هيييه ثورة! وما دايم الا وجه الله!

معظم الناس اللى تعرفنى تعرف انى عادة اميل للواقعية عنى منها للتفاؤل او التشاؤم! بمعنى اخر انا لا بتشائم اوى ولا بتفائل اوى من اى تغيير فى الاوضاع ولا الاحداث بس الشهادة لله انا اليومين دول بيجيلى مفاجأت الحقيقة كأبتنى من ناس كتير قوى اعرفهم .. مش عشان ارائنا مختلفة بل عشان وجهات النظر نابعة من عنجهية وتعالى وبعضها مش حاطة فى اعتبارها حق دم الناس اللى راحت هدر ولا عن المحابيس اللى المفروض هما اللى يبقو فى البرلمان او على الاقل معانا..

بمنتهى الامانة انا مش مكتئبة لا انا الحقيقة عندى شعور بالغثيان من الصرع والصراع على سلطة زائفة.. من قوى مالهاش اى دعوة بمطالب اى حد غير انها بس معاها فلوس..

عندى شعور بالغثيان من المغالاه فى التعصب لاحد الطرفين لدرجة مخليّة بعض الناس تتجاوز عن اخطاء لفظية او فعلية فى برامج او صحف تصل فى بعض الاحيان لدرجة اما البله والخلل العقلى او التواطؤ والعمالة..

وبين كل دول وبعض لا يتجاذب الناس اطلاقا المشكلات الاصلية بل انشغالهم بتعصب اعمى او هلع عبيط يساهم فيه بشكل عمدى على ما اظن اغلبية الاعلام اللى لا اصبح سوق زى الانتخابات للى يدفع اكتر..

انا مفهمش فى السياسة والصراحة برضه انا نزل من نظرى تماما الكتلة المصرية والاخوان (مع احترامى لمناصريهم على اى حال).. انما الشهادة لله اللى ضرب الرقم القياسى فى الانحطاط الاخلاقى انتخابيا هو حزب النور السلفى اللذى لم يكترث بشعاراته اصلا بل انه يؤازر رموز من النظام السابق ويزج برموز ما هى الا رموز للجهل لتثمثيلهم فى البرلمان.. انما وجه استيائى من ردائة ممارسة النور بالتحديد هو انه بيدع "بشرع الله" وانا مفهمش ايه نوع شرع الله فى مسانده ناس من نظام فاسد ومفسد ومزور..

لا تختلف الكتلة ولا الاخوان كثيرا بس هذا هو المتوقع يعنى! وفلوس تتبعت وفيديوهات لتشويه الناس واستغلال للدين والمتدينين واللعب على احتياجات الناس المادية والامنية والدينية..

يعنى بمنتهى الامانة انا لا اعيب اطلاقا على الغلابة فى اختيارهم حتى لو بشنطة تموين.. الغلبان فى مصر عارف انه فى ذيل قائمة الاولويات امام احتياجات النخبة من التصييف والفسح..

انما الحقيقة المخجلة الصراحة هو استعباط الجميع عن الناس اللى راحوا فى ماسبيرو ومصطفى محمود وامبابة ومسرح البالون والدويقه والثورة نفسها..  والليستة طويلة

الاستعباط الاكبر عن 12000 محبوس فى احكام عسكرية على الرغم انه قانون غير دستورى والبيانات واضحة بتحويلهم للقضاء الطبيعى..

الاستعباط عن كل اللى ماشيين بعين واحده.. الاستعباط عن فلوس الداخلية اللى جابوا بيها لبس جديد وخوذ جديدة وقنابل جديدة.. الاستعباط عن موظفين حولوا للتحقيق لرفضهم استلام 7 طن قنابل مسيلة للدموع.. الاستعباط عن حكومة محترمة.. الاستعباط عن اقتصاد منهار.. الاستعباط عن رؤية غير واضحه للمستقبل.. داحنا حتى مش عارفين المقاعد هتتحسب ازاى.. ولجنة فرز الصراحة انا مش عارفة الناس دى طلعت الارقام دى بناءا على سوق التلات اللى كانوا قاعدين فيه؟؟

انما الحقيقة انا مبسوطة من حاجة.. اهل الطبقة الراقية والمتوسطة عرفوا اخيرا ان فى ناس فى الحياة مايبفرقش معاهم خالص انك تصيف السنة دى عشان هما همهم رغيف عيش او انبوبة.. عرفوا برضه انهم لما بيضحكوا فى وشك وهما بيفتحولك باب العربية دا مش معناه اطلاقا انه مسامح ولا انه عايز يبقى باشا زيك وده من حقه...

عم حسن عامل النظافة اللى مخه يوزن بلد بيقوللى الغلابة جربو البشوات ومانافعوش قالوا يجربو اللى بجلاليب.. فى وجهة نظرى تفكير معقول!

اكتشفت برضه انه ما يقولون عن انفسهم طبقة متعلمة منهم من يتعامل بنفس منطق الغلابة فى التفكير النابع من العاطفة ومش من العقل..

فمنهم من اقتصرت مشاكله على تصريحات ابو اسماعيل المتعمدة لاثارة اعصابعهم عشان مقدم البرنامج يعمل شو.. محدش فكر مثلا ان تصريحات ابو اسماعيل لن تزيد المؤيدين الا تأييد وتزيد المعارضين معارضة.. كان ممكن جدا ان يتطرق مثلا المقدم بالنسبة لعمل المرأة عن خطط المرشح فى تحقيق ظروف معيشية مقبولة بما انه ينوى تقنين او منع عمل المرأة.. فحوالى 20% من اسر مصر تعولها امرأة.. ولذا فالمتوقع لتعويض المرأه والاسره بشكل عام..وذلك بمجانية تعليم محترم لا تضطر الام للعمل عشان الدروس ورعاية صحية ادمية بدل الذهاب للمستشفيات الخاصة.. بل واعانات بطالة ومعاشات قيمة حتى لا تضطر المرأة للعمل.. لم يتطرق المقدم لذلك واكتفى فقط بالفرقعة..

وللمفاجأة فقد اتفقت مع حازم ابو اسماعيل فى نقطة.. ايوا حصل! الراجل بيقول ان السيدات فى مصر يحتاجون لمرحلة طويله فى حياتهم لرعاية الاطفال.. وانا ارد واقول صحيح تمام.. ولذلك اتوقع من الشيخ المفوه اجازة وضع مدفوعة الاجر لمده سنيتين على غرار الدول الاسكندنافية..

اما بالنسبة للهلع من سيطرة الاخوان فهو غير مبرر.. دانتو مابتخافوش من اللى بيدوس على الناس بمدرعات ايه وجه الخوف من واحد بدقن.. دقنه وهو حر فيها.. (دا مع اختلافى مع الاخوان اصلا وانى مبصدقش خالص فى جو التدين .. هما فصيل سياسى محافظ رأسمالى ليس الا.. )

دا الهلع وصل بالناس لتأليف قصة عن نادى الشمس كذبت لاحقا.. اه وبالمناسبة لو قصة منع المزيكا على صوت عالى جوه النادى دى حقيقية فانا اؤيدها..ما دا نادى رياضى ومحدش برضه يقدر يسمع حماقى بالاسبوع!!

زى مانا اويد برضه وضع قانون صارم للتدخين والقيادة بعد الشرب.. دا فى امريكا يا مؤمنين قوانين السواقة دى تضحكك من فرط تعنتها والتدخين بل وانه ممنوع الشرب فى الشوارع اصلا فى معظم الولايات. الغرض بس تقنين الدنيا مش تطليع الدين!

ما هو اى نظام هيضطر يحط نظام ويسن قوانين الاخوان بقى ولا المصريين الاحرارهيضطرو يحطو قوانين فمفيش داعى للمغالاه قوى والتركيز على مين اللى حاططها..

نداء للى مسميين نفسهم ليبرليين.. الولولة اللى كانت متوقعة منكم كانت المفروض على واحد زى علاء عبد الفتاح اللى محبوس ظلم فى محكمة استثنائية ولا على قناص العيون اللى طلع فوتوشوب ولا على جميلة اسماعيل اللى عاشت عمرها كله تناضل وتاخد صابونه عشان صراع مادى بين الاخوان والكتلة ولا على جورج اسحاق الراجل اللى بدع الاعتراض على السلطه ومحدش بيناصرة ولا حتى ساويرس!! ولا على اللى ماتو ولا على اللى عنيهم راحت ولا على الاغتيال السياسى للبرادعى وابو الفتوح ولا على ارهاب شخصيات بارزه زى منى الطحاوى ولا على شباب ناجح زى ماجد السمنى!!

كفايه بقى ولولة على تفاهات.. وحكم على البشر بالجهل..

اللى اتحمقو قوى عشان الناس اتضايقت من ساويرس على الكلمتين الهبل انا احب بس اوضح.. اهو لما تم تبرئه 6 ابريل من تهمة التمويل الخارجى وقولنا ان فى مجموعات سلفية ممولة من الخليج محدش فتح بقه ليه؟ هه؟؟ ولما الكونجرس قال انه دخل 40 مليون دولار محدش سأل لمين ليه؟

واخيرا اذا كنتو متهيألكو ان الخليج لو بيبعت فلوس لبعض الجماعات السلفية هيبعتها من ورا امريكا دانتو تبقو على نياتكو قوى.. الخليج بيدفع عشان العروش وبيدفع نيابة عن امريكا المعذورة اليومين دول عشان الوضع يظل على ما هو عليه.. ديموقراطية مصر خطر على الاثتين بنفس القدر..

المهم يعنى.. الله يرحمها دى ثورة لا يساندها اهلها ويذهبون وراء سراب سلطة زائفة اخرتها صابونة وهياخدها الكل...

وما دايم الا الدايم ولا دايم غير الله

الكنبة العمياء

من اول يوم فى سنة 2011 وقبلها بكتير وشبح الثورة المصرية يحوم حولنا. ولم تخف على احد خافية ان البلد على شعره وان اكيد دى مش عيشة وان الوضع ده اكيد مش هيستمر..

وراهن الكثيرون على المصريين وهل سيتحركون مع فجور نظامنا اللى ماكانش نظام اصلا كان طابونه لاصحابه واتنباعه وفلوله وشبابه السيس وطبقته المتوسطه اللى اكلتها البارومة وطبقتها الدنيا اللى انفصلت لوضع مزرى من الجهل والبلطجة والعشوائيةوالمرض..

