فى اقل ٣ ايام الاسبوع دا تقع على الاقل تلات حوادث اليمه. حوادث فى المعتاد لا يجب ان تمر مرور الكرام دون تامل. مش بطلب نهلل ونزيط ونرمي باللوم من غير سابق معرفه لحقايق.. انما تامل.. اتبع احساسك.. التلات ايام اللي فاتوا تم الاتي. دكتور شاب يتوفي متاثرا بحادث مروع على الطريق السريع (وهو ما اصبح شئ عادي لا نتوقف عنده حتى لمعرفه الاسباب او سبل الحل والتانيه اخلاء عزبه من عزبه النخل لاسباب انا مش عارفاها ولكن من دون اعطاء بدائل للساكنين واخرها فقدان ٤ شباب متجمدين فى جبال سانت كاترين..
الاغرب من كده انه بدل التامل فى الحوادث دي وهي بتلخص كل مشكله فى بلادنا بل وبتحطلنا الحلول كمان احنا انشغلنا اكتر بين مؤيد ومعارض "للجيش" اللي هو المفروض مش طرف اصلا فى القضيه الا لاصراره على البقاء فى السلطه..يعنى لم يلم احد الجيش فى اسراب الجنود التى تقتل بشكل دوري على الحدود وهو المسؤوليه الاولي له انما يتم لومه على الانقاذ باعتباره كما يتم دائما الترويج له "انه المؤسسه الاكثر تنظيما فى مصر" طيب ان كان كده ماشي..
خلينا نبعد شويه عن سواد الموقف وعن تسييسه ونحاول بقليل من العقل نفهم ايه الغلط فى حادثه الجبل تحديدا. نظرا لان حوادث الطريق والقبض العشوائي والتعذيب فى السجون والعنف ضد التظاهر والتحرش واباده الفقراء لم تعد اخبارا جديده نقف عندها ونتامل.. اصبحت عاده واخبار نكسر بيها رتابه الايام..
اولا: حوادث الرياضات دى بتحصل فى كل حته (انا عارفه ان ده كلام هيضايق ناس) بس ده حقيقي ..
حوادث التسلق وارده الحدوث انما السؤال هو.. ماهي نسبه الضحايا..يعني انا مثلا اعرف ناس بتطلع كل اسبوع مره ومرتين.. بتحصل حوادث من نوعيه ان شخص يتوفي نتيجه لهبوط فى الدوره الدمويه نظرا للمجهود او يعضه حيوان ضال او حشره مثلا او واحده تهاجم من واحد ويغتصبها. انما بيحصل ده بنسبه قد ايه..
مش معقول ان الطبيعي فى اليوم حادثتين وتلاته مش في رياضه حتي انما في انشطه يوميه عاديه
ثانيا: تخطيط الترايلز (مدقات) وامان الطريق
اساسا مين الشخص اللى المفروض يعمل تريلز او طرق لاي رياضه ومين برضه السلطه اللي بتفتح او تقفل الطريق بعد الاطلاع على الاحوال الجويه ومين اللى المفروض متابع ومراقب وعامل خطه طوارئ؟ الدوله- السلطه الحاكمة- هيئه تنشيط السياحه؟ الاثار؟ رئاسه الوزرا؟ القوات المسلحه؟ حرص الحدود؟ مين؟؟ احنا مانعرفش مين بيعمل ايه ولا هما كمان… زي بالضبط كده القاء اللوم علي عامل المزلقان رغم انه اصلا معندوش ادني فكره عن مسؤليته
ثالثا: الطوارئ والازمات
ايه هو الرقم والجهه اللي المفروض تكلمها وانت فى ازمه غير باباك ومامتك وصاحبك الانتيم.. يعني مين الجهه اللي تقولها والله انا فى مصيبه زي ٩١١؟ مفيش؟ انا مره كلمت المطافي من ٦ سنين كده كان فى حريقه قدام المكتب رد وقالي "بجد ولا بتهزري؟"
رابعا: المعلومات:
كل مصيبه بتحصل بيطلع ناس اما لواء سابق او صديق او قريب او ناشط فيسبوكي او سامح سيف اليزل عشان يقولنا تصريحات لا منها حقائق ولا حتى اراء وبناء عليه مفيش اي مصادر موثوقه او حتي رسميه للمعلومه غير صقحه "عالفيسبوك" بس للمتحدث العسكري للقوات المسلحه.
