم فى اى حد محترم..طب خدت بالك ان اليوم السابع بتبعت التعليقات السلبية بس؟؟جرب كده هتشوف بنفسك!
• مجموعة الفتايين: يا جماعة اللى مش فاهم المادة التانية مايفتيش بقى، واللى معرفته عن التيار الاسلامى السياسى من خلال افلام عادل امام ووحيد حامد مع احترامى ومسلسل الجماعة الللى  ناس تانية برضه من فرط اكتئابها او خفة دمها قالت ان كلنا هنشوفه لايف- يا جماعة ممكن نعمل سيرتش سريع عشان انا حسه انه فاضلنا تكه وهندخل اى حد له دقن معانا فى المجموعة حتى لو جريج دافيد
• الاخوان المسلمين: شربت المقلب انت! اه والله مقلب.. بعد ما معظم الناس كانت معجبة بيكو  من الموقف فى التحرير بعتوا الباقى فى اول محطة.. وراح السلف ظهروا والناس مش فاهمة فا انت موقفك صعب عشان معظم القوى السياسية فى الناحية التانية وصعب اللى اتبنى جوا الناس 30 سنة يتغير فى شهر بالذات بعد ما حركة البيع دى! ونصيحة..الغرور المفرط ده اخرته زفت مهما طال الزمن
• عصام العريان: انا باحسدك على الحنجرة..تقدر على رغى؟
• الثلاثى المرح: صفوت،سرور، زكريا... ايه بقى!!
• الحملة اللوذعية بتاعة " انا هقول لأ": فعلا ياخى لأ تلؤك.. انا اموت واعرف من الشخص اللى فكر فى الحمله دى....من غير الحمله دى النسبة كانت اكيد هتعدى ال 22%... بجد الشخص اللى فكر الفكرة دى يا اما مخرج اجنبى يا واحد مغيب يا اما صوّت بنعم!! لاسباب  كتير:

اولا: ان معظم الشعب حس ان الناس الهاى لايف دى بتقول لأ طب انا هقول اه والحوار ده حصل مع اختى

ثانيا: بان وكأن معملناش حاجة: فلوس قدام دين- وطنى- اخوان. ده اللى بان على الاقل بالنسبة لى

ثالثا: انت حرقت البرادعى وعمرو موسى وطلع منظرهم تيت ان هما الاتنين على بعض وبالاستعانة بعدد من نجوم المجتمع على بعضهم بقوا 22% انا لو مكانهم اقاضيك!

رابعا: انت ناقش الحملة من حملة امريكانى بالمللى

خامسا: الحملة دى شكلها نضيف اوى ومتعالى على الناس فبالتالى اكثرية اللى شافوها كانوا طبقات فوق المتوسطة بس الغباء انك تملى عليه انه لأ..

سادسا: واخيرا الشخص اللى فكر الفكرة النميسه دى مخدش باله ان الثورة دى مالهاش قائد فمبدأ الشخص المشهور والفنانين ده مش واكل اليومين دول بالعكس هو مستفز لطبقات الشعب الكادحة اللى بتسمع عن الملايين اللى بياخدوها فى الافلام..

سابعا: الاعلان ابيض واسود كأننا بنعزى ومافيهوش نص حاجة مصرى!!

• عمرو حمزاوى..الوحيد اللى بيشتغل..الحقيقة بس لازم نتخلص من الحنتفه الفندقية دى.
• الاخوة الاحزاب والمواطنين اللى قرروا ياخدوا بزمام الامور : يا جماعة انتو كنتو فين من 30 سنة. دا مع كل احترامى انتو السبب بسكوتكو وطريقة ممارستكو للسياسة بشكل مصلحجى وماتزعلوش منى انتو جايين تحددولنا هنعيش ازاى..معملتوش لروحكو ليه طيب.. انا بكلم عن الكل اللى كان موجود وساكت..اى حد فى سن بعد الخمسين اثبتوا فشلكوا 30 سنه على الاقل وجايين تفشلو ا الثورة دى..
• اخيرا اسأل عن حاجتين..
• الاخوة اصحاب المواعظ الدينية الغير دينية بل سياسية (بدون تحديد) هو انتو كنتو فين قبل كده وماتقوليش كلكوا غلابه اعتقلتو.. بدليل انكوا ماشاء الله شغالين نار فى التلفزيون ومن زمان! انت جاى ليه دلوقت! يا اخى اتق الله!!
• حد لسة عنده شك انه فعلا فيه ثورة مضادة وان معظم الناس مش فارقة معاهم؟؟
• هو فين راح ائتلاف شباب الثورة؟؟؟ الظاهر خلاص جالهم طلب الكباب اللى طلبوه لما طلعو القمر (بناءا على كلام هيكل)

ارحموا مصر يرحمكم الله.. ولا اقوللك اهو الواحد بيكتب كلمتين مالهمش لازمة هيقراهم شخصين..

هو فعلا مفيش امل؟؟

ليه لأ

ممكن ابدأ بكل الأسباب الهباب اللى الناس حاولت تقنعنى بيها: بالمناسبة انا هاخد راحتى على الاخر عشان ولا مؤاخذة انا اتبهدلت تهزيئ اخر كام يوم فا اللى مش عاجبه ممكن تقاطعنى عادى.

الحقونا جيوش الاخوان المسلمين هياكلونا: يا مامى. حقيقى يا جماعة "هذا مثير للشفقة". يعنى نصيحتى "يو نيد هيلب" وعلى فكرة انت شكل عمرك ما نزلت التحرير يا اما رحت تتصور مع الدبابه.

1.       عدد الاخوان بالنسبة لجموع الشعب اللى كانوا هناك كانت نسبة معقولة وماكانتش هيا اللى عاملة المظاهرة. وبالمناسبة هما لو كانوا هما اللى عملوها انا كنت هاحطهم فوق راسى عشان خلصونا من عمكو حسنى.

2.       الحقيقة التانية: الشباب دول انقذوا ناس ومات منهم ناس بالذات بوم موقعة الجمل..وفى ناس مدينة بحياتها ليهم

3.       كفاية نغمة ام الرعب ده: ايه الخوف المرضى ده.. بجد انت مصدق نفسك؟؟

4.       الناس اتبهدلت وبقالها 80 سنة بتشتغل وتعتقل وتتبهدل: فا معلش لما تيجى تقول والله اجلولنا الانتخابات ده مش عدل

5.       اخيرا: لما تروح المناطق الشعبية الناس دى بتعمل حاجة للناس المحتاجين ومن الاخر كانوا بيقوموا بالدور اللى الحكومة عملت عبيطة فيه من خدمات واصلاحات وحتى بيع التموين بسعر يناسب الفقرا..فا متزعلش منى منبقاش زى البليد اللى عايز يأجل الامتحان عشان هو والله كان قرفان يروح الدرس ويذاكر.

ثانيا: فلول (يعنى بواقى) الحزب الوطنى..

