الواد طفش يا جدعان

فى اعقاب ازمه الفيلم المسئ للرسول من يمكن سنتين ولما الجماعه المتشددين  راحوا وعملوا غاغه عند السفاره الامريكيه اعتراضا على الفيلم.. الازمه التي اودت بحياه السفير الامريكي فى ليبيا بالرغم من انه مش فنان يعني دا راجل ديبلوماسي.. وقتها قعدنانتفرج على المشهد الفوضوي دا..

المهم فجوزي العزيز قالي.. "بالك لو حد من السفاره خرج من جوه وقال يا جماعه اللي عايز فيزا لامريكا ييجي يمين شويه كل الناس دي هتصطف وتدى تمام"

حقيقه.. اغلب من تاخذهم الجلاله اوي وتتحول الامور من اعتراض وغضب محكوم الي درجات من الغضب والتصرف الارعن والعنف هم نفسهم من يعانون اقسي انواع الفشل والظلم وعدم المساواه وفقدان اي اهداف اخري للحياه..

اما حاليا.. تزايد اعداد الطيور المهاجره واللي بتهاجر واللي عايزه تهاجر ودا مش عيب.. انما ايه اللي يوصل شاب عنده ١٧ سنه انه يخاف يروح؟ قيس على الولد دا جيل كامل..

 جيل هيفضل كل اماله اما انه يبقي شبه محمد رمضان فى فيلم الالماني..بيضرب ويشتم ويحب في ستات ويتحرش ببنات يا اما يجيبله احباط يا اما يحاول يمشي.. 

طبعا تطل علينا مدام لميس الحديدى وما شابه وتمسك الواد وتردح لامه فى التليفزيون "ياللي اهلك ماعرفوووش يربوووووك" "مصر فيها مليوووون واحد انضف ميينننننك" وبدل ما تحاول مش تحايله بس تحايل جيل بحاله شايف انه بدل ما يقعد يفقد مستقبله ويتقبض عليه عشوائي ويستني مدام لميس تتوسطله عند السيد الوزير انه ياخد بعضه ويمشي..

عيل عنده ١٧ سنه ياجدعان.. افترضنا انه اخطا (فرضا يعني) نردحله كده؟؟ طب ما كل اللي زيه واخدين صفه.. حضراتكم نسيتوا ان في شباب بيفضلوا يموتوا على مراكب رايحه اوروبا او ان السمك ياكلهم على العشا بس "يغوروا" .. داريانين انتو بالناس؟؟ ولا هتذلوهم كتير بجنه الخلد اللي عايشين فيها؟؟

كرهتوا الناس فى اي معني كويس.. حضراتكم قررتوا ان واحد بس ربنا انزله عشان يقرر مين وطني ومين ارهابي ومين مؤدب ومين فاقد الادب.. وقررتوا كمان ان التعذيب والتشويه وكشوف العذريه هي وسائل مشروعه لهيبه الدوله وكيانها وقررتوا ان الدساتير الجائره هي عناصر وحده الامم.. 

طيب!! ماشي.. حد عمل حسابه علي المستقبل؟؟ حضرتك يا مدام لميس.. وانتي بتسالي مرشحين الرئاسه فكرتي وفعلا مهتمه تعرفي التعليم هيتحسن ازاي؟ الصحه؟ ولا كله بالحب والنوايا الخيره؟؟

شوفوا.. انتوا اخترتوا تحيوا العظام وهي رميم.. قررتوا ترجعولنا محمد ثروت وسمير الاسكنرداني .. وقررتوا برضه تعملوا صكوك وطنيه وتوزعوها على اللي حافظ المقرر وقررتوا تقصوا اي حد معترض وتحبسوا اي حد صوته عالي وتعيدوا نظام دوله مخوخ وقديم للحكم.. نظام بيشغل المكن بالفحم وبيعذب البشر للعقاب وبيمنع فيلم حلاوه روح لحفظ الاخلاق وبيمنع فيلم نوح لحفظ الدين.. 

يمكن منعتوا فيلم نوح علشان كمان بيدي افكار لناس بالهرب؟ يمكن..

هنيئا لكم بدوله الاربعينات.. هي الي زوال زي ما الفحم الا زوال كده..الدنيا بتجري لقدام مش هتعرفوا ترجعوها ولا حتي توقفوها.. الولد ابو سن ١٧ اللي منه رجا طفش.. وغيره هيطفش.. مش عشان نفسه يطفش بس عشان بينجي بعمره.. والمليون واحد الانضف دول.. يا هيخيبوا يا هيتحبسوا يا هيمشوا يا مدام لميس.. عشان الخطه الخمسيه القادمه لتشغيلهم هتبقي علي عربيه خضار..