وقد كانت فى تلك الاثناء بينما لا يمر يوم من غير مصيبة يعلن صريحه عاليبة مدوية عن اقتراب ساعة الثورة ويظهر امامك مجموعات احباط المعنويات ومروجى الاشاعات وانانيى النزعات وسيس الحيوات بان "الثورة دى لو قامت هتكون ثورة جياع" وهو ما اتبعه الكثيرون من مبدأ وبناءا عليه التزم الصمت... اطلق على تلك الفئة لاحقا "حزب الكنبة"

وبما ان حزب الكنبة دائم اتباع مبدأ "من خاف سلم" و"الباب اللى يجيلك منه الريح سيبه واتغطى" و"عايزين نربى العيال" والنضال الاكبر بالنسبه لهم كان الفرجة على مسلسل اهل كايرو.. ومصمصة الشفايف.. كان يبان لناس كير انهم الاكثر عددا او الاغلبية وهو ما راهن عليه مبارك باحاديثة العاطفيه المتخلفة والتى تتناسب تماما مع سيناريوهات مسلسلات هوانم جارد سينى والعشق الممنوع.

وقامت الثورة وبالعند فى الجميع قامت سابقة تاريخية من نوعها وهو قيام ثورة مصر. قامت من قبل طبقة فوق متوسطة انضم اليها طبقه دنيا (خلّصت يوم 28) وامتنعت الطبقات المتوسطة والعليا او اشتركوا بالمناصرة والنضال الافتراضى.. ونجحت الثورة.

اللطيف ان تلك الثورة كانت طيبة وبنت ناس.. فلم تكن ثورة جياع بل كانت نبيله جدا فى تقبلها لكل من عارضوها وحتى من قتلوا ابنائها ارساءا لمبدأ العدل.. وبدل ما ينضم اليها الجميع لكرم اخلاقها اصبحت طلبات حزب الكنبة اوامر وصريخهم كأطفال رضع هو ما يرضخ الجميع له، والخوف على زعلهم اصبح هدف فى حد ذاته.. فحزب الكنبة يناشد الناس بانهم يشتغلوا او يصبرو او يستنوا تخضع وترتضى الثورة.. تقرر الكنبة باعطاء فرصه لفلول ماكانوش فلول قوى توافق القوى الثورية ..وتسمع الثورة وقواها دائما "انتو اللى خربتوا البلد" باعتبار ان احنا كنا عايشين فى السويد يعنى وترتضى وتهدأ القوى الثورية اكراما للكنبة وقاطنيها..

اللهم ان التنازلات استمرت بل وصعدت من الكنبة شلل المنتفعين والاعلاميين والنخب بل ودخلتننا الكنبة فى حوارات سفصطائية لا تهم احدا اطلاقا زى "نعم ولا" فى الاستفتاء.. بل ودخلونا فى حوارات طائفية اسلامية ومسيحية مالهاش اى تلاتين لازمة.. ولم يتطرقوا اطلاقا لمساعدات مادية، عينية او حتى مؤازرة وجدانية او مطالب لاظهار الحق او ابعاد المفسدين بل كانو و من كنبتهم المشؤومة يتراشقون الاشاعات والسبابات والعظات الفارغة لاى حد نفسه يغير فى أم البلد.. ولم يساعد احد حتى بمحاولة اعطاء فرصة ومراجعة النفس فى الانضمام لاى مجموعات توعية بل اهتموا فقط اما بمنافع شخصية او اعتبارات ادبية طائفية تحت مسميات زى ( اعلاء كلمة الله- او ليبرالية- ووصل بهم الحال لائتلاف الاغلبية الصامتة) يعنى ترديد مصطلحات غير ذات معنى من فرط الجهل..

لم تتوقف الامور هناك بل واصبحوا كثيروا التحدث عن جهل الشعب المصرى دائما ومعايرته بان منظره زباله ومخه متخلف وجاهل وريحته وحشه.. وان الديموقراطيه والعدالة حرام فيه لانه مايستحقهاش.. الناس دى مفكرتش تفتح اى وكالة انباء فى اى حته فى العالم عشان تشوف المناظر اللى اتظاهرت فى امريكا- انجلترا- الدول العربية كلها- ايطاليا- اليونان وحتى اسرائيل.. وده طبعا بالنسبة للكنبة كان لأن الشعب المصرى اختار يكون معفن مش عشان ان النظام القديم اللى كلنا جزء منه ساب الشعب فى حوالى 30% فقط يعيشون فى ظروف ادمية والباقى ريحتهم وحشة

كل ما سبق بلعته الثورة عن طيب خاطر ايمانا منها ان مش كل الطوائف تقدر تشارك فمنهم من لا يفهم الكثير ومنهم من يكبل بمسؤليات ومنهم من انهكه الفقر والقهر والجهل والمرض ومنهم من نسى معنى الانسانية ومنهم من فقد القدره عموما على الحلم ورفع سقف طموحاته وحرياته...

انما لما توصل اننا بقالنا 11 شهر بناكل قرف عشان نريح حزب الكنبة ونرتضى ان نتغاضى عن استمرار الفساد والاختيارات الخطأ وضياع الحقوق والارواح واللعب بمقدرات الفقراء واللى مش فقراء بل ونستمع لرأى سخيف بأن الثورة اللى خربت البلد مش سوء الاداره بحسن او سوء نية بل وان القوى الثورية ترتضى هذا الاتهام وتحاول جاهدة ان تريح بال اهل الكنبة بان الصبر جميل وبكره حلو وربك بكره يعدلها...

انما بعد كل ده بدأت تلك الكنبة فى التراخى والاستعباط بل غض الطرف عن دماء المصريين اللى بتروح كل يوم لمدة 10 اشهر من اول اطفيح لمسرح البالون لامبابة للدويقة لماسبيرو للتحرير (3 مواقع على الاقل)  او اختيار معارك معينة وغض الطرف عن اخرى لاسباب طائفية لا واطلاق الاشاعات وترويج اكاذيب وضلال عن تلك الحوادث عن جهل حيسى لمجرد انه مش عايز ينزل من على أم الكنبة... لأ اسمحولى كده كتير قوى قوى يعنى.. ده فى ناس انتهزت فرصة احداث التحرير للترويج عن احزابها السياسية ومنافعها الشخصية...

كنبتكم اصبحت قاتلة... انها تقتل المصريين وقد اخرتنا كنبتكم 50 سنة على الاقل و10 اشهر لان الثورة تريد رضاكم واكتر من 2000 مصرى دمهم هيروح هدر و12000 مسجون حريى بسبب هلعكم الدائم واقتصاد ينهار بسبب اشاعاتكم وتحويلاتكم للخارج...

كنبتكم تقتلنا!!

واكرر كلمة ام الشهيد البسويسى الشاب الاسكندرانى بما معناه: والنبى اللى بيقولو عليهم حزب الكنبة... والنبى اعملوا فينا معروف واسكتوا..

الى حزب الكنبة والنخب والقيادات المستغلة... اصبحتم واصبحت كنبتكم تقتلنا يوميا.. ارجوكم اما ان تكونوا قد كلامكم وتاخدو مواقف او تنضموا للحق الواضح وضوح الشمس او اسكتوا ينوبكو ثواب...

لعن الله تلك الكنبة!

عن مظاهرة 18 نوفمبر

WRITTEN- NOV 19TH- PROBABLY OBSELETE BY NOW!
 





بس عشان نكون على بينة ونور وعشان محدش ياخد كلامى على محمل اكبر من حجمة، انا مشاهداتى وارائى ما هى الاوجهه نظر شخصية بحته تحمل ما تحملة من ارائى انا وبس فهى ليست وقائع ولا حقائق ولا حتى معلومات.. وبرضه مبدأيا انا مواطنه عادية فأنا مش معايا المؤهل الدراسى اللى اليومين دول يخلينى "خبير استراتيجى- ولا ناشط سياسى- ولا مدون على فيس بوك ولا تويتر" انا كل اللى حيلتى 150 فولور اظن معظمهم ناسيين انهم عملينلى فولو اساسا..
المهم يعنى ندخل فى الموضوع..

اعتدنا عموما كعائلة انه لما نصحى الصبح نلاقى الاهرام والمصرى اليوم بالبنط العريض تكتب ان "مظاهرة اليوم يقوم بها الاسلاميين" ولما السيد البدوى وحزب الوقد (ربنا يسامحه بقى على اللى عمله فى الوفد) يقول ان الاسلاميين بيستعرضوا عضلاتهم، على طول كده احنا نعرف ان العكس هو الصحيح وان الواحد يشد الرحال وينزل ياخد غطس فى التحرير اهو يشوف الحقيقه ويعمل شحن بطارية الثورة وتحتك بالناس اللى بجد مش الحديث المسيّس اللى فى التليفزيون.


وقد كان..

احنا دخلنا من شارع البستان والصراحة اللجان الشعبية (الحريمى) كانو واضح انهم بنات من الاخوان والشهاده لله برضه كانو كتر خيرهم فى منتهى الذوق والاحترام والمهنية.. انا بشكل عام بقدر قوى شباب الاخوان وبقدر اكتر البنات منهم- شخصيات كده ويفرحوا.
الميدان كان يمتلئ عن اخره وصعب الدخول اليه من المداخل المعتاده.. كان زحمه طبعا بس مش عارفه ليه يديك احساس بالزحام اكتر من الزحام الموجود.. وبعدين عرفت السبب.. السبب هى لعنة الميكروفونات.. ظاهرة رهيبة فقدت مصداقتها وتأثيرها تماما وتم تسيييها لابعد مدى واصبحت سببا رئيسيا لينفر الناس منها.. الا وهى المنصات.. تحتل المنصات جميع المداخل تقريبا.. يعتليها ناس كتير يظنون مخطئين ان هناك من يسعمهم او من قد يغير رأيه او قد يكسب صوته من خلال حديثه الشيق اللى محدش فاهم منه حاجه.. المهم المنصات دى مالهاش اى لازمة الا تصديع الدماغ وزيادة الزحام اللهم الا انك تقدر تعرف القوى السياسية الموجودة فى الميدان ومين معاه فلوس ومين معهوش..