خبر وحش..هى مش فلول..زكروطا وصفصف وسرور احياء يرزقون وبيتفسحوا وبيشتغلوا والقشية معدن... فا الصراحة انك تأجل الانتخابات هيديهم فرصة اقوى للتجمع والاستعداد.. نفس التظرية تطبق على الاخوان على فكرة والجماعات ودول اخطر. برضى يا برنجى ماشترتش منك

ثالثا: قاللك صلاحيات الرئيس..

طب وحياة الغالية، قوللى كده الصلاحيات يعنى ايه؟؟ طب انت معترض على ايه فى الصلاحيات طيب؟؟ طب يا حبيبى ما انت معترض على ان البرلمان مش ممثل ليك عايز رئيس شرابة خرج؟؟ حد فاهم حاجة؟ طب ما صلاحيات معاه برلمان فايبقى فيه توافق قوى.. فا برضه ماقتنعتش

رابعا: انا ضامن الجيش

 والله انا مبسوطة جدا الحقيقة.. انا معرفش من اين لك هذا..لو ضربت بعينط امبارح كان المستشار العلامة طارق البشرى قال ان نفس السيناريو حصل فى 52 وماتقوليش اصل كان حالة مختلفة..ابوووسسس ايدك اقرا التاريخ من حتة تانيه غير كتاب التاريخ بتاع الوزارة وفيلم ناصر 56...فى مثل بيقوللك" يا نحله لا تقرصينى ولا عايز عسل منك"...برضا ماقتنعتش.

خامسا: قالولنا صلاحيات الرئيس يعمل دستور على مزاج بابا..

يا جماعة ما هو لما تنتخب الرئيس الاول هنعمل دستور جديد والريس هيبقى بطوله لا برلمان ولا اى شئ يعنى هيه هيه نفس الفكره..

سادسا:فى مؤامرات والاخوان منتشرين ومعاهم احزاب نختلفة منهم حزب الوسط:

الرجل فى حزب الوسط (فى ميت مليون حوار) هيوطى على ايد الناس يبوسها عشان يقوللهم لأ هما مش اخوان وملهمش اى دعوة بيهم..يا جماعة ماحنا ابتدا يبقى عندنا احزاب مش معقولة هنهاجم قبل مانسمع... وبعدين اسمع واحكم...ايه حالة الطرش الاختيارى ده!

المرحلة الاخيرة: المربع الاول:

حملة احنا هنقول لأ:

حملة فى منتهى الاستفزاز..لأنها مجرد بترجعنا لأول مربع: رأس المال قصاد الدين..

يعنى حمله، فلوس، فنانين ، رجال دين (برضه)..والمصرى اليوم اللى المفروض تكون حيادية تاخد موقف... ايه ده.. ده غير ان اكيد رد فعل الحمله دى اثرها هيبقى على 3 افراد لعدة اسباب اولها  ان الثورة دى مالهاش قائد وجو الفنانين ده مش هياكل خلاص...

من الناحية التانيه: جوامع بتقول صوت باه او لأ..وكنائس بتقول قولو لأ..

الجراند فينال: الشتيمة والتهزيئ .

وصلنا لمرحلة: اولا الاتهام بانتماءات اخوانجية اللى انا مش فاهمة ايه المشكلة. ماهم ناس.. وانتماء او الاندساس من قبل الحزب الوطنى وساعات الاتنين سوا.

ثانيا: انى مثلا سأساعد فى رواج ازياء التوحيد والنور، ثم التخلف، ثم انى انا من مجموعة الاستقرار؟؟ ده اللى هو انا؟؟ طب يا جماعة ده نسبة كبيرة من المحموقين لا عمرهم شافوا التحرير بل كانوا من مجموعة احنا اسفين يا ريس..فجأة بقيت انا من المحافظين على الاستقرار.. تكرم يا سيدى..انت الثورجى ومنكم الافاده..

طبعا فى مرحلة الاتهام بالجهل الفظيع..وانا اعترف بجهلى بس لامؤاخدة حضرتك كلامك طبق الاصل العاشرة مساءا ليلة امبارح ولا ايه..

انما اكتر مرحلة تثير الاستغراب هو كانت لأ بالعند فى الاخوان دى او سأترشح بالعند فى الاخوان...معلش والله انا يلزمنى اللى يترشح يبقى عشان مصر مش عند فى واحد عامللو كاللو..

الاكثر قرفا هو الغلط فى اللجنة: يعنى طارق البشرى: ماحدش فكر مجرد تفكير يطل على صفحة ويكيبيديا للراجل..الراجل ابوه قاضى وجدّه شيخ ازهر وتشاكل كتير مع الخديوى. وكان اتجاهه يسارى علمانى واصبح اسلامى معتدل..وراجل كان متقاعد اصلا وعبقرى ونزيه بشهادة الجميع هنيجى احنا نشكك فى نزاهة الراجل ياللى اخرنا فيس بوك ...ده ايه ده؟؟

من الاخر، اصبح الفيسبوك مرض توحدى لا يعبر عن اى شئ له معنى فى الحياة ثلاثية الابعاد.

طب انا قلت ليه لأ:

1. قابلت امبارح شاب فى جراند حياة: بينضف الغرف.. بكالريوس تجارة.. كان معتصم لزياده مرتبه اللى هو 350 جنيه...الجميل ان الاعتصام كان ورديات عشان الشغل مايتعطلش
2. احمد شاب القهوة: ليسانس حقوق..وحياة ربنا.. يسكن فى روض الفرج..يعانى انفلات امنى فى منطقتة..فقد صديقه الصدوق عشان كان واقف بيتفرج (مات برصاصة فى دماغه يوم 28)
3. احمد بالنسبه له هى خربت او عمرت حياته مش هتتغير..احمد كل مشكلته انه مش عايز الدستور ده يعدى لكن معندوش امل فى كده عشان فى مناطق الاصوات فيها بالفلوس هو قاللى "انا اللى مضايقنى ان الناس دى (قصده الوطنى) هتنجح وتمشى كلامها عشان انا جعان" واضاف "انا عايز حق صاحبى اللى مات"..

انا ساعتها قلتله احمد انا كمية اناس اللى حاولت تقنعنى مبالغ فى عددها..بس انا مستعده ادى صوتى عشان اللى زيك يحس ان فى أمل.

واخيرا، كلمتنى "راجيا عمر" اللى هى تقريبا احد نقاط ضعفى..  وجهت انتباهى ان اللجنة التأسيسية فى حالة نعم يتم تعيينها وفى حالة لا يتم انتخابها من الشعب.. انا بالنسبة لى من حق الجاهز ينزل انتخابات وده عدل..بس اللى مش من العدالة ان البرلمان يعين اللجنة التأسيسية... احنا اللى نعينها.. ده السبب الوحيد بعد احمد.. يعنى البرلمان فى تشكيله مش ازمة..الازمة ان البرلمان ده هو معين اللجنة مع الرئيس والوزارة

اخيرا: انا عايزة افكركوا ان النظام القديم هو اللى عمل الفتنة الطبقية والطائفية، هو اللى لغى استقلالية الازهر فظهر التيارات والشيوخ المريبين، هو برضه اللى اضعف من دور الكنيسة واللى حسس المسيحيين فى مصر انهم مهددين فى بلادهم بشكل غريب..هو برضه صاحب التفجيرات اللعينة.. وهو اللى فضل مخوفنا طول الوقت من بعض و من التيارات زى الاخوان من غير مواجهة او حتى معرفه... الوحده هى اللى خلتنا نزيح نظام فى 18 يوم وده مش سهل...

