كم اساوى عندك؟؟

النهارده يوم حزين.. يوم فيه صمت غريب.. صمت اكتئاب وحزن واسى.. صمت بس شايل كمية حزن احيانا ويأس احيانا وغل وكبت ورهبة وخوف .. الامل النهارده مشواره بعيد.. ومش باين على مرمى البصر لا بمنظار ولا من غير منظار..

النهارده الكل متلخبط ومحدش فاهم حاجة.. ووقت اللخبطة بيحلّى الغلط والهرجله وعشان كده انا النهارده مش عايزه اتكلم..

النهارده باسبور ناس كتير طلع بره الدرج.. وناس كتير هتروح بكره تقدم عشان تطلع باسبور. النهارده المرور كان هايل... والطريق فاضى وهادى بس هدوء كئيب ومريب وحزين.. الزحمة فى القاهره من سماتها.. تكرهه وتشتاقله احيانا.. النهارده صمت القاهرة بيوجع الواحد والكلام مبيوصلش للسان ولو وصل مبيعديش للاذن وان وصل لا يعيه العقل..

اللى حصل امبارح مؤامره داخليه.. ولكن انفجارها كان متوقع.. اللى حصل امبارح كان هيحصل فى اى اعتصام... المفاجأة هو ان اللى حصل اتوضب له كويس قوى واستثمار الغضب فيه كان ناجح جدا...

والحصيلة النهائيه من الشهدا عالية والشهدا الاحياء اللى فقدوا اى امل او عزيز او روحهم انكسرت اكتر..

اللى حصل كان خسيس وكان كئيب وكان شيطانى بكل المعانى..

عارف ليه.. مش عشان الناس بس اتهاجمت بوحشية انما عشان استثمار الموت.. وتحريض "المواطنين الشرفاء" للدفاع عن جيش بلدهم ضد اولاد بلدهم! جبروت ما بعده  جبروت... هو الصراحة يصل لمرحله الكفر احيانا.. مش كده وبس انما تجار السياسة والموت ووجودهم على شاشات التلفزيون فى دعايات رخيصة.. لم يكلف احدهم نفسه فى النزول للتحدث مع احد..حتى رجال الدين.. وانا اقدس اديان الله جميعها.. ينأى جبين اى مؤمن منهم.. فلم يظهر احدهم لمجابهة الموقف بل تسارعوا فى مكالمات تلفونية تزيد استفزاز الناس وبدل من ان تزيد ايمانهم تزيد تطرفهم وغضبهم واحتقانهم...بل وتحثهم على مجابهه بعضهم بعضا بقصص لم يروها رؤى العين.. وانا مش فاهمة ايه نوع رجل الدين (على الناحيتين على فكره) اللى يحث الناس على العنف لهذا الشكل من غير تأكيد.. شئ مقزز!! اقل ما يقال عليه مقزز...

هل الطبيعى اننا نبقى عادى بنشوف استديوهات الهوا تهاجم كده؟ واحنا عادى..

انما سؤالى هنا..كم اساوى عندك؟؟ سؤال لازم تطرحة على كل معارفك.. اهلك قرايبك اصحابك معارفك زملائى فى الشغل..هل اساوى عندك اكتر ام يساوى مسجدك او كنيستك؟؟ لاحظ انا لا اخيرك بينى وبين دينك.. انا بخيرك بين انسان وجماد.. انا قيمتى كانسان ايه عندك؟ بصرف الظر عنى وعن تصرفاتى.. عن كونى بتكلم ازاى وباكل ازاى وبلبس ايه وبصلّى ولا لأ؟ وبصوم ولا لأ؟

انا بالنسبة لك لو حصللى حاجة هتزعل عشان انا بنى ادم ولا عشان انا ابن دينك..

يعنى لو انا غلطانه هتسامح فى اذيتى؟ هتستحل دمى؟ يعنى لو اتظاهرت عند سفارة ولو قعدت فى ميدان ولو اضربت عن شغلى ولو قعدت عن ماسيبرو واتهنت واتضربت واتقتلت، هفرق معاك؟ ولا مسجدك وكنيستك ومصلحتك ومصيفك واجازتك اهم منى؟؟

اسأل نفسك السؤال ده؟ لو هتسامح فى اذيتى متنصرنيش عشان انا ابن دينك ومش عشان انا بنى ادم.. مش عايزاك تعرفنى ولا تقف لى ولا تدافع عنى.. عارف ليه.. لأنك قريب هتحصلنى لأى سبب اّخر!

اللى عايز يعرفنى يقيّم ادميتى وميقيمش تدينى! اللى عايز يدافع عنى يدافع عن بيتى وعن اهلى..انصر انسانيتى ولا تنصر عقيدتى..فالله كفيل بنصر دينه اما نحن فموكولون بالدفاع عن ادميتنا وانسانيتنا التى كرمنا الله بها.. اما الله فكلنا على نفس البعد منه! قربك من الله يخصك ماتحشرناش معاك..