اهم المنصات اللى شوفناها كانت منصه للاخوان- منصه للجماعة الاسلامية- منصه صغيره حبوبه كده قالو انها بتاعه شباب الاخوان ومنصه لضباط القوات المسلحة المتقاعدين وبتوع 9 مارس وفى منصه كبيره انا بصراحة مش عارفى هى تبع مين...
عند دخولك من ناحية البستان قد تتأكد ان الجمعة فعلا اسلامية صرف. وتتميز تلك الناحية بما هو تقريبا جميع مميزات وعيوب الحركة الاسلامية فى مصر من وجهة نظرى.
الحركة الاسلامية ناجحة جدا فى انها تحشد وتملك من المهنية والكفاءة انها تعين كوادر فى وظائف محدده... ولكن المشكلة بقى انه لا اظن ان الحركة الاسلامية عندها نفس القدره على انها توصل المعلومة او تقنع اتباعها هم نازلين ليه اصلا.. يعنى مجملهم نازلين اصلا عشان اتقالهم ينزلوا انما قليل فى اللى شوفته اللى فعلا مقتنع باسباب نزوله غير ان قادته قالوا كده..
سبب نجاح الحركة الاسلامية فى وجهة نظرى ان معظم من يتبعها يثق تماما فى قادته وبناءا عليه بينفذ الخطوات بقليل من الحوارات.. وبرضه لان المرجعية دينية فالتفكير عادة فى رأسمالية اتجاه الحركة الاسلامية لا يمثل مشكله كبيره للاتباع.. ولذلك بيبانلنا ان اتباع الحركة عددهم كبير قوى واغلبية ساحقة ماحقة..
هو الحقيقى انهم متحدين اكتر وبيثقوا فى قرارات القيادات (سياسية كانت او دينية) فبالتالى مش صعب قوى تحشدهم او تقنعهم بمرشح... ولكن هتلاقيهم ما لم يتم وضع خطة مسبقة من منظومة مركزية، يسودهم الضوضاء وتحس بالفوضى والزحام اكتر بل وتلاقى هتافات ملهاش دعوة بالموضوع اصلا.

لو دخلت من قصر النيل هتلاقى الحشد مختلف من الحركات الغير متأسلمه سياسيا. المجموعة دى كانت جايه من مسيره ضخمة من المهندسين. لا تستطيع ان تجزم ان كانت اقل عددا او متساوية مع الاسلامية.. كان بها 6ابريل وناشطين ومجموعة لا للمحاكمات العسكرية وغيرهم من الحركات الشبابة المتعدده (اللى انا بعتبرهم بيمثلونى اكتر عامة)

تشعر طبعا بنوع اخر من الفوضى الاقل وان كل من الشباب اللى نازل مش زايط قوى.. معظمهم عارفين جايين ليه حتى لو كان السبب انه يتويت او يحط صورة على الفيسيوك تثبت حضوره.. معظمهم يعترض اكثر على ممارسات المجلس وطبعا مشكلتنا جميعا فى تحديد تاريخ لتسليم السلطة ولكن وعيهم اكثر بالمحاكمات العسكرية والمخالفات والممارسات المرفوضه والحكومة ومستقبل الثورة هى مطالب شكلها معلوم ومقتنع بيها وسط المجموعة دى.
انما ليه كلنا حاسين ان المجموعة دى اقل؟ انا قناعتى ان دول اغلبية. محدش فى مصر مش عارف العلة فين ولا مين المشكله دع معظمنا عارفين الحل فين اصلا. مشكله الحركه الغير اسلامية (اللى اصلا قامت بالثورة) انهم كل واحد له عقل بيفكر بيه ولازم يقتنع الاول قبل ماينزل وبالتالى مش هيشوف واحد على القهوه ولا هيجيلو تليفون يقوله انزل فينزل.. لازم يقتنع بالنزول اولا . وهو ذات السبب انه لا قياده لحركة الشباب حتى بعد نشأه الاحزاب الصغيرة. ولأن الحركة دى جواها عشروميت اتجاه (يسارى وليبرالى  وقبطى ) فأكيد اتحادهم وقدرتهم على الحشد اصعب وبتاخد وقت..

المشكلة الاكبر ان مناصرى هذه الحركة هم اعضاء مؤسسون فى حزب الكنبة المشؤوم. فهم جايز مؤيدين للثورة او نزلو مره او منزلوش انما قرار نزول الميدان ده شئ صعب قوى على قلبهم والاسهل بالنسبه لهم متابعه برامج الفلول شو (الاسم الجديد لتوك شو) او انهم يصطنعو مناقشات سفصطائية على الفيسبوك وبعد كده يقولو ايه "الدينا خربت .. الشعب ده ماينفعش فيه الديموقراطيه" وبما ان اعضائ حزب الكنبة ربنا برضه انعم عليهم بمخ فهم قليلو استخدامه وان استخدموه يكون بمعطيات التليفزيون واليوم السابع والفريندز على فيسبوك.

باقة محيط الميدان هم المصريين العادييين الطبيعيين اللى قرروا ينزلو بيفط مكتوبه على كرتونه مكواه قديمة "احنا الشعب خط احمر" او "ممكن نفنكر الشهدا" او حتى رافعى علم السويس ورابطة للرأس مكتوب عليها "شهيد تحت الطلب". هؤلاء طوافون حول الميدان من يمينه ليساره لاسلامييه لغير اسلامييه (ايدولوجيا).
تستطيع ان تستشف من هؤلاء ان مشاكلهم بعيده تماما عن العراك السياسى الدائر. مشكلتهم هى حرية وكرامة  ومن يضمن ذلك فهم ورائه ولكن المواطن من هذا النوع قد مل وسأم المناصره والدعم ولن تستطيع اطلاقا ان تعرف فى من يثق وفى من لن يثق.. فهو يشاهد ولا يعطيك اى اماره او اشاره هو مع مين!
من هؤلاء واحد استوقف جوزى وقاله " انت منوّر الميدان" من وسط الالاف اختارنا احنا يقول كده..
استوقفنى ايضا بنتين ماشيين مع بعض وعند منصه الجماعة الاسلاميه واحده بتقول للتانية "انت عارفة مين عمر عبد الرحمن ده اللى بيكلمو عنه.. ده مسؤول عن التفجيرات زمان فى امريكا" اظن ان نبرة صوتها كان فيها عدم مناصرة له عموما.
بياع حاجة ساقعة حاطط قدامه طبق كبير فى بضاعته فبنقوله " ممكن تحطه ورا عشان الزحام" رد "مانا مقدرش احطه على الناس" قولتله " طب ماحنا ناس يا عم" رد عليا "معلش نستحمل بعض لحد مانعدى من المهم اللى ورانا الاول" كل ما استطعت انى اقوله " عندك حق!"
واخيرا مجموعة من شبابنا الكول قفشوا نشال مسكوه ورموه بره الميدان وبتاع الكبده طلع وقال "لو حرامى يبقى يطلع ميتين امه"

اللى بيسأل او مستشعر ان اللى كانوا فى الميدان مختلفين عن زمان.. هما لا مختلفين ولا حاجة.. الثورة فى مصر بدأت فى النضوج سنة سنه فبدل ما يوم 25 كل واحد نازل على مسؤليته وخلاص بقى عندك مجاميع تحشد وحركات تنظم واحزاب ترتب.. دى حاجة حلوة ووحشه.. حلوه عشان التغيير محتاج حركات منظمة ووحشة عشان احلى حاجة فينا تلقائيتنا دون حسابات ودون تنظيمات.. بس نرجع ونقول الشئ لزوم الشئ..
ردا بقا على جريدة الاهرام والمصرى اليوم والوفد "لأ مكانتش جمعة قندهار.. كانوا مصريين مختلفين ومتوحدين" وكل الهتافات كانت فى حدود المعروف الا فى ما ندر من اراء شخصية واظن ان ده من حق اى بنى ادم ولا هو حازم شومان بس اللى من حقه يكلم عن "امك انت"
وبالنسبة للاخوة اللى هيقولوا كان فيه تحرش وسرقة ونشل وناس بتاكل عيال.. انا عايزة اسأل سؤال " ميدان فى الاّف من البشر.. مش حاسس ان ده طبيعى ولا ايه؟"

السؤال الاخير، هل المظاهرة دى بقى هتجيب نتيجة ولا القوى السياسية كانت عاملة يوم رياضى استعدادا للانتخابات وكأنك يابو زيد ما غزيت..
وفى الاخر " لا عزاء للمواطن الطواف اللى لا تبع دول ولا دول وريقه نشف "تغيير، حرية، عدالة اجتماعية" ومحدش معبره!

واخيرا برجاء اعتبار ما سبق كمية فتى مبالغ فيها من شخص معلوماته ضحلة ورؤيته محدوده ولا ناشط ولا حاجة.

وشكرا

كم اساوى عندك؟؟

النهارده يوم حزين.. يوم فيه صمت غريب.. صمت اكتئاب وحزن واسى.. صمت بس شايل كمية حزن احيانا ويأس احيانا وغل وكبت ورهبة وخوف .. الامل النهارده مشواره بعيد.. ومش باين على مرمى البصر لا بمنظار ولا من غير منظار..

النهارده الكل متلخبط ومحدش فاهم حاجة.. ووقت اللخبطة بيحلّى الغلط والهرجله وعشان كده انا النهارده مش عايزه اتكلم..

النهارده باسبور ناس كتير طلع بره الدرج.. وناس كتير هتروح بكره تقدم عشان تطلع باسبور. النهارده المرور كان هايل... والطريق فاضى وهادى بس هدوء كئيب ومريب وحزين.. الزحمة فى القاهره من سماتها.. تكرهه وتشتاقله احيانا.. النهارده صمت القاهرة بيوجع الواحد والكلام مبيوصلش للسان ولو وصل مبيعديش للاذن وان وصل لا يعيه العقل..

اللى حصل امبارح مؤامره داخليه.. ولكن انفجارها كان متوقع.. اللى حصل امبارح كان هيحصل فى اى اعتصام... المفاجأة هو ان اللى حصل اتوضب له كويس قوى واستثمار الغضب فيه كان ناجح جدا...

والحصيلة النهائيه من الشهدا عالية والشهدا الاحياء اللى فقدوا اى امل او عزيز او روحهم انكسرت اكتر..

اللى حصل كان خسيس وكان كئيب وكان شيطانى بكل المعانى..

