هاتوا بلدنا

وبعدين يا جدعان!!

واخرتها ايه؟ لا اللي قاعد فيها مبسوط ولا اللي سايبها مبسوط.. لا اللي قاعد فيها مرتاح ومتطمن ولا اللي طفشان ضامن يومين قدام…

مابين "ثورتين" ومش ثورتين واحلام ناس وخطط ناس وحياه ناس عماله كده بتتقش زي اللي بيحفر في ارض ويدوس علي اللي فى طريقه.. محدش سلم..

الصوت المسموع هو صوت الزعيق والنهيق والدعوات للقتل والشنق والقرف.. تبرير الشر بقا عاده يوميه عاديه.. التصالح مع الواقع الزباله  بقا اسمه استقرار..

اعتيادك علي ريحه الزباله بقا اسمه تواضع..سكوتك علي التحرش والاغتصاب بقا فطنه.. النصب والنهب بقا ذكاء..التشفي بقا موضه ومدعاه للفخر.. الدم بقا لون غامق عشان الاحداث والقهر والظلم بقت اخبار عاديه..حتي قطع الكهربا والوقوف بالساعات فى الطرق بقا ذريعه لاطلاق النكت.. ويقولك شعب ابن نكته..دا حتي التاريخ والاثارات ماسلمتش منكم بقا سرقتها فهلوه وماهياش حرام!

والكذب اعلاميا وحياتيا بقا عاده متاصله حلت محل الحقيقه او حتي المهنيه.. واختيار من هو اكثر قسوه واقدر علي القهر حتي مع الفشل اصبح افضل قرار وتسلم له الايادي..

ايه يا جدعان.. ايه بقا..

مفيش كلمه حق من الناس اللي مش لازم ليها موقف بس ليها عقل!! هو دا شكل بلد علي مشارف التطور؟ هي دي بدايات التنميه؟ هو دا شكل الاستقرار؟ هي دي دبلوماسيه جذب الاستثمار؟ هو دا المناخ الامن للشباب والاطفال؟ هي دي الحضاره والتقدم اللي جاي؟

اليس فيكم رجل رشيد؟

الاخوان واراجوزهم خلاص..بح يا ناس… انتهوا.. اللي بتعملوه دا هيجيبلنا اللي اوسخ منهم .. ودا حاصل فعلا. الناس لا عادت بتتاثر بقنابل ولا حتي بتتاثر بموت ضباط..والقايمين عالبلد ولا فارق معاهم..

احكام اعدام بتتوزع بالكيلو وشكلنا قدام العالم بقا مسخره..وقوانين تنظيم مظاهرات وتسجيلات سخيفه ومنحطه لمكالمات شخصيه..

دا حتي هيفاء وهبي مانجيتش منكوا

هو فيه ايه؟؟ فين الناس الكويسه طيب..الناس الكويسه يا بيطفشوا يا بيموتوا سواءا بقا فى مظاهره, باثار تعذيب, مثلجين علي جبل, حادثه عالطريق, برصاص عصابه علي السكه, بقنبله بخطا في مستشفي, او حتي بكومه سكر.. القصد بيموتوا..حقهم مبييجيش اجلهم بييجي..والناس ولا بيتهزلها جفن..

كفايه استعباط بقا.. ليه كلنا مابنعترفش اننا غلطانين! اللي عملوا الثوره الاولانيه غلطانين انهم اندمجوا فى حلمهم بالميدان من غير التفكير في الباقي والاخوان هووووب جم وكلوا التورته وبعدين جم بتوع الثوره التانيه يخلصوا من الاخوان ويستقروا يقوم ييجي اللي كانو مستنيين اللحظه وهووووب ..

طب معلش.. خدوا السلطه وهاتوا بلدنا.. اللي عايز السلطه ياخدها ويرجعلنا بلدنا بقا..

لا دي شكل ام الدنيا ولا هتبقي قد الدنيا...

المصري والصرصار وصراع البالوعه

من يومين كده بالصدفه لقينا برنامج الدكتور مصطفي محمود وبعد ما قعدنا نتذكر ازاي موسيقي التتر ساهمت بشكل كبير اننا مكانش عندنا اي رغبه لمشاهده البرنامج نظرا للرعب اللي كان ينتابنا واحنا صغيرين وكده.