انصر دمى وعرضى وبيتى واهلى وشخصى..لو مش شايف انك مقتنع متعرفنيش لأنك متهمنيش.. ويوم العوزة مش هلاقيك..

النهارده معنديش حاجة اقولها لابنى.. معنديش! مش عارفه هدارى اليوم ده عنه لما ييجى ولا هيكون الايام الوحشة راحت لحالها وده هيبقى يوم اسود وعدى! النهارده المستقبل مش باين بس هييجى..

ارجوكم لو اقدر ارجوكم.. فكروا فى ان الناس اللى كانت ساكته على تبرير العنف ضد غيرها بدافع حفظ الامن هييجى عليها الدور.. فكروا ان اللى حصل ماكانش فتنه طائفية ده كان اغتيال لمعانى الانسانية.. كانت محاولة ناجحة لاخراج حيوانية البشر.. ارجوكم كفايه بقى اننا خايفين نرمى الغلط على الغلطان وبس نحمل المسؤوليه بناءا على مشاعرنا.. اللى حصل لا كان فتنة طائفيه ولا كان اجنده خارجية .. اللى حصل كان مخطط داخلى خسيس مصلحتها الفوضى ومجاميع اكبر تدافعت بحكم التحريض والشحن..

خلينا نكون واقعيين.. اللى حصل كان مسيره هيحصل فى اى من الاضرابات اللى حاصلة من اشهر دون رد... دون اصلاح.. اللى حصل لو كان جرى فى اى فئوية اخرى ماكناش هنتأثر كده..

عايزة افكركو بضحايا 25 و28 وموقعة الجمل وكنيسة القديسين والعمرانية قطورات الصعيد واحداث امبابة واطفيح والعريش والسفارة الاسرائيلى والمنيا والجنود المصريين على الحدود..عايزه افكركو ب 12000 مسجون حريى فى 9 شهور...من لم يتحرك لانسانية كل هؤلاء فلا تتوقع منه ان يتحرك الان..

بالمناسبة.. الاخت "سليمة" تعيشوا انتو!

اوجد الاختلافات الثلاث بين الصورتين؟

بالمناسبة مفيش صورة فى المقال عشان بس الناس متدورش... ده نفس المقالات المملة اللى انا بكتبها.

مش عارفه ليه صورة اجتماع المجلس العسكرى مع ما تم تسميتهم ب"القوى السياسية" اعاد لذهنى بشكل قوى جدا اجتماع عمر سليمان بذات نفس القوى السياسية برضه.. ده يمكن حتى فى نفس المكنة!

الفرق الوحيد هو ان المجلس كان حاضر كلّيته بس القوى السياسية اللى راحت وقت سليمان هى برضه اللى قعدت اول امبارح..

صحيح ناس كتير مش شايفه هو ايه مشكلة البيان اللى اتمضى عليه وطبعا ده حقهم الشرعى والطبيعى فى الموافقة والاعتراض.. انما خلينا نقول انه انا لما كلفت خاطرى وقريت البيان انا معترضتش على نقاط النقاش بس بالنسبة للحلول فالحقيقة ان البنود يعنى صايصة خالص وانا مش عارفة هما اتفقوا على ايه.. ده كل النقط مبهوقة ومش باينلها ضهر من بطن.. يعنى نمسكهم نقطة نقطة كده وده طبعا وجهة نظرى المتواضعة كمواطنه عادية جدا وغبية جدا وغير سياسية مطلقا...

اولا: بالنسبة للانتخابات.. الرد الوحيد عليها هو الرد المصرى الاصيل عليك لما تسأل عن طريق ويرد عليك واحد نبيه يقوللك "هو قاللك فين؟" انا بالظبط حسيت هو ذات نفس الاحساس.. هو امتى ياخواننا الانتخابات.. يعنى هنبتدى انشاءالله 2012 كده وبعون الله ندخل على الشورى وبعدين يقعدوا مع بعضيتهم وبعدين ينقّولنا الجمعية التأسيسية فى حاجة بتاع 3 شهور وبعدين يقعدوا يتعرفوا على بعض ويلعبوا اصحاب يطلعولنا دستور.. ندخل غزوة الصناديق.. وبعدها ننتخب رئيس... حمدالله على السلااااامة.. ده انا نهجت وانا قاعدة.. طبعا انا احب اوضح ان القضاة عندهم اجازة الصيف.. والبرلمان له اجازة برضة وعندك رمضان والحج والاعياد والمواسم يعنى حسبة التلات شهور دول ممكن ترسى على 6 عادى والانتخابات الرئاسية على ماتحصل يكون ربنا افتكر المرشحين كلهم والبرامج بتاعتهم تكون مدة صلاحيتها اتفنيخت..