عارف ليه.. مش عشان الناس بس اتهاجمت بوحشية انما عشان استثمار الموت.. وتحريض "المواطنين الشرفاء" للدفاع عن جيش بلدهم ضد اولاد بلدهم! جبروت ما بعده  جبروت... هو الصراحة يصل لمرحله الكفر احيانا.. مش كده وبس انما تجار السياسة والموت ووجودهم على شاشات التلفزيون فى دعايات رخيصة.. لم يكلف احدهم نفسه فى النزول للتحدث مع احد..حتى رجال الدين.. وانا اقدس اديان الله جميعها.. ينأى جبين اى مؤمن منهم.. فلم يظهر احدهم لمجابهة الموقف بل تسارعوا فى مكالمات تلفونية تزيد استفزاز الناس وبدل من ان تزيد ايمانهم تزيد تطرفهم وغضبهم واحتقانهم...بل وتحثهم على مجابهه بعضهم بعضا بقصص لم يروها رؤى العين.. وانا مش فاهمة ايه نوع رجل الدين (على الناحيتين على فكره) اللى يحث الناس على العنف لهذا الشكل من غير تأكيد.. شئ مقزز!! اقل ما يقال عليه مقزز...

هل الطبيعى اننا نبقى عادى بنشوف استديوهات الهوا تهاجم كده؟ واحنا عادى..

انما سؤالى هنا..كم اساوى عندك؟؟ سؤال لازم تطرحة على كل معارفك.. اهلك قرايبك اصحابك معارفك زملائى فى الشغل..هل اساوى عندك اكتر ام يساوى مسجدك او كنيستك؟؟ لاحظ انا لا اخيرك بينى وبين دينك.. انا بخيرك بين انسان وجماد.. انا قيمتى كانسان ايه عندك؟ بصرف الظر عنى وعن تصرفاتى.. عن كونى بتكلم ازاى وباكل ازاى وبلبس ايه وبصلّى ولا لأ؟ وبصوم ولا لأ؟

انا بالنسبة لك لو حصللى حاجة هتزعل عشان انا بنى ادم ولا عشان انا ابن دينك..

يعنى لو انا غلطانه هتسامح فى اذيتى؟ هتستحل دمى؟ يعنى لو اتظاهرت عند سفارة ولو قعدت فى ميدان ولو اضربت عن شغلى ولو قعدت عن ماسيبرو واتهنت واتضربت واتقتلت، هفرق معاك؟ ولا مسجدك وكنيستك ومصلحتك ومصيفك واجازتك اهم منى؟؟

اسأل نفسك السؤال ده؟ لو هتسامح فى اذيتى متنصرنيش عشان انا ابن دينك ومش عشان انا بنى ادم.. مش عايزاك تعرفنى ولا تقف لى ولا تدافع عنى.. عارف ليه.. لأنك قريب هتحصلنى لأى سبب اّخر!

اللى عايز يعرفنى يقيّم ادميتى وميقيمش تدينى! اللى عايز يدافع عنى يدافع عن بيتى وعن اهلى..انصر انسانيتى ولا تنصر عقيدتى..فالله كفيل بنصر دينه اما نحن فموكولون بالدفاع عن ادميتنا وانسانيتنا التى كرمنا الله بها.. اما الله فكلنا على نفس البعد منه! قربك من الله يخصك ماتحشرناش معاك..

انصر دمى وعرضى وبيتى واهلى وشخصى..لو مش شايف انك مقتنع متعرفنيش لأنك متهمنيش.. ويوم العوزة مش هلاقيك..

النهارده معنديش حاجة اقولها لابنى.. معنديش! مش عارفه هدارى اليوم ده عنه لما ييجى ولا هيكون الايام الوحشة راحت لحالها وده هيبقى يوم اسود وعدى! النهارده المستقبل مش باين بس هييجى..

ارجوكم لو اقدر ارجوكم.. فكروا فى ان الناس اللى كانت ساكته على تبرير العنف ضد غيرها بدافع حفظ الامن هييجى عليها الدور.. فكروا ان اللى حصل ماكانش فتنه طائفية ده كان اغتيال لمعانى الانسانية.. كانت محاولة ناجحة لاخراج حيوانية البشر.. ارجوكم كفايه بقى اننا خايفين نرمى الغلط على الغلطان وبس نحمل المسؤوليه بناءا على مشاعرنا.. اللى حصل لا كان فتنة طائفيه ولا كان اجنده خارجية .. اللى حصل كان مخطط داخلى خسيس مصلحتها الفوضى ومجاميع اكبر تدافعت بحكم التحريض والشحن..

خلينا نكون واقعيين.. اللى حصل كان مسيره هيحصل فى اى من الاضرابات اللى حاصلة من اشهر دون رد... دون اصلاح.. اللى حصل لو كان جرى فى اى فئوية اخرى ماكناش هنتأثر كده..

عايزة افكركو بضحايا 25 و28 وموقعة الجمل وكنيسة القديسين والعمرانية قطورات الصعيد واحداث امبابة واطفيح والعريش والسفارة الاسرائيلى والمنيا والجنود المصريين على الحدود..عايزه افكركو ب 12000 مسجون حريى فى 9 شهور...من لم يتحرك لانسانية كل هؤلاء فلا تتوقع منه ان يتحرك الان..

بالمناسبة.. الاخت "سليمة" تعيشوا انتو!

اوجد الاختلافات الثلاث بين الصورتين؟

بالمناسبة مفيش صورة فى المقال عشان بس الناس متدورش... ده نفس المقالات المملة اللى انا بكتبها.

مش عارفه ليه صورة اجتماع المجلس العسكرى مع ما تم تسميتهم ب"القوى السياسية" اعاد لذهنى بشكل قوى جدا اجتماع عمر سليمان بذات نفس القوى السياسية برضه.. ده يمكن حتى فى نفس المكنة!

الفرق الوحيد هو ان المجلس كان حاضر كلّيته بس القوى السياسية اللى راحت وقت سليمان هى برضه اللى قعدت اول امبارح..

صحيح ناس كتير مش شايفه هو ايه مشكلة البيان اللى اتمضى عليه وطبعا ده حقهم الشرعى والطبيعى فى الموافقة والاعتراض.. انما خلينا نقول انه انا لما كلفت خاطرى وقريت البيان انا معترضتش على نقاط النقاش بس بالنسبة للحلول فالحقيقة ان البنود يعنى صايصة خالص وانا مش عارفة هما اتفقوا على ايه.. ده كل النقط مبهوقة ومش باينلها ضهر من بطن.. يعنى نمسكهم نقطة نقطة كده وده طبعا وجهة نظرى المتواضعة كمواطنه عادية جدا وغبية جدا وغير سياسية مطلقا...

اولا: بالنسبة للانتخابات.. الرد الوحيد عليها هو الرد المصرى الاصيل عليك لما تسأل عن طريق ويرد عليك واحد نبيه يقوللك "هو قاللك فين؟" انا بالظبط حسيت هو ذات نفس الاحساس.. هو امتى ياخواننا الانتخابات.. يعنى هنبتدى انشاءالله 2012 كده وبعون الله ندخل على الشورى وبعدين يقعدوا مع بعضيتهم وبعدين ينقّولنا الجمعية التأسيسية فى حاجة بتاع 3 شهور وبعدين يقعدوا يتعرفوا على بعض ويلعبوا اصحاب يطلعولنا دستور.. ندخل غزوة الصناديق.. وبعدها ننتخب رئيس... حمدالله على السلااااامة.. ده انا نهجت وانا قاعدة.. طبعا انا احب اوضح ان القضاة عندهم اجازة الصيف.. والبرلمان له اجازة برضة وعندك رمضان والحج والاعياد والمواسم يعنى حسبة التلات شهور دول ممكن ترسى على 6 عادى والانتخابات الرئاسية على ماتحصل يكون ربنا افتكر المرشحين كلهم والبرامج بتاعتهم تكون مدة صلاحيتها اتفنيخت..

نحب ننوه هنا ان اللى قلبة على الوضع الامنى او اسكوتر الاقتصاد ينسى وياخد البنسه عشان انت محلك سر لحد مايبانلك صاحب

المادة الخامسة من قانون الانتخابات- قالّك مصر هتنطلق لعصر الانتخابات لاول مرة فعليا بقائمة مختلطة!! "يانور النبى".. هو مبدأ القائمة المختلطة بصرف النظر اصلا عن الفلول والنص فلول معقدة فى الفهم والتصويت والحسبة.. انا ياللّى اهلى صرفوا فى تعليمى بتلخبط فيها.. طب انا اشرحها لأم أحمد اللى عندنا ازاى دى.. المهم قصره.. البند ده هو الجزرة الوحيده اللى تم الاتفاق عليها وطبعا القوى السياسية النميسة انشكحت قوى وبصمت بالعشرة...بالرغم انها ماتمنعش اطلاقا اى مستقل مهما كان انه يترشح.

ميثاق الشرف (اولسو نون از) مبادئ فوق الدستورية.. بقدرة قادر ولا سحر ولا شعوذه.. وافق عليها الاخوان وحزب النور السلفى.. بتقولو مين ياولاد السلفيين.. مييين؟؟ السلفييين!!

لا والله!! طب امال غزوة احد اللى فى ميدان التحرير دى كان مغزاها ايه.. ولا مين شربهم حاجة اصفره؟؟ طيب مين اللى هيضع المواد دى؟طب بلاش! ميثاق الشرف داهوك ايه نوع المبادئ دى.. هل ملزمة ولا غير ملزمة.. مين طيب هيكتبها؟.. ذات نفس اللجنة التأسيسية ولا مجموعة منتقاه من امثال الحاضرين وصبحى صالح والشلة؟؟ يعنى رسونا على برّ طيب.. طب ده بقى اللى مش التفاف على ارادة الشعب.. ولا ام الشعب..ايوه ام الشعب؟؟

قانون الطوارئ- قالّك دراسة الغاؤه.. لاهو احنا لسه هندرس؟؟ يالهوى؟؟ امال الثورة قامت ليه اصلا؟؟  طب مين اللى هيدرس؟ المجلس ولا البرلمان ولا الرئيس الجديد ولا خالتى؟  طب فرضنا درسنا وحسينا انه مالناش نفس نلغيه حاليا هنكمل بيه باعتبار ان العشرة ماتهنش الا على ابن الحرام؟ طب بخصوص ان الاعلان الدستورى انهى الطوارئ اصلا.. مش القرار ده غير دستورى ولا ايه؟؟ طب يا جماعة يا بتوع "الشعب قال للدين نعم" هو ده مش "سورى"  ال..تفاف على ارادة الشعب باعتبار الشعب انه قال نعم لالغاء الطوارئ بنهاية سبتمبر

طب المحاكمات العسكرية..قالك المدنيين ليهم قضائهم الا فى ماهو منصوص عليه فى القضاء العسكرى..