اخر حاجة...امبارح فى جراند حياة (مش اصدى ابين انى بروح الاماكن النضيفه دى ولا حاجة انا بيئة اصلا) كان لاعب البيانو بيلعب اغنية (يا بلادى واغنية وطنية تانيه) فى اللوبى بشكل غريب خلانا وقفنا نعيط فى نص اللوبى..

مصر طالما فيها الناس دى مافيش عليها خوف...

اللى عنده استعداد يقلب الثورة طائفية او طبقية او مادية..او ناوى يلغوصنا مشاعر خوف من كراكيب النظام السابق

الشعب يتفضل من هنا...انشفوا كده...كله هيبقى كويس.. من الاخر: انا نو.

خبى وشك… وشك بيلبش جتتى

انا طبعا معاكو ان اليومين دول مش حمل هزار او بواخة من النوع ده بس الحقيقة النوت دى مالهاش اى دعوة بتعديلات الدستور او الاه او اللأ. فى وجهة نظرى ان الخيارين لن ينتج عنها شكل يمس مصر لأن الوقت ده عدى وفات..ولا اظن ان حد مننا هيضحى بعلى الاقل الكام يوم حرية دول...انما فى الكام يوم الحلوين اللى فاتو اظن ان الواحد خد باله ان المصريين الحقيقة طوروا انواع من الفوبيا تجاه اشخاص واشكال وكلام واصبح رد الفعل المبالغ فيه الحقيقة ينم عن مشاعر دفينة تصل للخوف المرضى فى بعض الاحيان..يعنى ساعات اصلا المعلومة تتقال توصل بشكل غريب جدا كأنك بالظبط بتلعب التليفون الخربان. يعنى اضرب بعينك كدة على اى مناقشه حاميه على الفيسبوك اللى مجننا ده هتلاقى اول تعليق فى حته واخر واحد فى منطقة بعييييييده وعادة ما بتصب فى منطقة خوف اخرى.

نهايته نرجع للعنوان الغريب ده، للقلة البيئة اللى زيى اللى عارفين فيلم ام رتيبة (قصة: يوسف السباعى) المشهد بتاع سيد بنجر لما جه يتقدم لأم رتيبة فا زينهم الخادم يحاول ان ينبهه من الكلمات التى تسبب فوبيا لأخوها بالتالى تتفشكل الجوازة...وعلى رأس القائمة كان اسمه هو شخصيا "سيد بنجر" ورأس العبد، ، محشى كرنب، زكية الملدنة، وسنية القرعة، وابو على الاحول، والكبسة، والزيت الحار وابو قردان، والسمك البكلاه وبراغيت الست وعبد الحليم القرد والكرات ابو شوشة والسجق اللى من غير فلفل.

اى حاجة من الحاجات دى كانت بتلبش عبد الصبور اللى بطبيعة الحال كان يقلب على الخادم زينهم "خبى وشك وشك بيلبش جتتى"

المقدمة الساذجة دى الغرض منها انه احنا كمصريين عندنا مجموعة تانيه الا وهى على سبيل المثال لا الحصر: اجنده- حزب وطنى- امن دوله- فرعون جديد- فوضى- ثورة جياع- اصابع خفية- ايران- امريكا- تدخل اجنبى- تدهور اقتصادى- بلطجية- احزاب- طبعا اخوان- اخوان- اخوان-اخوان+ اى واحد له دقن (مش ضرورى مسلم حتى المهم ان الدقن موجودة ويا حبذا لو محنيّها)

طبعا احنا لينا كل الحق ان نكون العقدة دى عندنا ماحنا يا جماعة الشهادة لله ما شوفناش منهم حاجة كويسة برضه . انا هتكلم عن الاخوان والحزب الوطنى..

طبعا العقدة الفظيعه دى مخليّة اختيار الموافقه او الاعتراض على الدستور امر صعب جدا يخلى بعض الناس تقوللك "يقطع الديموقراطيه على بدعها، ده وجع قلب ايه ده" !

وطبعا مع محاولات مميته من المستنيرين في مصر اقناع الجماهير باراء وانه مش هيحصل اى كارثة لو ده حصل او ده حصل وهنا باتكلم عن اهم واحد فى حياتنا دلوقتى عمرو حمزاوى او من الناحية التانية الجيش اللى قال كتير انه لو اه او لأ انشاءالله مافيش ازمه هتحصل. بس احنا برضه نظرا لخبرتنا البسيطة فى الديموقراطية والكبيرة فى امتحانات الثانوية العامة اللى كان فيها حاجة اسمها الاجابة النموذجية فا احنا بندور على الاجابة دى...عندى خبر وحش الاجابة النموذجية فى الديموقراطيه مش موجودة..بمعنى ان الاغلبية هتحدد مصير الباقى حتى لو القرار خطأ.  

طبعا انطبع على التعديلات الدستورية الصبغة الطائفية- يعنى السؤال مابقاش الاختيار ده مفيد فى ايه او مضر ازاى..لأ هو تحول ان للبعض بقى بعبع الاخوان تانى والاخرين بعبع الجيش برضه والبعض الاخر الوطنى.. بس طبعا بعبع الاخوان يكسب مع شوية اضافات اعلامية برضه زى عبودة—حبيبى يا عبد يا بتاع الحروب الصليبية يا عسل..انا بقول بما ان السجن عاجبك كده ماتروح ده حتى اللى هناك اكتر من اللى هنا والقعده انس..

واتحولت الحياة السياسية الى رسائل طائفية اه ولأ وبالمناسبة انا هنا مش بتكلم عموما انما الحقيقة الطريفة ان الجوامع اصلا فيها كده وكده..

.

انا لا بقول صح ولا غلط، انا بس بقول اللى شوفته على انه رد فعل معتمد على تعاطف ومش عقلانية خالص..

الغريب بقى انه انا بعد كل اللى سمعته من ندوات وحوارات تلفزيونية حقيقى مش شايفه للاخوان الثقل الفظيع ده ولو انى لا اقلل من وزنهم فى الحياة السياسية..بس انا برضه لسه حسه ان البعبع القديم ماماتش جوانا...والخوف بطبيعتة بيولد المعركة الغلط...يعنى انا بقول ان لو احنا شايفين ان للاخوان الوزن الرهيب ده فا زى مابنقول تعاطفك لوحده مش كفاية..انزل واعرف مين هينزل الانتخابات وساعده وانتخبه..طب بدل ما احنا عمالين نغالى فى حجمهم ما تيجو ننزل المحافظات ونعرف ده حقيقى ولا لأ؟ طب يا جماعة ماتيجو نقرا عنهم بدل ما كان اخر معرفتنا بيهم مسلسل الجماعة.

انا شخصيا قلقى الاكبر من الجماعات والحق يتقال انه احساسى ان الوجود السياسى المحدود للاخوان هيحد عننا المد السلفى والدينى بشكل عام ...