نحب ننوه هنا ان اللى قلبة على الوضع الامنى او اسكوتر الاقتصاد ينسى وياخد البنسه عشان انت محلك سر لحد مايبانلك صاحب

المادة الخامسة من قانون الانتخابات- قالّك مصر هتنطلق لعصر الانتخابات لاول مرة فعليا بقائمة مختلطة!! "يانور النبى".. هو مبدأ القائمة المختلطة بصرف النظر اصلا عن الفلول والنص فلول معقدة فى الفهم والتصويت والحسبة.. انا ياللّى اهلى صرفوا فى تعليمى بتلخبط فيها.. طب انا اشرحها لأم أحمد اللى عندنا ازاى دى.. المهم قصره.. البند ده هو الجزرة الوحيده اللى تم الاتفاق عليها وطبعا القوى السياسية النميسة انشكحت قوى وبصمت بالعشرة...بالرغم انها ماتمنعش اطلاقا اى مستقل مهما كان انه يترشح.

ميثاق الشرف (اولسو نون از) مبادئ فوق الدستورية.. بقدرة قادر ولا سحر ولا شعوذه.. وافق عليها الاخوان وحزب النور السلفى.. بتقولو مين ياولاد السلفيين.. مييين؟؟ السلفييين!!

لا والله!! طب امال غزوة احد اللى فى ميدان التحرير دى كان مغزاها ايه.. ولا مين شربهم حاجة اصفره؟؟ طيب مين اللى هيضع المواد دى؟طب بلاش! ميثاق الشرف داهوك ايه نوع المبادئ دى.. هل ملزمة ولا غير ملزمة.. مين طيب هيكتبها؟.. ذات نفس اللجنة التأسيسية ولا مجموعة منتقاه من امثال الحاضرين وصبحى صالح والشلة؟؟ يعنى رسونا على برّ طيب.. طب ده بقى اللى مش التفاف على ارادة الشعب.. ولا ام الشعب..ايوه ام الشعب؟؟

قانون الطوارئ- قالّك دراسة الغاؤه.. لاهو احنا لسه هندرس؟؟ يالهوى؟؟ امال الثورة قامت ليه اصلا؟؟  طب مين اللى هيدرس؟ المجلس ولا البرلمان ولا الرئيس الجديد ولا خالتى؟  طب فرضنا درسنا وحسينا انه مالناش نفس نلغيه حاليا هنكمل بيه باعتبار ان العشرة ماتهنش الا على ابن الحرام؟ طب بخصوص ان الاعلان الدستورى انهى الطوارئ اصلا.. مش القرار ده غير دستورى ولا ايه؟؟ طب يا جماعة يا بتوع "الشعب قال للدين نعم" هو ده مش "سورى"  ال..تفاف على ارادة الشعب باعتبار الشعب انه قال نعم لالغاء الطوارئ بنهاية سبتمبر

طب المحاكمات العسكرية..قالك المدنيين ليهم قضائهم الا فى ماهو منصوص عليه فى القضاء العسكرى..

طب انا كمواطنة وزوجة وكده هوك اعرف منين نصوص القضاء العسكرى.. قاللك لو اعتديت على احد من المؤسسة العسكرية او منشأه عسكرية. ايوه بس ده انا لو انخانقت وانا بجرى عند سور الكلية الحربية ممكن اتقفش.. ولو ركنت عند مطار الماظة.. او لو خناقة اشتغلت عند المنصة.. وهلم جرا!! يعنى انا كده مهدده..

قالو برضه ان الاحزاب تلتزم بالتعاون وتنفيذ الاجراءات الامنية.. هو التعاون ده ازاى يعنى برضه!! وايه هى بالظبط الاجراءات الامنية اللى يجب الالتزام بيها.. وبعدين اللى مش هيلتزم بقى هنلغيه ولا ايه..

واخيرا الترحيب بالمنظمات الدولية لمشاهدة الانتخابات.. يعنى بمعنى ييجو كده يقضوا معانا اليوم وكده يعنى انما طبعا لا مراقبة ولا تفتح بقك بنص كلمة.. طب ما بدل عناء المشوار نبعتلهم بيكشر على فيسيوك!

واخيرا يوقع الجميع بالنيابة عن حزبه ودى بقى نكته الموسم.. يعنى اصلا محدش فيهم تشاور مع اى نفر من حزبه بس قام رازع البصمة المتينة.. اما بالنسبة للشولّة اللى ماضية فأنا هسيبكم انتو تقيمو ده بنفسكم بحيث تلاقو الاختلافات اللى مش موجوده بين الاحتماع داهون واخوه بتاع عمر سليمان..

وكما قال الشاعر.. "الهوب ماتخليش الدمعة تفط"

وخلص الكلام.. سلام