طب انا كمواطنة وزوجة وكده هوك اعرف منين نصوص القضاء العسكرى.. قاللك لو اعتديت على احد من المؤسسة العسكرية او منشأه عسكرية. ايوه بس ده انا لو انخانقت وانا بجرى عند سور الكلية الحربية ممكن اتقفش.. ولو ركنت عند مطار الماظة.. او لو خناقة اشتغلت عند المنصة.. وهلم جرا!! يعنى انا كده مهدده..

قالو برضه ان الاحزاب تلتزم بالتعاون وتنفيذ الاجراءات الامنية.. هو التعاون ده ازاى يعنى برضه!! وايه هى بالظبط الاجراءات الامنية اللى يجب الالتزام بيها.. وبعدين اللى مش هيلتزم بقى هنلغيه ولا ايه..

واخيرا الترحيب بالمنظمات الدولية لمشاهدة الانتخابات.. يعنى بمعنى ييجو كده يقضوا معانا اليوم وكده يعنى انما طبعا لا مراقبة ولا تفتح بقك بنص كلمة.. طب ما بدل عناء المشوار نبعتلهم بيكشر على فيسيوك!

واخيرا يوقع الجميع بالنيابة عن حزبه ودى بقى نكته الموسم.. يعنى اصلا محدش فيهم تشاور مع اى نفر من حزبه بس قام رازع البصمة المتينة.. اما بالنسبة للشولّة اللى ماضية فأنا هسيبكم انتو تقيمو ده بنفسكم بحيث تلاقو الاختلافات اللى مش موجوده بين الاحتماع داهون واخوه بتاع عمر سليمان..

وكما قال الشاعر.. "الهوب ماتخليش الدمعة تفط"

وخلص الكلام.. سلام

كل ثورة وانتو طيبين

كل عيد وانتو طيبين سعداء عيدكم السنة دى مش مبارك انما جايز مبروك وجايز يجيب البركة وعلى الله مايقرنش نفسه باسامى من اى جهة ابدا ابدا يا رب.
واظن ظن اليقين ان البعض القليل اللى هيقرا المقال ده هما نفس الناس اللى بيقروا عموما..على كل حال احب اهنى الناس بعيد مختلف منتعش متحمس ملئ بالامل.. وبديهيا هو عيد غير مبارك...

انما الظاهر والله اعلم ان العيد لن يكون مباركا بل "وسيكرف" عما قريب على اسماء اخرى بل والظاهر ايضا ان التغيير الذى امله الكثير ممن شاركوا وممن فقدوا اعزاء واعين واطراف او من اصيبوا اصابات بالغة او سطحية فقد شمل هذا التغيير بعض الرتوش الظاهرية فقط وكأن المطلوب كان عمل نيو لوك.. تنجرف يوما بعد يوم امال وطموحات الكثيرين ولاسباب متعددة الى زوال...
لا يستطيع البنى ادم الطبيعى ان يحتمل كل هذه الطاقة السلبية المنتشره بالمجتمع والتى اصبحت عادة ممتزجة بالحيرة وكثير من خيبة الامل بل واليأس احيانا.. وما يقلق جدا هو ان الاحساس بالتغيير اصبح مقرونا دائما بتغيير للاسوأ..ولذا فكل قطاع بالمجتمع يتضح انه غير سعيد وتلك الهوجه ما هى الا هوجة ازاحت بشخص واتت باشخاص.. اقل خبرة واكثر تخبطا.. بل وتنتشر العديد من الظواهر التى لا تجعل من مواطن واحد فيكى يا مصر مبسوط فهو على اقل تقدير مش فارقة معاه..
اضف الى ذلك ان المستقبل "القريب" اصبح مجهولا فى ظل مجموعة معطيات تلخبط اجدعها شعب فيكى يا كوكب الارض..
الغياب الامنى- انا بصراحة مش فاهمة اطلاقا سببه.. قلنا اعادة هيكله زعلوا.. قلنا ايقاف زعلو.. وافقنا على تنقلات والبشوات معظمهم برضه يختفون.. الانكت ان الناس اقسمت بالعشرة اينما اوتيت الفرصة فى نداء عاجل لرجال الشرطة الشرفاء ولا حياة لمن تنادى... اقترح احد الاصدقاء ان يتم  اعطاء البلطجية ميزانية يتم استقطاعها من الميزانيه الامنية للحكومة للبلطجية.. كى يأمنوا عيشا كريما بل ويقدموا الخدمات الامنية  والمرورية للمواطنين وخلاص.. وزى بعضه بقى يعنى بدل ما ياخد ساعتك على الطريق ومحفظة فيها بتاع خماشر جنيه اهو نديهالهم بخطرنا بقى ويا بخت من نفع واستنفع!

ملف سينا- هل حد فاهم اى حاجة!! لا والله بجد.. احساسى بما يحدث بسيناء هو نفس احساسى بما يحدث حاليا فى الصبن.. اجهل تماما ما يحدث ولا املك تفسيرا منطقيا يتم به اشارة اصابع الاتهام الى مجموعة معينه.. لا اقنتع تماما ان يقوم مسلحون بمداهمة اقسام الشرطة من الباب للطاق كده بل وهم معلنين عن انفسهم كجماعة اسلامية حاملين رايات سوداء.. يعنى مش معقول برضه واحد بيعمل عملية مسلحه رايح لابس لبس يدينه., طب يتنكر وبعدين يعلن!!
طب حكاية الجنود اللى اتقتلوا- لا اتفهم ايضا ما هو رد الفعل الذى يصمت دهرا. ما اعجز عن فهمة وبيجننى هو رد فعل بعض شباب الاستقرار والعجلة وهم من سارعوا بدلا من مساندة باقى الشعب بل والوقوف جنبا الى جنب مع عدو واحد سارعوا فى اللوم على الثوار بل واتهامهم بانهم جبناء لا يرقون لمرتبة جنود مصر الشرفاء اللذين استشهدوا على الحدود!! بالرغم من ان معظم مدعى الاستقرار واحنا اسفين يا ريس ممن اعرفهم هما مرفهين وفرافير على الاخر والواحد منهم كان يموت نفسه عشان ميدخلش الجيش.. ولا هو الفنجره انك تبعت غيرك وانت باشا؟؟ اسفه جدا بس منطق مثير للاشمئزاز احيانا!

النخبة- اعتقد ان النخب الموجوده كلها ليبرالية واسلامية كلها تستحق التنحى فورا وحالا ودلوقتى ووقتى.. لقد طفح بنا الكيل من الهم ده.. يبنما ان الشعب كله فيه اللى مكفيه فجميعهم كل اهتماهم هو الظهور اليومى على شاشات التفزيون.. النجومية هى الحل! باعتبار انها شهرة وهو تظبيط انتخابات.. خناقاتهم العلنية والغير علنية.. بل واحيانا تشوب بعض حوادث الاعتداء عليهم بعض الريبة وهو انهم ربما اصبحو يستخدمون النظام القديم فى ارهاب بعضهم البعض.. احب اوضح فقط ان المواطن المصرى البسيط واللى مش بسيط لا يهتم مطلقا بعلاقة سياسى بفنانة ولا يهتم حتى بان اخوانى اتقلّب فى شنطة.. المواطن فارق معاه انه لما الناس دى اللى كل يوم فى المجلس العسكرى والتلفزيون بتتسرق عينى عينك امال احنا هيتعمل فينا ايه!! ارحمونا بقى.. ونداء خاص للاخوان واشباه الاخوان.. انتو كرهتونا فى زيارة الجوامع من كتر ماتحولت لمنديات براعاية الجماعة والحزب.. ونداء للاحزاب الاخرى.. الفيسبوك ابدايت مبيجبش اصوات! ونداء لمرشحى الرئاسة.. "يا خوفى يا بدران"
الميدان- كل ما كان حد يطلع فى الاعلام كان يقول لو معجبكوش الكلام الميدان موجود وكل ما كان مسؤول يحس انه هيفشل عادى يقول انا هنزل الميدان. واتقفل الميدان..اتقفل بعد سلسلة من العلق السخنة والمشاكل بل  وغلقه بالضبه والمفتاح يعنى احنا سايبين البلد تضرب تقلب عشان الصينية اللى فى الوسط.. الحراسة عليها ولا جزيرة النباتات النادرة بتاعة الخديوى اسماعيل فى اسوان. لا افهم مخزى هذه المعارضه للتظاهر وهو حق دستورى بموجب الاعلان الدستورى وهو ما يجرنا الى النقطة التالية:
المحاكمات العسكرية- على ما سمعت ان المحكوم عليهم من المدنيين عسكريا كذا الف.. ولا املك مصدرا موثقا للمعلومة. ليه؟؟ هو القضاء الطبيعى ماله ما فيه كل الاحكام والقوانيين وقانون الطوارئ لسه شغال اهه؟ وهل عمل القضاء سيقتصر فقط على مراقبة الانتخابات ولا ايه وقضايا حسنى مبارك والعائلة , والقضاء الادارى؟! فى حاجة مش مفهومة هنا.. وبالمناسبة لا ارى ان القضاء العسكرى قد ردع اى "بلطجى" مع تحفظى على اللفظ اصلا عن اى جريمة فمعدل الجريمة فى مصر فى ازدياد واللى بيتقبض عليهم حاليا نشطاء

الاعلام: انا بقول احنا لو قاصدين نهد الثورة ودافعين فلوس عشان نبوظ الثورة ماكناش قمنا بالدور القومى اللى الاعلام بيه.. ايه كل غسيل الاموال ده؟؟ ايه كل اليأس ده؟؟ ايه كل القرف ده... ايه الاستاذه لميس جابر وعمرو مصطفى  وطلعت زكريا...ايه ده
.على كل الاسباب كتير ويوم 9 يوم مهم.. يمكن نعرف نفهم فيه اى حاجة!...
 ويا خوفى لا ييجى اليوم ونقول.. مانجيلكوش فى ثورة.. وعلى رأى فنان الشعب " واهى بكرة نقول كانت ذكرى وعيشنالنا يومين"
وخلص الكلام سلام

 

لقد وقعنا فى الفخ!!!