يعنى يا جماعة انا حضرت امبارح ندوه فى الجامعة، عصام العريان الحقيقة هوجم جدا.. وعمرو حمزاوى وجّب معاه.. بجد الموضوع مش مؤامرة ولا حاجة. الحكاية كلها شغل..اللى مش عاجبه الاخوان يشتغل عشان يكسبهم مش يشغل نفسه يخلص منهم ازاى.. وانا هبدأ بأنى هاحاول اقرا عنهم...

اما بالنسبه للوطنى السؤال هما من انتم؟؟ يعنى معرفتى ان الوطنى معظمهم كانوا  هما اللى برشطوا على النواب اصلا خارج القاهرة.. يعنى ييجو للنائب المنتخب ويضربولوا كارنيه.. فا الراجل مالوش فيه يعنى..لو مش عاجبك اشتغل عليه...

انما معارك الفيسبوك دى هتجيبلى توحد بصراحة..يعنى ماتزعلش منى مش معنى ان الفيسبوك دعى للثورة انه هينجح الثورة. الثورة نجحت من غير انترنت ولا فيسبوك ولا حتى تليفون!  ده بالنسبه للى نزلوا الجمعة 28 يناير.

 بالاضافة بقى انه ناس كتير اتلطت بالتطاول مع انهم ناس محترمة جدا فى مجالهم زى الدكتور يحيي الجمل والمستشار طارق البشرى..اللى اشنيرت سمعته يا عينى..وهو راجل علامه فى مجاله..

ارجع واقول كلها كراكيب فكرية غير مجدية، واحب اقول هنا البق الشهير للفيلم ده:

سمو، علو ارتفاع

وشكرا

www.thecirclesquare.blogspot.com

كنتى فين يا" لأ" لما جيت اقول "الاه"

بنا نفوجأ اننا فجأه بقينا شاطرين اوى فى السياسه ومتمسكين اوى بوجهة النظر بشمل مبالغ فيه لدرجة متطرفة...يا جماعه ممكن والنبى نفتكر ان احنا بقالنا بالظبط 47 يوم بنفهم فى السياسة ده اذا اجزمنا ان اللى بنعملو ده فهم... انا بس اللى مستفزينى هو الجهاد النفسى اللى الناس فيه ده وان الكل قافش فى وجهة نظره (وانا اول الناس دول) رغم ان بجد محدش فينا فاهم حاجة 100%...

يعنى مثلا قدامنا 6 ايام على تعديلات الدستور...حد يا جماعة يقوللى اللى موافق موافق ليه والمعترض معترض ليه..بس ابوس اديكو بلاش شعارات..

طيب انا الحقيقة رحت كذا محاضرة ساخنة للنجم عمرو حمزاوى وطنط تهانى الجبالى ونبيل العربى وناس تانية. برضه سمعت من ناس كتير وقريت لطارق البشرى وغيره وغيره...

انا يا جماعة بس كل مشكلتى انه ماحدش بيرد على سؤالى، لو يا جماعة لو الكل اجمع ان الدستور نو(يعنى لأ)، هنعمل ايه! طب يا جماعة جاليا الدستور لو عدا كده يحصل ايه؟

دا انا سمعت ناس تقولك ايه...يا جماعة ده الاخوان والوطنى موافقين سوف انت بقى...مفكرانى قوى يوم ما ايران وامريكا اتفقوا ان مبارك يمشى، حد جه قال برضه اول مره امريكا وايران يتفقوا...بجد حاجة تفطس من الضحك..

طب خالينا نكلم بلدى كده عشان احاول اقرر وانا بكتب من خلال المشاكل اللى سمعتها:

1-      الدستور ده وقع اصلا عشان الشرعية الدستورية تسقط الدستور: صح كده يا جماعة وعشان كده احنا هنعمل واحد جديد نوفى على موسم المدارس انشاءالله، بس انا حابه اقول ان الدستور الجديد مش هيخترع هو يمكن حاجات هتتظبط بس يعنى مش هيكون دستور سويسرا فوالله اللجنه كان ممكن تشطب على العنوان وتقول دستور جديد وماكنش حد هيعترض!

2-      قاللك صلاحيات الرئيس ماتغيرتش: طب ياجماعة ما احنا متفقين ان القوى السياسية حاليا غير ممثله للجميع، طب على الاقل حاليا يبقى عندى رئيس قوى عشان البرلمان مايشطحش فى الوقت ده ولو فى بواقى حزب وطنى تبقى تحت السيطرة وفى نقس الوقت برلمان قوى له سلطه على الحكومة فحضرتك يكون عندك سيناريو ايه (جبنا الحلو من هنا وهنزطه على الحلو من هنا)

3-      طب بالنسبة لموضوع الصلاحيات: انا معاك، حضرتك كمواطن معترض على النقطة دى شايف نشيل صلاحيات منين: يعنى هو القائد الاعلى للقوات المسلحة، ورئيس السلطة التنفيذية/ واظن القضاء. انا مشكلتى فى القضاء انما احنا هنجيب رئيس لمدة لا نمسكه جيش ولا بوليس ولا وزارة طب يا جماعة نبعت نجيب ملكه انجلترا بقى!! اهى لا بتحل ولا بتربط

4-      طب قاللك ايه ده بيخلى المجلس هو اللى يرشح الجمعية التأسيسية للدستور:  اولا على قد فهمى هو الرئيس والمجلس هيعملو ترشيح وده بند "ملزم" يعنى الدستور ده اظن يقع لو ده ماتعملش.. انا مشكلتى فى تحديد جدول زمنى.

الحاجة الاهم: مين يرشح الاسماء للجنة دى؟ ما مفيش اختيارات كتير:

-          اما المجلس العسكرى- او الاحزاب الموجودة- او الرئيس لوحده.

-          اما بالنسبة للمجلس العسكرى فكلنا مش عايزين ده عشان اكيد فى تحيز للمؤسسة العسكرية وده مش عيب، وعندك احزاب بوجى وطمطم المتاحة حاليا، او الرئيس مع نفسه وانا الحقيقة بقول هو انا اقول لأ لمجلس فيه 500 نفر واختار شخص واحد مهما كان يختارلى اسامى انقى منها؟

-          انا وجهه نظرى انه وماله ان الرئيس والمجلس والوزرا هما اللى يعملوا الليسته واحنا ننقى اللجنة اللوز.

5-      طب قالوا برضة انه ليه مايكونش متزوج من اجنبية اوحمل جنسيه اخرى. انا شخصيا ضد الاثر الرجعى، انما موضوع الزوجة ده ما هو برضة حاصل فى الخارجيه والجيش.. يعنى لو الناس فعلا شايفة كده يبقى نكلم فى القانون ده على الخارجية والجيش..اللطيف برضه ان ولنفرض ان الرئيس ده مثلا مزاجة مزة من اثيوبيا وقررنا نتدخل عشان مياه النيل (بعد الشر) هنعمل ايه والراجل الغلبان هيعمل ايه؟

وبعدين يا جماعة ما ينفعش واحد ياخد جنسية تانيه ومزة اجنبية ويبقى رئيس جمهوريه فوق البيعة..يعنى الناس هنا بتكح تراب.. (نفسنه اوى هنا)

6-      الماده الثانيه: والله انا وجهه نظرى انه كل شئ قابل للنقاش والتغيير مطلوب طبقا لمعطيات المجتمع اللى احنا فيه..