المهم, سمعنا مقطع من البرنامج وكان الدكتور مصطفي محمود بيتكلم كيفيه التاقلم مع البيئه وعدم معاداة الطبيعه ولا كائناتها حتى المضر منها. الانسان اخترع المبيدات مثلا للقضاء علي الحشرات كلها المضر والكويس, اللي بيفيده واللي نوعا بيضره واللي بيضره. وانتهي بيه الحال انه لا تخلص من الافات والحشرات اللي اتعلمت بشكل فطري التاقلم علي الوضع  الجديد بل وازدادت مقاومتها كمان .. الانسان بقا لا منه تخلص من الافات بشكل نهائي بس اتسرطن من المبيدات..

العالم المتقدم بدا فعلا وبعد ٢٠ سنه من البرنامج انه يشوف حلول صديقه للبيئه تبعد الخطر وماتعاديش البيئه. نفس برضه الفكر الحالي لبلاد العالم اللي بشكل عام لا يخلو من مشاكل ونفسيات مريضه انه يتكيف مع الاخر .. فكل واحد يحترم التاني مش لازم يحبه ولا يتصاحب عليه انما من غير اذي..

  العجيب كل العجب بقا اننا اكتشفتا اننا لم نتخطي مراحل الجاهليه فى الفكر دا.. فاستخدمنا للمبيد الحشري استخدام

من لايخشي غدا يعني.. لا الصراصير بتخلص واحنا بيجيلنا تسمم محاصيل وميا وهوا..

علي نفس السياق الطريقه المثلي مثلا للتخلص من حيوانات ضاله هو وضع السم في اكل.. افترا بس !! الكلاب عمرها ماخلصت عشان سممت كلب منهم. 

اعتقل ناس عشان الناس التانيه تسكت. اقتل اكتر .. اتحرش واغتصب….طبعا مفيش اى داعي للتطرق لقضايا الشذوذ الاخيره ..باعتبار ان سجنهم سيجعل منهم رجال الهوي ولا ان القضيه ستردع اخرون عن ميولهم الجنسيه!

احنا فى اعتقادنا ان المغالاه فى العقاب او كتره القتلي او حبسهم او اذلالهم ستنهي على ظاهره مضايقانا.

ماهو لو كانت نفعت مع الصراصير كانت نفعت مع البني ادم..

كتير من الناس اللي اعرفهم بيدافعوا باستماته عن "الدوله" وبيعيبوا على ٢٥ يناير انها بتحاول تكسر دا نظرا للتردي الواضح لكل اوجه الحياه والممات حتي في مصر.

الحقيقه ان ٢٥ يناير مكانش غرضها كسر الدوله ولا هي نجحت اصلا فهي ثوره فشلت وانتهت.. المكتسب الوحيد والكئيب فى نفس الوقت هو المكاشفه اللي الثوره دي عملتها.. هي بس كسرت المالوف وكشفت ان "الدوله" بمفهومها دا اصلا مش فيه خلل.. الدوله فى مصر متمثله في ٣ حاجات .. ١- من على راس السلطه ومن حوله ومن وراءه  ٢- التامينات والمعاشات ٣- الداخليه.

الباقي بقا شغال علي حسب امكانياته وفي ناموسه ونظامه الخاص حسب ما هيعرف يمشي اموره مع الثلات اركان دول.. احنا ماعندناش اى معلومات عن اي حد برا الدايره بتاعنتا وماشي فى نفس الحاره.. لا نعرف مين في سينا وبيعملو كده ليه ولا نعرف مين فى اسوان ودبحوا بعض ليه ولا ليه المناطق العشوائيه عشوائيه.. كل اللي نعرفه انك لو في مدبحه فى اسوان وكلمت الامن هيقوللك انه نازل يفض مظاهره اخوان ومش فاضي لنجده اي حد.. 

اذا فاجهزه الدوله دايره ترش البلد كلها بالمبيد بيموت ناس والصراصير هتستمر ليوم الدين.. هما كائن هيستمر الحل هو انك تمنعه من دايرتك مش تحاول تقتله لايتوحش ومقاومته تزيد والمبيد هيقتلك فى السكه برضه..

 ةسنستمر فى قاع البالوعه حتي يمن علينا الله بقليل من العقل والانسانيه لحل مشاكلنا لا بتسميم الكلاب  بل باحتوائها بعيدا..