ايون لقد وقعنا فى الفخ يا جماعة وربنا يسترها علينا..

اعتقد ان كلنا حاسين ان فى حاجة غلط.. العربية اللى احنا ركبنها طلعت على الطريق الوعر وغرزت مننا. والدنيا ضلماااا وماحناش شايفين حاجة.

احتمالاتك 3 مافيش غيرهم..

- انت يا اما غرزت غرزه مهببة  ولازم تستنى وتحاول تطلع من المطب ده.. بس هتتعب شوية

- انت يا اما غرزت عشان ده فخ حضرتك وقعت فيه وقعة مهببة وهتوحشنا يا برنس

- انت بتدلع والعربية مع زقة بسيطة هتطلع وانت ماكنتش بعيد اوى عن الطريق اصلا وعند حضرتك تهيؤات.

المشكلة ان احساسنا بالخوف عادة ما بيخلينا نسئ التصرف ونعجز تماما عن الرؤية الصح لمن هو معك ممن ضدك وايه اللى فى مصلحتك. احساسك بالخوف يمتزج احيانا مع احساس موحش بالوحدة فتتحد مع الشيطان وتغض الطرف عن موبقات حليفك عشان مالكش غيره...

مشكلة رهيبة والحل منها هو عكس التصرف المتوقع تماما. التصرف المتوقع هنا انك تبتدى تطلع العربية من الغرز..

الحل الاصح انك لازم تقعد لحظة، سيطر على مشاعرك افكارك وساوسك الشيطانية.. لازم تحديد للموقف جديا، فحص العربية بص حواليك حدد الازمة ومدى عمق الغرز..

من غير تحديد المشكلة الحل فى الاغلب غلط الا لو كان صدفة وهى نادرة الحدوث عموما..

احتمالات الثورة واحد من الثلاثة اللى فوق. يا غرزة رزلة بس هتعدى، يا اما غرزة وخلاص يا معلم، يا مش غرزة اصلا وكل دى مناوشات.

حالة الظلام الحالك الغير مفهومة دى مش مخلية اى حد فاهم مين فين ومين مع ميين وانا رأيي ايه فى الموضوع. التحالف حاليا سمة نفاقية، الغرض منها فقط السيطرة على عدو ليس عدوا ومناصرة اصدقاء ليسوا هم باصدقاء. المعضلة الاكبر هى ان الوضع "مليّط" ايوا اقصد سائل واصبحت المعطيات تتغير يوميا. تحولنا من قضايا توافقية الا عند مستفحل فى قضايا شديدة التفاهة ولا يهتم بها المواطن الطبيعى..

احب اوجه اهتمامى الاول والاخير للنخب التى نكبت الثورة من اولها..ولا اقصد بالنخب القوى السياسية الليبرالية فقط اقصد الجميع.. اى واحد طلع فى برنامج تليفزيونى او مؤتمر صجفى نخب.. والنخب نوعان

نخبة عزبة بابا: ودول الاسوأ على الاطلاق.. وجدوا فى المصريين قاعدة للحديث ياسمها دون توكيل بل وزعم ارادة الشعب من وحى خيالهم وكأن قدراتهم الثاقبة للحديث مع 80 مليون مواطن قد اثمرت عن ذلك الرأى. يتنوعون باختلاف هيئتهم، منهم من ببدله ومنهم ذو لحية ومنهم من دون دم مطلقا.

نخبة المتحولون: وهم من يتم الزج بهم فى كل نقاش معارض من 30 سنة فأكثر على سبيل الترفيه والتسلية. هم دائما يتحدثون زى اللى قاعد على مصطبة او مدلدل رجليه من بلكونة بيتهم وبيهذى على ام العيال.. المصيبة ان يرى ذلك الشخص فى نفسه معارض مهم ومتحدث باسم الشعب.

المشكل الاكبر ان القوى السياسية المحترمة معادتش ملاحقه على كميه الضرب فى الضلمة.. يصلحوا الجاكتة البنطلون يضرب والاسوأ ان تعود الفلول بكامل تجييشها فى الاعلام من خلال قنوات غسيل الاموال وفى الصحف وفى برامج التلفزيون الرمضانية التى تحولت الى عوده ناعمة للنظام القديم.. ناهيك عن رشاوى شنط رمضان فى المناطق الشعبية عشان حضرتك تكسر عين المواطن بدرى بدرى..ما بين ذلك وما بين قضايا عسكرية وجو مشحون وتشويه للسمعات احيانا وتحريض احيانا اخرى

اصبحت القوى السياسية متخبطة ومهطرأه الى ابعد حد وبدأت الاقنعة عن السقوط.. بدأ الرأسماليون يظهرون ذلك الوجه الانتهازى وبدأ المتسلطون تسقط لحاهم فلم تعد نبرة "وادع الى سيبل ربك بالحكمة والموعظة الحسنى" فلا نبرة للحكمة ولا الموعظة بل اصبحت تهديدا.. وبدأ الجميع العراك وبحت الاصوات والتراشق بالسبابات والاتهامات وحتى الفرح بانتصارات فارغة المحتوى فاشلة تماما...

وبين كل هذا وذاك.. ترى محاكمة علينة لرئيس خلع لا اظنه يعرف او يندم على فعلته.. بل اظنه وعائلته ينظرون الينا فى شماته حيث يتضح يوميا ان الذل المشروط بعدم الفوضى اصبح مبدأ مقبول احيانا  واصبحت الجملة ترن باذن الجميع "انا او الفوضى".. حرية فوضوية ام ذل منظم.

وبين كل ذلك تحتار ما بين حروب الدستور ومبادئ الدستور وبنود استرشاد الدستور والذى انتهى به الحال من مطلب ليبرالى الى هجوم اسلاملى نهاية بمشروع عسكرى وبدأ شقاق شامل على كل الاصعدة!!

لم نستفتى اصلا على بنود حاكمة للدستور.. استفتونا اولا لتعرفو ما نحن معه وما نحن ضده..

اما عن رأيي الشخصى فدوما كنت ضد مبادئ الدستور التى تصنع شقاق المجتمع حاليا بس بما انه بقى ميت حتة فبدأت اتحسس مسدسى من رفض القوى الاسلامية له بهذه الدرجة برغم احتوائه على الماده التى طالما حاربوا من اجلها وكأن الاسلام كان على المحك اصلا.

انا فقدت الثقة فى كل من يتحدثون الان.. كفياكم بقى خليتوها ستميت حتة.. انتم لا علم لكم بنا وماتعرفوش الناس عايشه ازاى.. الحالة الاقتصادية فى النازل الحالة الامنية تنهار بسبب سوء الاوضاع الاقتصادية ولا غبار على البلطجية.. امشوا بقى وسيبوها تعمر بدل الخراب ده..انا بعد ما شفت اللى حصل فى لندن احب اشكر فقراء وبلطجية مصر على حسن تعاونهم معنا ... احنا اسفين يا بلطجية مصر.

عندى ليكم كلمة يا نخب ويا قوى ويا أى حد فى منصب: نصيحة .. الدساتير لا تبنى الدول ولا الشعوب..واعظم الدساتير ما ينفذه الناس لايمانهم به وليس لأن الشيخ فلان قال ولا المهندس علان قال..

الدساتير لا تريح الشارع.. يريح الشارع ثلاث اشياء قالها ايام التوافق الذى لم يكن اى منكم جزء منه

عيش.. حرية..عدالة اجتماعية..

اقوللكم...مصر ليها رب اسمه الكريم

وخلص الكلام.. سلام

امثلة شعبية متفرقة1: نسمة وهالة وشنطة الموسم

هو بصراحة كل الناس عندها معلومات دلوقتى والكلام فى السياسة غلب الكلام فى الكورة وانا بما انى "ايش اكون" يعنى من حيث القيمة التحليلية للسياسات الداخلية والخارجية انا بس شفت كام مثل من الناس اهل البلد دى اللى معظم اهل الفيسبوك واعضاء حزب الكنبة يتعمدوا غض الطرف عنهم بشكل اكيد متعمد او لأنهم عمى بالاساس... الاسبوع ده انا شفت امثلة بسيطة وسهلة ومنها الفج ومنها المستفز.. وهحكى عليهم لعلنا كلنا بس ندى فرصه لعنينا انها تنور ومخنا يفتح وطولنا انه يتهز شوية.

1-      نسمة وهالة- فى يوم جمعة واحد مطاعم السى فود الشهيرة فى المعادى. جو لطيف اكل لطيف خروجة عائلية طبعا (وده لأن اكله السمك طبعا مش غدا الناس الكول ولا ايه).. مدير المحل يسأل: ايه الاخبار ونرد عليه: كله تمام. ومتعرفش ايه اللى يجيب السيرة عن التحرير والراجل يقوللك " احنا مش هنخلص بقى؟" يرد ابويا عليه: الله مانت ماشاءالله شغال اهو ومفيش مشكل. والصراحة المكان شغال حلو ويوم جمعة والناس فى الساحل واقل ترايبزه مش هتدفع اقل من 400 جنيه فى الساعة ونص الللى بياكلو فيها.. الراجل معدوش ضرر مباشر.. المحل وشغال وهو مدير فرع يعنى له اجر مش زى الجرسونات الاجر معتمد بالاساس على البقشيش.. ايه لزمة البق الرزل ده.. اما دخلت اغسل ايدى، لاقيت بنتين واحده عندها 15 سنه وواحدة 21. والاتنين طول الوقت يجيبو كلنكس ويفتحولك الحنفية وخدمة يعنى ماشاء الله مبالغ فيها.. هيرد عليا حد يقوللى: طبعا ما دول عايزين بقشيش.. انت ناصح اوى حضرتك: ما طبعا امال انت فاكر فى بنى ادم بيلاقى سعاده ينضف الحمام ورا سيادتك ببلاش ولا ايه ولا انت فاكرهم بيقبضو عن طريق البنك المرتب؟؟ الفكرة مش هنا.. انا كنت واقفة مستنية اختى سألت البنات عن محل سكنهم وخلفياتهم.. الصغيره توقفت عن التعليم ولما سألت عن السبب قالت "ظروف" الكبيرة ردت " انا عمرى ما دخلت مدرسة، ربنا يسامح اهلى، اشتغلت كل شغلانة ممكن تتخيليها" اتخنقت شوية بالعياط وقالت" انا متعقدة من الحكاية دى ونفسى اقرا واكتب وفى ناس يبعايرونى بجهلى".. نصحت الصغيرة بممارسة القراءة عشان متنساش والكبيرة بالالتحاق بمحو الامية... البنتين دول واحده ساكنة فى منشية ناصر وواحده فى قرية فى حلوان.. يعملن حتى التاسعة مساءا وطبعا بيروحو بالمواصلات لحين محل سكنهم.. لما جيت اخرج قلت لها.. انت مش مضطره تشتغلى اكتر من المطلوب...مطلوب منك نضافة الحمام بس مش تدليع الهوانم.. البنتين لسبب ما اتاثرو ان اى حد اتعامل معاهم على انهم فى مقام اعلى من ورق التواليت.. احتضنونى وباسونى وقعدوا يتمنو نتقابل مرة تانية... اه بالمناسبة انا كنت اديتهم البقشيش خلاص من الاول فا مفيش دواعى انهم يمثلوا يعنى.