7-      اخيرا فى نقطة ان المرأه مش مكتوبه عندنا فى الدستور ده...انا كونى امرأه مصريه متعصبه، متنازله المرحله ده عن الحق ده واول ما الدستور الجديد يتكتب انا اول واحده هطالب بيها.

8-      واخيرا نظرية المؤامرة، ولو ان النظريه اللى هقولها دى طفولية جدا، هى مناسبه لعقلى البسيط. انا شخصيا شايفه ان الوطنى والاخوان يوم ما التعديلات دى يتقال عليها لأ هيكون فرصتهم اقوى من اى حد وده لأنهم من زمان معتادين خوض الانتخابات فى فوضى عارمة وبالاتفاق احيانا والخزوقة بينهم احيانا اخرى (اخرى= تانيه). فا من وجهة نظرى الجاهلة جدا ان لو قلنا لأ فى حالتين: يا اما نرجع للدستور المأساه 71 او نكون من غير دستور خالص..وساعتها كل القوى السياسية برضه مش هتعرف تعمل احزاب عشان مافيش دستور او عشان دستور 71 مستفز..ده بالتالى يدى لمييييين الفرصة يشتغل فى الحوسه دى ...الوطنى والاخوان والجماعات المريبة الاخرى اللى الشغل فى الضلمة ده كان لعبتها اصلا.. بينما القوى السياسية اللى احنا عايزنها تعمل احزاب قاعده ياعين امها تصلح ونتتخانق على الدستور.  (ضحكات شريرة متقطعة)

9-      حاجة اخيرة: اللى لسه مش واخد باله ان الجيش عايز يخلص وجاب اخره ومصمم يقعده يبقى لازمله نضاره.

10-   نظريه المجلس الرئاسى: انا حقيقه شايفاها فكرة غير مفهومة ومش فاهمه ايه نوع شرعيتهم لأنهم غير منتخبين ومفيش مجلس ولا دستور يراقبهم!  

نهايته، التغيير مطلوب طبعا على ان التغيير يكون صورة معبرة لواقع البلد مش الكتالوج اللى الناس عايزة البلد تمشى عليه..يعنى احنا عملنا الثورة الاول فسقطت شرعية مبارك واتغير الدستور مش العكس.  والاهم ان الديموقراطية ليها تمن زى الدورى فى الكورة كده، ممكن الاهلى يفضل ياخد الدورى ويوم ما الزمالك يشد حيله الدورى يتلغى والكل لازم يلتزم برأى الاغلبية... اقصد ان لو اتوافق او اترفض كلنا لازم نمشى عليه وماينفعش نقول انا مش موافق فا مش لاعب...ده يبقى ساعتها احنا مافهمناش اى حاجة

ودى طبعا كراكيب فكرية فى منتهى الجهل من مواطن مصرى مطحون فكريا ومحروم سياسيا ومهدد اقتصاديا

وشكرا

وانت عايز ايه بالظبط؟؟

صحيح ان السؤال ده ارتبط بشخصية "اللمبى" وهو الشخصية التى نمت وترعرعت فى ال30 سنة الماضية والحمد لله اثبتنا ان الشخصية دى كانت نتاج مناخ وليس تحول بيولوجى للشخصية المصرية.. يعنى بمجرد 20 يوم من مشاهدة الاخبار وسماع شخصيات مصرية مرموقة ومحترمة اتصدمنا لما عرفنا انهم اتمنعوا من الظهور، اتحولنا كلنا لشخصيات مثقفة وسياسين محنكين..ولذلك انا باحمد ربنا انه اسوأ مثال كان اللمبى ومش القذافى...

المهم، مش عارفى ليه عندى احساس انه فى ناس حابه اوى تنكد علينا... يعنى الناس سعيدة ومبسوطة ولأول مرة مهتمين بالوزارة  ومستقبل مصر.. يا جماعة (ولا بلاش كلمة جماعة) ياخوانا وكتاب الله دى حاجة حلوة...

انتو غاويين نكد ليه؟ ما بدل مشاعر فيلم  (غرام وانتقام ) دى وافلام ما بعد النكسة الهابطة ما تيجو نستغل حالة السعادة دى (بالانجليزى Euphoria)؟؟

ارجع لعنوان الموضوع "انت عايز ايه باظبط"

يا جماعة يا بتوع الحزب الوطنى انتو بجد لسه فيكو نفس؟؟  ياخوانا عيب انتو عاملين زى عبد الحليم فى الوسادة الخالية...روحوا شوفوا حاجة غيرنا.. ما هو اصل عمر الى فات ما هيرجع تانى..ولو بعد الشر حصل بالفتاكة كدة مش بعد بكرة يعنى.. ارحموا نفسكو وحلو عنا بقى ببرلمانكو وفلوسكو وبلطجياتكو وجرايدكو وقنواتكو وجمالكوا(اصدى هنا جمل) وحميركو وسلطاتكو وبابا غنوجكو.. كفايا بقة..

اما بالنسبة للجماعة فعلا،ايواّ الاخوان المسلمين،  الشهادة لله انتو اتبهدلتو كتير واتعذب منكو كتير، والشهادة لله برضه ان شباب الاخوان يوم موقعة سوق عكاظ دى استجدعت ولو انى اشك انه كان اصلا القيادات كانت هى اللى امرت بذلك واظن انه كان رد فعل طبيعى من الشباب الللى اتصرفوا بمنتهى العفوية لأنهم مصريين مش لأى اسباب تانية.. بس بصراحة يا جماعة وبرغم كل ده وبرغم انه حاولنا فعلا نفهمكم ونقدر موقفكم بس الصراحة انتو تصريحاتكو مستفزة جدا جدا جدا..يمكن قربت تصل لنفس استفزاز تصريحات الحزب الوطنى (ودى يا جماعة درجة مش كويسة صدقونى).. وهاشرحلوكو ليه،

اولا تصريحات من نوعية ان "احنا لا ممكن نكسب باغلبية" والجو ده... انا لو مكانكو

ماقولش كده. اولا عشان الثقة الزايدة دى مستفزة اوى...اوى يعنى.

ثانيا، كل الناس عارفة انه اللى كانوا بينتخبوا نواب الاخوان كان لسبب دينى مش لسبب اجتماعى او حتى سياسى وده اصلا مالوش اى دعوة بالثورة.

 الحاجة الثالثة انه مش سر انه قيادات كبيرة فى الاخوان هى ذات مقدرة مادية هايلة وده فى بلد زينا انت تقدر على حملة انتخابية عكس كل الحركات السياسية الجديدة..

الحاجة الرابعة ادعاء عدم استغلالكم الفرصة.. انا معاك بس انت مش شايف ان الجملة مستفزة وبتفكرنى بواحد برضة كانت طريقة كلامه كده ونهايته ماقولكش..