خامسا: السلامه
اعتبارات السلامه عندنا تعتبر اغلب الوقت مدعاه للسخريه والضحك. يعني معروفه كمصري من الصياعه انك ماتقفلش التليفون ولا تربط حزام المقعد ولا تتفضل فى مكانك الا لما المضيفه تحب على ايدك اننا طالعين وبناءا عليه فمعايير الامان عموما بالنسبه للمصريين مش مهمه لانه حتي لو مات هيجري ايه يعني ..قضا ربنا
ملحوظات عابره:
١-مانقدرش نخلي مسؤوليتنا كافراد ومسؤوليه الدوله فى الحفاظ علي الافراد انما فى الاخر مين المنوط بيه حفظ الامن فى الاول ثم تطبيق القانون؟ الدوله..مؤسسات الدوله هي المنوط بيها تنظيم ده..مش اي حد تاني..
٢- انا حاليا اتشكك فى كل شئ يعني باي وش احنا بنادى بسياحه؟ واى نوع من السواح من يتم دعوتهم؟ لو القصد سواح الكباريهات الدرجه العاشره فده ممكن يكون متاثر. انما سياحه الرياضات اللي من نفس النوع لن تري النور فى ظل حوادث زي البالون والاوتوبيس والمشي فى جبل من دون اي سبيل للحمايه الا الباسبور الاجنبي..
٣- دلوقتي نحن نحارب ارهاب محقق فى شمال سينا..لو الجهات المختصه عاجزه عن البحث عن مفقود معروف تقريبا موقعه نظرا لصعوبه الجبل فكيف لنا ان نفهم انه يتم فعلا التخلص من الارهابيين فى شمال سينا فى جبال مشابهه وعقول اجراميه؟ ولو كان هناك قوات خاصه لده لماذا لم تشارك في انقاذ الناس؟
٤- من حق المواطن صب غضبه على حكومته فى حدود حريه التعبير فماينفعش تكبت على ناس شايفه ان كان فيه تقصير او اهمال..دا رايهم وهم احرار فيه..
٥- ايه اللي وداها- وداه-وداهم هناك سؤال من احط ما يكون الحقيقه (اسفه علي تعبيري) بس مش مطلوب من حضرتك اطلاقا تحديد اماكن تواجد البشر..
٦- ايوه الفجوه بين الاجيال المتمثله فى السلطه العجوز والشباب اللي بيعمل حاجات بالنسبه لهم تجيب وجع الدماغ هي اساس المشكله
٧- سمعنا عن بدايه الاسعاف الطائر مره فى عهد مبارك ومره فى عهد مرسي ومره فى عهد السيسي\عدلي منصور ولم نسمع عن استخدامه فى اي من حوادث الطرق او القطارات او الاعنصامات او الانشطه السياحيه..
اخيرا: ليه الناس بتصدق اشاعات ان السلطه ضدها لنفس السبب ان الناس بتصدق ان الاخوان ورا اي مصيبه.. احنا عارفين حتي لو الاخوان مش هما اللي عملوا فمنهم كتير يتمني الشر حتي لو معملوش بالتالي سهله التصديق. وبالمثل الناس مابتشوفش اي شئ من السلطه فبتصدق انها مقصره فى حقهم ومهمله فيه حتي ان لم يكن الامر كذلك.. كارما از ا بيتش!
عزيزي المواطن..ماحناش عايشين فى جنه ومحناش ام الدنيا ولا بالطريقه دى هنبقي اد الدنيا انما فى الاخر براحتك عايزنا نكمل مشي فى وسط علامات واضحه على خطوره الطريق اذا استمر وسنستمر.. لانه لازم حد يسوق فى الاخر
رحم الله كل من مات في سبيل ما يحبه ان كان فكره او مكان او وطن او عقيده وانسان ..