2-      هدية الموسم- كل سنة وانت طيبين ويعود عليكو الايام بخير. احد الاصدقاء حكيتلى على موقف حصل معاها. اعتادت احدى الشركات- كتر خيرها- اهداء الموظفين والعمال على حد السواء بهدية تموينية موسمية.. وعشان العدد كبير والميزانية محدودة بيكون جودة المنتجات مش اللى هو يعنى.. المهم صاحبتى اقترحت على المسؤولين عن المشروع انهم يجيبوا للموظفين تعبير رمزى عن المناسبة ويجيبو للعمال تموين محترم باستغلال فرق الفلوس.. وتكتشف ان النقاش اصلا مقطوع.. تقول الجملة بردوا بموضوع تانى  والظاهر ان مبدأ الاعتراض فى حد ذاته مرفوض واهم رد انها اكيد هى بس اللى معترضة.. المهم وصلت صاحبتى لحل مش بطال.. قالت" احنا نعمل استفتاء صغير للناس فى المكتب يحبوا يجيلهم ايه.. شنطة ولا هدية رمزية او مقترحاتهم.". المبدأ ده بقى كان فى مشكلة فى الوصول او الفهم وبعدين ردود بقى كلها جزم بمعرفة الناس عايزه ايه "وهم عايزين الشنط".. يصل الحوار لمرحلة  "ولو يعنى الناس قالت عايزين شنط هيكون موقفك ايه".. ردت وقالت للمسؤولة.. دا بالعكس ساعتها معاكى شرعية فى اتخاذ قرارك ومحدش هيشكى... تكتشف ان مبدأ المشاركة عندنا  مبدأ مش واصل والعيب مش فيها صراحة العيب ان احنا نشأنا على ان النظام يقول واحنا ننفذ دون المشاركة ودون المناقشة. النقاش انتهى ان المسؤولة قالت لها " انا بنفذ تعليمات" والمفروض  ان التعليمات تكون بمشاركة الناس بسؤالهم عايزين ايه بدل  التوهم بالمعرفة وكأنهم قطيع...

قصر الكلام يعنى انا عندى كلمتين بمناسبة الحادثتين دول..

1-      اللى معندوش مشكله وحاله مش واقف ومش ناوى يشارك الناس ان البلد ينصلح حالها.. احب اقولكو ادخل اى حمام فى اى مركز تجارى او مطعم وشوف الناس عايشه ازاى ومبتشكيش الشكوى الساذجة والسخيفة بتاعتكو دى.. ايه الدلع الماسخ ده.. انت احسن لك تبوس ايدك وش وضهر وتعد على كنبتك انما كفاية بقى رزالة على الناس ومسخرة على الناس الللى ماتلها عيال.. ربنا مايحكم عليك فقدان عزيز وكمان قتله بدم بارد غدرا.. اسكت بقى عشان للصبر حدود

2-      للمسؤولة المصونة.. انت مبتشتغليش فى وزارة الداخلية عشان تنفذى تعليمات واى بنى ادم بيحاول يقوللك اصل الناس عايزة والشعب ده مايجيش غير كده هقوله انت بس بتعمل من نفسك مغفل بمنتهى البساطة اللى عابز يعرف الناس عايزه ايه يسألها ومش اهل الكنبة والساحل والفيسبوك..يسأل اهل مصر اللى نسيوا يعنى ايه حلم ويعنى ايه امل ويعنى ايه عيش واكبر امل عندهم بيت ملك يسترهم وعيال يتربو ويتعلموا وكرامة تمنعهم من السؤال والانحراف وكل دى حقوق مابتتشحتش لو البنى ادم مالقاهاش بياخدها غصب..

اقول تانى.. دعونا نقف احتراما لفقراء مصر الذين خشينا ان نثور عسى ان تكون ثورة جياع والناس عملت باصلها وحميتلكو بيوتكو وماتوا بدلكو.. ماتضطروهمش يعملول اللى انتو فاكرينهم هيعملوه

وخلص الكلام سلام

عودة الندل

مين هو الندل يا جماعة.. مين هو.. الندل هو اللى اول ما يشم نفسه كده شوية يتمرع عليك لامواخذة..

تتميز هذه المرحلة اللى احنا فيها بعودة جميع الندلاء من هنا وهناك.. يتميز الندل عندنا انه عايز يقسم الكيكة قبل ما تخلص فى الفرن او انه يورث الميت قبل ما يموت.. هيبيع نفسه والبلد والعيشة واللى عايشنها والقضية وامه شخصيا فى سبيل المصلحة "الشخصية".. مش العامة.. يولع العامة على فكرة..

الندل هو من الممكن ان يتاجر باّلامه واّلام الاخرين فى سبيل كرسى (ليس تيفال).

الندل هو شخص لا تزول عنده الندالة بكبر سنه بل على العكس تزداد اكثر وتتفحل وتتتوغل وتقتل وتستمر وتستمر وتستمر.. الندل كل ما يكبر يحلى ويتحول من مجرد ندل لواطى متحول زى ترانسفورمرز كده..

الندل يبيع نفسه للشيطان.. الندل بيطلع فى التلفزيون كتير اوى اوى. الندل هتلاقيه دايما بيكلم عن استقرار البلد وحبه ليها وانه عايز يقوم بدوره للبلد اللى هوه طبعا لازم يكون دور قيادى. الندل هو راجل مستحمى ومتكلين (ريحته حلوة) جاى بعربية يرتدى اى حاجة بدلة جلباب او اى كان انما هو نضيف.. الندل معترض دائما وضد اى فكرة مش لاى سبب غير انه مش هو اللى عاملها فقط.. الندل سهل عليه قوى التعريفات يعنى هتلاقيه بيقول على المتدين اسلامى والمش متدين علمانى او ليبرالى هتلاقيه بيقول على المتظاهرين قلة على المعتصمين بلطجية.. المعتصم طبعا لو لابس تومى او رالف لورين يبقى متظاهر محترم او جاسوس انما لو غلبان وحاطط جل فى شعرة وبيحاول يبقى شكلة زى تمورة يبقى بلطجى طبعا..المصريين عندهم بالنسبة له يفتقدوا الوعى والفطنة والاستعداد للديموقراطية..

الغلابة عنده غير مهمين اطلاقة لدرجة انه بعضهم فكر فى اعتبار الامّى بنصف صوت المتعلم.. الشهيد عنده مقتحم للقسم. ورشوة اهل الشهيد عنده ديه.. والصح عنده حنبليه فارغة والغلط عنده اسلوب للحياة... طبعا الطبيعى ان الناس عنده يا اما مندسين من امريكا يا من السعودية وهو اساسا بياكل عيش يا من امريكا يا من السعودية.

الاسم الحركى للندل هو النخبة او النكبة زى ما بعض الناس مسمياهم..

ندالة النخبة تتميز فى عنجهيتها المفرطه غرورها المتزايد وافراطها فى احساسها بنفسها بشكل يبعث على الغثيان.. تكمن الندالة اصلا فى انهم عينوا نفسهم متحدثين باسم مجموعات من الشعب وهم ما لم يحدث ولم يخول اليهم هذا الدور من اساسه...بل على العكس دول دخلوا الناس فى سجالات وخناقات ووصلات ردح لا تمس الشارع بصلة على الاطلاق... النداله الاكبر بقى ان مش بس انى بدخل الناس اللى هما شايفنهم غلابة فى خناقات عن الدستور ونيجى مثلا عن ان الناس بتاكل بالجزمة وبيضرب عليها قنابل مسيله للدموع انتاج 2011 يعنى لسه فريش ماتلاقيش لأى فسل حس.. مجرد شجب وندب...نفس الطريقة بتاعة موظفين وخونة وطراطير مناديب الجامعة العربيه لما اسرائيل تخبط الخازوق.. الناس دى عندها انها تطلع فى التلفزيون اهم بكتير من انها تعمل اى حاجة مفيدة اوتقول كلمة حق فى واحد غلبان او يقفوا زى الرجالة..

رساله اكثر نداله:

الى كل عشوائيين الطبقة الكوول... انا اسفة البلطجية من الطبقة دى... مش الغلابة.. الناس اللى بيضايقها قوى شكل التوكتوك وعمرهم ما سألوا نفسهم ان التوكتوك بيحل مشكلة ناس ولا ان مين اللى دخل الجهاز ده مصر ومشاه فى الشارع قبل ترخيصها؟ واللى زعلانين قوى من الميكروباصات... انت تعرف تعيش عيشتو وتبقى كويس..طب ده دلوقتى والمرفهين بيكسرو القانون لمجرد المزاج.. الاسبوع اللى فات واحدة ست مصممة تدخل عكسى وبتجبرنا على الرجوع بضهرنا فى الشارع.. قاومنا وفى الاخر بتقول " ما كل حاجة غلط انتو بس اللى صح"؟ وبعد ما اصرت واصطف خلفها سرب اضطرينا للخضوع لها..