الخبر اللى عندى انه انت فى احيان كتير استغليت الجامع لتسييسه وده ماكانش متاح لأى حد.. وعشان كده ليك شعبية.. وانا من وجهة نظرى ان ده استغلال للدين والجامع بس ما علينا انا اجى ايه انا..

الحاجة الخامسة: حزب الحرية والعدالة- وقناة تلفزيونية: الجماعة ليها اسم والحزب اظن لازم يكون قريب من اسم الجماعة.. عدالة وحرية دول كلمات مقدسة مش للاستخدام التجارى كدة...  وبعدين هو فى حزب هينادى بالظلم وكبت الحرية؟؟ يا جماعة احنا كبرنا على الكلام ده بقى.

اخيراّ يا جماعة احنا بقالنا فى مصر بتاع 80 سنة بنسمع عنكم وبقالنا 30 سنة بنسمع انكو  عايزين تبقو حزب. ما قلتوش بقى الحزب ده ايه اهدافه، يعنى التعليم، العمالة، الاقتصاد، الاعلام، الصحة..دوركو ايه وعايزين تبقو حزب ليه ولا هو كده حزب ورياسة وخلاص. وبالمناسبة يا حزب يا جماعة ماينفعش الاتنين...

واخيرا لو سمحتو بلاش كلمة لو عايزين ننزل ونكسب الرياسة هنكسب...عشان ده ماظنش حقيقى ونوع من انواع التكهن بالغيب وبق غلس اوى..  واهم من كل ده بلاش حركة الباراشوت على جهود الاخرين. زى حركة المسرح فى ميدان التحرير، زى محاولاتكوا المستميتة ايهام الناس انه حزب الوسط تبعكوا وهو مالوش اى دعوة بيكو خالص وحركة شيلوا صورة البنت الشهيدة عشان مش مغطية شعرها...بالذمة ده كلام..

يا جماعة الاخوان... انت عايز ايه بالظبط.؟؟؟

القاهرة...يوم من ايامك يا مصر 

الى كل المطلين علينا من التلفزيون ...الضرب فى الميت حرام! اسفه جدا انتم كلكم لا تمثلونى

باختصار ومن الاخر والمفيد والخلاصة....انتو ورحمة من له غالى  كلكوا ما عندكو دم...

مدعين الوطنية، والبلطجية والافاقين والعواطليه واصحاب المصالح والخارجين عن القانون والمفسدين ومستغلين التدين الاسلام والمسيحية والفاضيين واللى على الكنبة لازقين والصحفيين والمعذبين والمجانين وغاويين النواح ورقاصين اللسان وعبيد السلطة والشهرة والمال والفوضى، المغرضين، مروجى الاشاعات، الارهابيين، الللى شايف فى نفسه نجم واللى شايف نفسه نبى واللى عامل نفسه فاهم واللى عامل نفسه مناضل...

المجموعة دى كلها كلمه واحده احب اقولها.....طظظظظظظظظظظظظظظظظظظظظ!!!!!

اللى فيكو كل اللى فرق معاه يعمل حزب واللى يجمع الناس حواليه بالحق والباطل واكتره باطل واللى كل مشكلته انه مش فى لجنة تعديل الدستور، واللى عايز يضمنلو كرسيين فى البرلمان، تستغل غيرك الغلبان والجعان واللى له تار واللى اتكهرب لما مخه لسع واللى اتضرب بالكرباج من اقذر مخاليق الارض واللى بيجرى على عيشه والللى مربوطين فى ساقية واللى طافحين الدم واللى مهدد يصحى تحت الانقاض واللى عاش فى قانون العشوائية واللى مات له حد فى عبارة ولا طياره ولا حادثة طريق ولا قنبلة على الطريق..ولا اللى مرميين فى معهد الاورام والكبد والقلب والفشل الكلوى..واللى بيتخانق على 5 ارغفة عيش يغمسهم معلقتين فول ويتهان بيهم شهر..واللى اتطخ عياريين فى احداث كنيسة العمرانية واللى اغتصبوه عشان ربى دقنه..واللى رموه فى معتقل 14 سنه لحين اشعار اخر هو فى الغالب اشعار غذرائيل...يا جماعة احنا كلنا اتفحتنا (مؤدبة انا)

والعيال على الرصيف والمطحونين من الموظفين والعساكر (ايوه العساكر) والناس اللى فى الصعيد واللى اتسرق منه كليه واللى اتسرق منه ابنه كله على بعضه...

واالى هدوله كنيسة واللى حرقوله مصحف ده غير مجموعة كبيرة راحت سمعتهم بالباطل للأبد فوق البيعة..

اى حد مش شايف انه كلنا اتعمل فينا اللى ما اتعمل فى حد: اذا كان مسلم او مسيحى او شيعى او بهائى او يهودى او راجل او ست ابيض او اسود فى القاهرة، الصعيد، بحرى، البدو، النوبة، الصغار والكبير الصحيح والمريض والمعاق...

ولو محدش شايف ان كل دول لما قرروا يطلعوا وغيرهم من اللى ظروفهم احسن واوحش ماكانوش عايزين الا 3 حاجات مشافهاش على حياة عينهم...حرية- كرامة- عدالة اجتماعية...واحنا كنا عايشن حالة عكسية من قمع وقهر وظلم واهانة وذل و ظلم اجتماعى وسياسى واقتصادى ودينى وجنسى وطبقى..

مجموعة متنوعة تخص نفسها بالوطنية والنضال والكفاح والاضطهاد والجهاد ارفع ايدك وتعلالى كده على اليمين-----انتم لا تمثلونى

1. مجموعة انسف حمامك القديم (حمامك هنا ترمز لاى حد ولو بالصدفه ساكن فى العروبة عشان تبع نفس المجلس المحلى للنظام القديم- وده يعتبر من النظام البائد فلازم تلبس قضية فساد)

2 . ومجموعة احنا اسفين يا صلاح (صلاح هنا ضمنيه لمجموعة كبيرة من الشخصيات اللى فى معظم الاحيان لا تستحق الشفقة فما بالك بالاسف بس كل واحد حر والاسف مكفول)،

3. ومجموعة حزب الكنبة (بتوع كيس المكرونة بقى بكام و التلفزيون المصرى سماهم طالبى الاستقرار)،

4. ومجموعة الاجتماعات والتصفيق: وال"انا" وبالأصاله عن نفسى ومجموعة "النظام الكخ كخ والثورة دح دح واحنا اول امبارح قرينا "يوم ولدت مصر...وهم معروفين بما نسميهم الترانسفورمرز او المتحولون..

 5. مجموعة اللواء زيد من امريكا بيقول (على فايسبوك) والناشط بطوط من انجلترا (بيكلم عن لسان المتظاهرين امام ماسبيرو)  بيقترح والشيخ فلان من مش عارفين فين الحقيقة ينوه عن المواطنه....

