عن الابوه والامومه واشياء اخري- قلبي معاكم

تصادف ان ربنا رزقني بطفل في نفس شهر انتقالنا للعيشه المؤقته برا مصر. وبناءا عليه فاغلب خبرتي "بالامومه" هي من المجتمع "الاخر" اللي احنا فيه.. بدانا مؤخرا الاحتكاك اكتر والتعرض لعائلات واساليب ربايه الاطفال في مصر .. يعني نظرا ان ابني بيكبر فبيتحول علاقتك بيه من مجرد تلبيه لمطلبات اساسيه لطفل رضيع لصحبه بني ادم.. كامل الوعي والادراك والاهليه بس حجمه صغير…

خلينا نبدا ان تربيه طفل في مصر مش بس مهمه صعبه لا دا تحدي مستمر .. لانك علي طول دائم الصراع مع نفسك واهلك ومجتمعك وعائلتك وابنك شخصيا..

اصلا كلمه Parenting مالهاش اي ترجمه حرفيه عربيا. ترجمتها امومه وابوه .. يعني اللقب اللي بتكتسبه اما الام بيولوجيا تجيب طفل والاب رسميا يكتبه علي اسمه.. 

اسلوبك في كونك Parent او "ولي امر" دا مش موجود في ثقافتنا الا بس لما نعوز نرمي اللوم علي عائله مش عاجبنا تصرفات عيالها واحنا عاملين زيهم..

اول ما بتتجوز, بتبدا نداءات العائله والمجتمع عموما في توريطك لانجاب طفل. طبعا مع الضغط عليكي ومحاوله لاغرائك ان "ماما" هتاخد بالها منه وهتراعيه. وانت ممكن تستمعي بحياتك. طبعا ربنا يخلي ماما .. بس ماما لو عايزه بيبي ممكن تجيبه هي. مفيش مشكله من طلب المعونه من اهلنا انما في الاخر الطفل دا له ام وله اب وهم المسؤولين عنه ماليا واجتماعيا وتربويا وشكلا وموضوعا.. ودينيا حتي..

ماديا بقا.. يتميز الكائن المصري باثقال العائله الجديده ماديا لان الطفل لازم ييجي كامل من مجاميعه والام بتبقي نفسها اكيد.. بس جزء كبير هو ارضاء المجتمع ورسم صوره ان الطفل يكون في نفس المستوي اللي العيله فيه.. طبعا الهذيان دا مالوش نهايه.. يعني بتخش بقا في سباق ابدي مش بس ماديا لا دا هلاك للطاقه كمان.. ويدخل فيه اسم الحضانه واللبس ال"براندز" للاطفال والمربيه والشنطه اللي هتشيل الغيارات.. فى الاحياء ااقل حظا طبعا بيبقي لازم غرفه الطفل تبقي جاهزه وسبوع واكل وبلاوي برضه.. وانا مكدبش عليكو برضه كنت ومازلت باشارك في جزء من هذا السباق احيانا لحد ما ربنا بيمن عليا بالهدايه اللي هي تتلخص في سب كل الاصنام الاجتماعيه اللي احنا حطيناها دي..

اما تربيه الاطفال بقا.. فانا صراحه اعجز احيانا كتير عن فهم ما هي المتوقع من اطفال رضع بتحضر سينما ميدنايت وصلاه قيام ليل وتقعد في قعده شيشه وتبقي نايمه فى النوادي لوش الصبح.. تاكل اي عك وتشرب اي شرب..

المهم تاكل كتير.. دا اهم شئ.. وترجع تشتكي من الاجيال الجديده..

الاجيال الجديده حضرتك عندها فيسبوك مفتوح من سن ٣ سنين والتليفزيون شغال لالهاءهم علي مسلسلات مش بس محتواها احيانا مايناسبش سنهم لمحتواه الجنسي انما اللغوي والزعيق والجعير والذوق المتدني.. الاجيال الجديده برضه معرفته بالكتب من خلال المدرسه ٩٠٪  من الوقت ومعرفته بلعب تنمي ذكائه (حتي لو بشويه خشب وشويه رز من المطبخ) هي ان يكون عنده مسدس او بلاي ستيشن..

اما بقا الاباء والامهات فمقدرش الوم عليهم مجتمع قاس جدا. لان الاهالي مجبره علي الشغل وبناءا عليه مضطره تستحمل ترجع عن اسلوبهم اللي يتمنوه. غير كده بقا -ودا نقاش دار معايا كتير- هو انهيار الحياه الاجتماعيه للاباء والامهات اللي عايزين يعملوا نظام يمشي عليه العيال.. فيتحول الحال اما انك تركب دماغك وتمشي عيالك علي نظام ممكن تلتزم بيه ٧٠٪ من الوقت علي احسن تقدير او تمشي بفيض الكريم كده.. ينام وقت ماينام ويصحي وقت مايصحي وينام في عربيه الطفل لحد ماتاخد قعدتك مع صحابك.. اصل ان مكانش كده انسي ان ليك صحاب هتخرج برا محيط ماجيك جالاكسي.. او تكون مضطر للمبيت عند العائله او ان يكون في مربيه مقيهم اللي هو مبلغ ميزانيه مش بطاله.

غير دا المجتمع بيحاول يختبر صبرك في كل لحظه.. مرور زفت كهربا زفت ولو واحده قررت ترضع طفل تتمسخر ان ماتمش التحرش بيها ومفيش ليها مكان لتغيير الطفل اللي ريحته مضايقه الشعب اللي نضيف بطبعه..

الامثله لا تعد ولا تحصي والتحديات فوق المحتمله.. وخصوصا للامهات العاملات اللي مطلوب منها كل حاجه كل الوقت.. تشتغل زي الحمار وتبقي ام زي امينه رزق وزوجه مزه جدا وابنه باره مالهاش تفتح بقها لان هو دا الموجود.. اما لو مفيش ماما بقا.. فمعاكي ربنا.. 

شوفوا.. العالم المتقدم مبقاش متقدم عشان حظه حلو.. الناس دي بتستثمر فى الاطفال من اول يوم..  خلونا نقرا للعيال.. نلعب معاهم بحاجات بسيطه.. نخليهم يمشوا حافيين .. نخليهم يعكوا ويلموا ورق شجر من الشارع. نقفل التليفزيون.. نخليهم ياكلو قد مايقرروا هم انهم شبعوا..والله العظيم مفيش طفل مات من الجوع وهو عايش مع امه. خلينا نسيبهم يعيشوا طفوله بسيطه عاديه .. يناموا اما الشمس تغيب ويصحوا اما تصحا..يعني او نحاول

خلونا نبسط حياتنا بعيد عن الادعاء بالترف الزياده.. احنا بلد مش لاقيه كهربا مفيش فايده من الفشخرا الكدابه دي..

ارحموا من في الارض يا جدعان .. يمكن الجيل اللي جاي ينصلح حاله فعلا..

الي كل الابهات والامهات في مصر.. حتي انضم اليكم.. قلبي معاكم!!