مجموعة ابو بلاش خده كله.. تيجى كده على الشمال-----انتم لا تمثلونى برضة

احب اوجه رسالة لكل اصحاب اللسان الحلو اللى مش دافعين من جيبهم حاجة واول حاجة ناويين يعملوها يوم ماتقع هاياخد بعضة ويطلع على اول طيارة ده اذا ماكانش هو هناك اصلا... احب اقولك..طير انت لو سمحتوا راعوا ربنا فينا.. اجتماعات الاصدقاء والاحباب والتصفيق الحاد اعملوها للأصحابكم مش على حسابنا ...احنا محتاجين ناس امينة ومحترمة مش كل اللى فارق معاهم الكاميرا ولقب الدكتور والدكتورة وتعيينات لجنة الدستور والتواجد مع المجلس العسكرى والنجومية والاخبار والخ الخ والمزيد من التصفيق...

مجموعة بلا اسم مناسب لها وشوكوا فى الحيط وارفعوا ايدكو فوق: -----انتو خسارة فيكو الكلام

هى مجموعة نهد  ونحرق ونقطع طريق ونولع فى اسم ونجرف ارض ونهد الكنيسة...معلش انت مجرم بمعنى انت لا تعنينى انت تعنى السجن اللى من حقك ومن نصيبك... فانتم...

مجموعة نوّحلى شكرا: او للتبسيط الطملى (فعل اللطم على الخدود عادة مصرية بحته)

انتم لا تمثلونى خالص

وهى مجموعة معروف عنها النواح والعياط والتهويل والاشاعات والبكاء والعويل والدم التقيل واليوم السابع والتشاؤم ويطلعوا...ابونا...

و اللى فاكر ان الوقت الى احنا فيى هيبقى سهل وهيخلص فى يومين وبمنتهى السهوله اقولك "سورى" انت متفاءل اكتر من اللازم او متسرع وعايز تخلص...

قصر الكلام اللى يحب ينزل يبنى ويشمر ويساعد عشان البلد حالها يتصلح اهلا وسهلا واللى حابب يدخلنا فى متاهات دستورية ومشاكل قانونية واشاعات البلطجية وجيش العواطلية وميكروباسات الخطافين وولاد الحرام وهدامين الكنائس وغالقين البورصة والاقتصاد اللى هيقع وعدم استعدادنا لأم الديموقراطية احب اقول...احنا مستعدين والنبى..اقوللك اقطع انت التذكرة واحنا هننزل نبنى ونعلم ونحاول ونصلح ونعافر واحنا ونصيبنا بقى

يا صابت يا اتنين عور وساعتها احنا هنبعت نجيب مبارك وامن الدولة والكرباج واتلسوع يا معلم ....

اما انا فاخترت من يمثلنى اخترت الخباز الفصيح اللى ظهر على الفيسبوك واخترت "ام هند" السيدة المصرية اللى يتعافر عشان بيتها  وعمر ما املها خاب فى مصر فى اسود الظروف..انا الناس دى بس اللى تقدر تكلم باسمى...

تحيا مصر...

واخيرا وليس اخرا احب اسيب هنا كلمتين قالهم بديع خيرى من قيمة قرن ونصف القرن عشان الكل يمسك نفسه وينشف شويه ونتلحلح :

شد الحزام على وسطك غيره مايفيدك                                  لابد عن يوم برضه ويعدلها سيدك

إن كان شيل الحمول على ظهرك يكيدك                                أهون عليك ياحر من مدت إيدك

ماتيالله بينا انت وياه ونستعين ع الشقا بالله          واهو اللى فيه القسمه طلناه واللى مايجيش انشا لله ما جاء

مادام بنلقى عيش وغموس يهمك ايه تفضل موحوس  ماتحط راسك بين الرؤوس لا تقوللي لا خيار ولافقوس

حقولك ايه واعيد لك ايه كله له آخر                                       دى خبطة جامدة وجت على عينك ياتاجر

يا وحستك دلوقت لاوارد ولاصادر                                           يحلها الفين حلال ربك قادر

قل لي في عرض النبي ياحسين رايحين نلاقيها منين ومنين     والاش متجوز اثنين يادنيا غوري جاتك البين

شوفوا البخيل يفضل منحوس ولو علقوا على بابه فانوس          فلوس دي ايه سكت ياجاموس هيه السعادة في غنا النفوس

شد الحزام على وسطك غيره مايفيدك                                  لابد عن يوم برضه ويعدلها سيدك

إن كان شيل الحمول على ظهرك يكيدك                                أهون عليك ياحر من مدت إيدك

ماتيالله بينا انت وياه ونستعين ع الشقا بالله

واهو اللى فيه القسمه طلناه واللى مايجيش انشا لله ما جاء مادام بنلقى عيش وغموس يهمك ايه تفضل موحوس

ماتحط راسك بين الرؤوس لا تقوللي لا خيار ولافقوس               قرب شيلني شيل لا تقوللي كتير وقليل

عمر الشدة ماتطول بكرة نهيص زى الأول

القاهرة...مارس 2011

!! من ائتلاف شباب انسف حمامك القديم ...بس من فضلك سيبلى البانيو

من بعد مقالة التفاؤل اللى قراها حوالى 10 افراد اللى هما تقريبا نفس عدد الناس اللى عايزة تتفاءل (مش حتى المتفائلين- هما لسه بيحاولوا) حصل حاجة غريبة جدا فى البلد. طبعا واحنا كلنا قاعدين منجعصين على الكنبة ونشاهد الاخ العقيد علاء الاسوانى وهو يثبت للعالم ان البليغ فى الكتابة ممكن يطلع كمية كراكيب من بقة...عرفت بعد كده فشله فى طب الاسنان فهو تقريبا فشل عشان كمية الكراكيب اللى فى بقه صعب ان طب الاسنان يتنباها.. المهم، على ان ردود الدكتور احمد شفيق كان وحقيقة الامر ماتعرفش تفهم بالظبط عايز يقول ايه بالرغم من محاولات العقلاء من الدكتور عمرو حمزاوى و الدكتور احمد كمال ابو المجد وساويرس مساعدته للخروج سالما الا ان "فى حاجة غلط" حصلت فا الدكتور شفيق زى مايكون هنج..طبعا جه استاذ الاستفزاز علاء الاسوانى رفع عندنا الضغط لدرجة ان اظن انه واجب نطمّن على ساويرس لأنه بالقطع اكيد زمانه بيعانى جلطة..وفى وجهة نظرى اظن ان القعدة الحلوة دى كان لازملاها حجرين تفاح واتنين معسل سلوم وطبعا استاذ ال سى ديهات مرتضى منصور ولو اتنين بملايات لف كانت هتبقى فعلا حلقة كدة...مش بعيد كنا عملنا "بارت 2" ..وهنا يحضرنى ان لو الأديب العالمى بيكلم كدة ده ساعتها احب انحنى احتراما لكل سائق ميكروباس انه بس بيشتمنى فى الشارع...

بس الصراحة اكتر شئ حقيقى مستفز، انه قعد يتكلم فى اتهامات دون اى تصور لأى مستقبل انشالله حتى بعد بكرة..والانكت انه بيقول "الشعب عايز ، الشعب عايز" على اساس انه هو اللى بيكلم عن الشعب ..معلش الشعب لما بيعوز بينزل يقول مش محتاجين حضرتك تستخدمنا فى اللى انت شخصيا عايزه! ولم يتعد الامر مرحلة طخالتى اللتاتة" واستهزاء ومقاطعة واستفزاز لكل الحاضرين بما فيهم المعارض حمدى قنديل وساويرس والغلابة اللى قاعدين للساعة اتنين  باليل من المشاهدين اللى ابتدوا يحسوا ان فى فقرة- "اللى حصل ده اتزاع لو عايز تزيع قل زيع"..

المستفز اكتر واكتر انه الناس اللى زيّي اللى كلنا اتشنيرنا(اى اتفحتنا اى اتضربنا اى اتسحلنا) فى التحرير وقفنا بقلب جامد وقلنا "مش هيبقى فيه فوضى ده مصر دى ولادها الناس المثقفين مش هايسيبوها- امشى انت بس واحنا هنيصرف" وتفاجأ ان طريقة النظام السابق استفزاز وسخف وديكتاتورية رأى وصلت لدرجة واضحة استفحلت فى الحلقة"..

امنا نوصل لكمية الفتى فى عمايل الدستور زى الكيك كده؟ دستور ايه ده اللى هنعمله فى يومين، دا انت لو هتدمس قدرة فول مش هتعد يومين! ولا هو متهيأله انه اى دستور موجود هيتقال عليه اه . داحنا بقالنا شهر ونص بنكلم فى 6 بنود...ولا داهية لايكون عايز يرشح نفسه.

قصر الكلام انا قررت بما ان الموضة اليومين دول انه يلا نعمل بيان نقول مطالبنا  انا فعلا هكتب مطالبى وهحاول اوصلها... انما اسلوب الشجب والادانة من وضع الكنبة خلاص...خلصنا...

1مطالب فورية:

- عودة اللأمن لكل انحاء البلاد مع محاسبة الخارجين عن القانون (ويا ريت تكون بطريقة الكفراوى)

- رجوع المدارس والجامعات والمصانع والمصالح الحكوميه والخاصة مع تأمينها اذا ما احتاجت لذلك ..ويرجى الاستعانة بأى حد حتى لو هنعمل دوريات لجان شعبية فى غير اوقات العمل احنا مستعدين. (قصدى انا)

- الرجوع عن اى مظاهرات فئوية مع تكليف المختصين فى الوزارة واصحاب المصالح البحث فى شئونهم.

- ان يستمر القضاء فى عمله للبحث فى قضايا الفساد والخروج عن القانون

- البدء فورا فى قافلات انقاذ للمتضررين بحملات واسعة للتبرعات المالية والعينية.

-2  الانتخابات-

- الانتخابات بالرقم القومى ودون اى اجراءات غير مفهومه فى اى انتخابات تتعلق بالدولة

- فتح باب الانتخاب للعاملين والمقيمين المصريين بالخارج وهم 5.5 مليون (بعد ما شيلنا ال1.5 المزنوقين فى ليبيا)

- ان يتم الاعلان الفورى عن ميعاد استفتاء الدستور والانتخابات بجدول زمنى مسبق.

- ان نبدأ بالانتخابات الرئاسية فى تاريخ لا يتعدى سبتمبر المقبل ( مجلس رئاسى ايه داحنا بقالنا شهرين بنختار رئيس وزرا)

- ان تطلق حرية الاحزاب بما يتفق من الدستور، والقانون وحقوق الانسان

- الغاء قانون الطوارئ حين استباب الامن (وده على فكرة مش دلوقتى)

- على رئيس الجمهورية المنتخب القادم ان يرشح 70 عضوا للجنة تأسيسية من مثقفى البلد تشمل جميع طوائفها وتياراته- يتم الاستفتاء لاختيار 50 عضو ويعين اساتذة متخصصين بالقانون الدستورى لوضع دستور جديد.

- ان ترجأ (تتأجل يعنى) انتخابات البرلمان الى سبتمبر المقبل حين اعطاء فرصة لانشاء الاحزاب الجديده وخلق جو تنافسى حقيقى فى انتخابات نزيهة يراقبها القضاء

- الافراج عن جميع معتقلى الراى- بمعنى اللى محبوس اونطة انما تاجر مخدرات ولا ارهابى ده ماليش فيه..مع الاعتبار بالنظر قضائيا فى امر المعتقلين السياسيين.

- ان يكون جهاز امن الدولة اسم على مسمى بحيث ان يكون شغله الحفاظ على البلاد ضد الارهاب مش صنع الارهاب وان يرفع هذا الجهاز يده عن التدخل فى الامور المدنية والانتخابات المحلية مع احترام الحريات الشخصية بنص القانون.

افكار بعيدة المدى لتبدأ الان:

- ان تقوم الوزارة الجديدةبتأهيل البلد للمرحلة القادمة بمساعدة المجتمع المدنى لادراك المشاكل التى عانتها مصر:

- ان تقوم الخارجية المصرية ببذل الجهود المضنية لادراك اتفاقيات حوض النيل وعلى المجتمع المدنى ان يقوم بكل ما يستلزم منه وعلى رأسها ترشيد استهلاك الماء.

- ان تقوم جميع الجهود المدنيه لمساعدة الجيش بأداء دورة الاصلى فى حماية الامن القومى المصرى فى تلك الظروف والتى تشكل خطرا على الحدود الشرقية والغربية والجنوبية

- ان تقدم كل المساعدات لكل العائدين من ليبيا وفورا

- ان تتكاتف كل منظمات المجتمع المدنى مع الوزارة لتقديم المساعدات الحقيقية والمطلوبة فورا كانت ماكانت من تبرعات المالية والعينية وبالمجهود والمساعدة والمجتمع المدنى على اتم استعداد

- ان يقوم المثقفين والعلماء والقضاه واصحاب الرأى واساقفة وشيوخ الازهر والمواطنين برسم صورة وخطة مستقبلية لمصر  بعد 5 سنوات و10 سنوات و 20 سنة...فى المجالات العلمية والاقتصادية والبحث العلمى والتنمية على كل اصعدتها مع اتاحة الامكانيات المعلوماتية من كل الاجهزة المختصة. وان يستغل طلبة الجامعات فى ذلك.

- ان تدرك اجهزة الاعلام دورها فى التنوير وليس التجريح والمسخرة

- بالنسبة للقنوات الدينية ان تكون مصرح بها من قبل الأزهر الشريف والكنيسة.

- ان ينفذ الاعلام الارضى والفضائى دوره فى اعطاء سبل للاصلاح ولعب دوره كجهاز للاتصال بين الشعب وصنع القرار مش نجيب اعلانات منين ( ممكن بالمرة شلبوكا يطلع معاش ومرتضى منصور حد يلاقى عليه سى دى)

واخيرا ان توكل المناصب للاكفأ بشرط نزاهته (خلاص بقة مش هناكل من نوع عز ابو مخ دهب وزمة بلاستك)..

وارجع واقول المجموعة المتبنية فكرة التعميم ده فى هدم اى حاجة فى البلد عشان كانت عايشه فى عصر مبارك احنا بنقول فكرة انسف حمامك القديم بس هنسيب البانيو

وخلص الكلام...سلام

القاهرة...مارس 2011 يوم من ايامك يا مصر