ادى يا سيدى المرفهين.. خد عندك بقى.. عربيات حمص الشام على الكوبرى عشوائية انما الكافيهات اللى شاغلة الرصيف فى الزمالك مش عشوائية..شياكة... الفرح الشعبى عند تمثال رمسيس فى طريق المطار بلطجة انما اشغال وسط البلد عشان فرح "كول" اناقة.. الزحمة فى وسط البلد مأساه انما التزاحم عند سيتى ستارز استثمار وجذب للسياحة.. واللى عنده مثل يقوله

والندالة بقى ان دووووول يسموا الغلابة اللى مات منهم ييجى 800 واتصاب منهم ييجى 5000 واللى اتسعّر كل شهيد منهم 5000 جنيه مش طايلنهم وان هم دول اللى خلصوا الدنيا يوم ...28 مش حضراتهم اصحاب الكنب والشلت والجرى فى السوبر ماركت وقت الثورة وشراء ربع طن لبن و40 رغيف فينو باعتبار ان كنا هنقلب الصومال فى يوم..

انا عايزة اضم صوتى لصوت محمود سعد يا جماعة قولولنا المتظاهرين يلبسوا ماركة ايه طيب عشان مايبقوش بلطجية.. هه؟؟؟ ولما نبقى كلنا ولاد ناس وماشيين زى الناس نبقى نشتم بعض...

واحب برضه اعترف بحاجة.. اللى بتقولو عليهم حوش دول هما اللى بيأكلونا عيش.. انا شخصيا بشتغل فى شركة جل اللى هى العيال بتلزق شعرها بيه وتنزل الشارع.. واى حد بيشتغل فى بيبسى وبى اند جى وهنكل والخ الخ.. الناس دى انت بتقبض عشان هما بيشتروا

ماتضطروش العما الطبقى والندالة الاجتماعية دى تدفع بالناس دى بدل ما كانت بتحميكو وعملت بأصلها وخلفت ظنكو وماكانتش ثورة جياع ماتدفعهمش للقيام بالثورة دى عن طريق انكو بتدخلوهم فى خناقات مالهاش اى تلاتين لازمة زائد قهركو وحكمكو عليهم..

على فكرة اللى مشكلته ان تماراى هيقفل وعشان كده بيتخانق.. بجد مشاكل عموم الناس اهم بكتير من احتياجك للسهر...

 "من كان منكم بلا خطيئة فليرمها بحجر" المسيح

احب اوضح انى مش ضد الحريات ولا مع الفوضى بس انا فععععلا ضد هذه النخبة المستفزة اللى ملهاش اى لازمة..النخبة اللى نشأت وترعرعت فى ظل حكم استبدادى صعب (وليس مستحيل) ان يظهر منها مجموعة تحترم الحريات تتفهم الفقر وترسى العدالة وتزرع الديموقراطية وتوالى التغيير المستمر..

ولأن عودة الندل عودة شكلها عودة قوية والندلا صوتهم عالى وراجعين راجعين..

محتاجة اننا نقف جنب بعض مش ضد بعض... فانشاءالله الاجابة 8 يوليو

 والله الموفق

واليكم كليب عودة الندل

وخلص الكلام.. سلام

عن التحرش فى مصر...الست السوبرمان

من نعومة اظافر اى بنت فى مصر، يجب بالطبع ارساء مبادئ انها بنت من قبل ان تولد. اول مبدأ فى حياة اى بنت هو ان الحكم عليها من هنا وطالع من خلال الشكل الخارجى. لو هى لسه مولوده.. هتلبس روز وفى الاغلب هيتقالها "انت طالعة وحشة كده لمييين؟؟ معلش بكره هتبيض!! شبه ابوها ربنا يستر! بكره خاويها وهاتلها الولد بقى!"

هتكبر البنت من يوم للتانى هتبدى واحده واحده تحس ان المتطلبات الحياتية تتزايد تتزايد.. يزيد النفاق الاجتماعى المطلوب منها.. يزيد الاهتمام بشكلها فى حدود النطاق اللى يتناسب مع التقبل الاجتماعى وتتناقص الطموحات يوما بعد يوم ليتناسب مع الاختيارات المتاحة بالنسبة لها..

مش مهم ابدا هى ايه نوع الشخصية.. المهم هو الرداء الخارجى للمخلوق ده مع تدريبة يوميا للاستعداد للدور الاول والاخير فى الحياة وهو الزواج والانجاب..

كراسة الشروط الحياتية للبنت هى التالى:

مؤدبه- بمعنى انها صوتها واطى- طيّعة- لا تتناقش ولا تجادل– تمشى فى حالها- غالبانة وعايزه تعيش- ملهاش تجارب قبل الجواز معروفه باسم خام- بتصلى وتصوم (فى كل الديانات)- متعلمة- محجبة-

اللون: بيضا وحلوة ومش مسلوعة ولا تخينة- شعرها طويل وسايح ونايح...

الوظيفة- وظيفة حكومية او شبه ذلك- يعنى بتخلص شغلها مش بعد 3-4 كده عشان ترجع البيت

سيل المتطلبات لا ينتهى عند هذا الحد بل يستمر بعد الجواز...

الست اللى فى الاغلب هتسيب الشغل لو بتشتغل او هتشتغل عشان تساعد فى المصاريف لازم تشوف لوازمه وتزبّط التزابيط وتفيش الهوامش احيانا من الاكل والشرب وخلافة..طبعا مش محتاجة ان نقول انها لازم تكون بتخلف..ويا ريت لو بتجيب صبيان..

الست نفسها دى لازم تكون برضه واخده بالها من نفسها يعنى مسؤوليات الامومة لا بد الا تؤثر علي هيئتها.. الشكل لازم يكون مظبوط شيك سكسى والشعر لازم يستنى سايح ونايح ولازم طبعا تكون فى منتهى السعاده بعد يوم حافل بالمغامرات وسباق الزمن فى الشغل والميكروباص والرجوع للبيت والترويق وتحضير الاكل والشرب والمذاكره وتوضيب نفسها كل ده لازم يكون فى حدود الامكانيات المادية المتاحة والوقت برضه.. فوق ده بقى لازم تكون كل الخدمات دى مقدمة والوجه مشرئب بالفرحة والسعادة والانشكاح عشان اول ما يطل سى سيد كده بطلته البهية لازم تكون سعيدة سعيدة سعيدة لا بعدين الراجل يشوفله شوفه تانية..

كون ان كل ما سبق حقيقى خارجيا جدا وكون انه جوهريا ماليان مشاكل.. كون ان النفاق الاجتماعى ده اّن له ان ينتهى..لأن بمنتهى البساطة زى ما المجتمع عمال يحط قيود خارجية للشكل الخارجى للبنت زى ما معظم البنات بنوع من التطبّع تقدر ترسم الشكل الخارجى المطلوب وتخفى او تحاول جاهدة القضاء على اى طموح داخلى بس عشان نقدر تتعايش اجتماعيا..

والبنات والسيدات فى مصر مش بس تأقلموا تماما مع الحقايق دى لأ بيرسوها فى بناتهم واحفادهم وجيرانهم والحياة بتمشى..

انما المشكلة هنا ان كل التضحيات دى مش كفاية... ليه لأن البنت والست فى مصر درجة تانية ولأن الطبيعى انها اضعف (من وجهة نظر البعض) فالطبيعى هو الاستهانة بحقوقها واعتبارها مشاع للتحرش من باب الرزالة احيانا و من باب القهر احيانا..

يعنى فى اوجه كتير للتحرش يكون الغرض منها فقط الاستهانة والتريقة على الشخص او المجموعة واظهار عدم احترامك ليه..عدم الاحترام ده بيتطور طبعا مع اختلاف الشخص لانه يصل لخدش الحياء وانا حقيقة مبحبش اللفظ ده.. لأن الافعال دى مش خدش الحياء هو استباحه شخص كده من بابه..بتستبيح لنفسك فرض نفسك على شخص بالرزالة احيانا والتنباتة احيانا والقذارة احيانا والتعرض باللمس او الضرب احيانا على مرأى ومسمع من الواقفين احيانا..

التحرش مش بس ان الشاب او الشيخ (يعنى راجل كبير فى السن) يتعرض لفتاة او سيده على اساس ان ده اظهار اعجاب او سخافة.. لأ هو زى لعب الطاولة كده تسليه..

التسليه دى بقى مش بس تسئ للبنى ادمه اللى انت اهنتها فقط لأ ولمراتك وبنتك واختك وامك.. وده سببه ان الشخص ده ينظر نظره دنيوية لكل دول.. هو شايفهم اقل منه..

هو بعد مابياخد البنت اللى من الكتالوج دى شايف انها تحت امره ..ايه يعنى اما يبصبص لواحدة تانية...

الست فى مصر خدت مقلب... بعد ماوافقت على انها تكون "مطابقة للمواصفات" خدت مقلب... مقلب ايه؟ مقلب عشان لاهى فى معظم الاحيان بتعيش مع رفيق العمر الحبوب ولا بتكسب شغلانة هى حباها ولا هينفع تبقى مزه.. ومضطره تركب الميكروباص وتشتغل سوبر مان صبح وليل.. ومضطرة ترسم شكل اجتماعى عشان يتناسب مع الزوج والاولاد والاب والبيت والشغل والمنطقة والميكروباص..

وبعد ده كله.. المكافأة الكبيرة.. وهى مروّحة عالبيت بتكح تراب.. تسمع لفظ بايخ لما تدور تلاقى امين شرطة بيعاكس... ترجع تكمل الطريق لا ترد ولا تاخد حقها ولا تقول قدام حد عشان الطبيعى ان هيتقالها

"انت كنت لابسه ايه..اكيد انت اللى ماشيه تتقصعى..مانت لو ماشية محترمة ماكانش حد بصلك"

وخلص الكلام.. سلام

Please leave your comments about this blog..

بطلوا ده واسمعوا ده.. ياما شوفنا كتير وياما...

حاجتين النهارده بصراحة سمعتهم والدم ضرب فى نافوخى!! كالعادة يعنى انا حاسة الدم خلاص هيستوطن فى نافوخى من كتر ما بيضرب هناك اهو بدل المشورة يعنى.. المهم..

وانا راجعة فى امانة الله وزحام الخميس واستعدادا لاجازة ابليس اذ بيى "افوجأ" وانا بقلب فى الراديو وسط كميه البرامج المستفزة واللى بيقدمها عيال (استغفر الله) مش مهم يعنى واحدم دكتورة اسمها ايمان.

اعتقد ان الاذاعة كانت راديو مصر والست الصراحة كانت فى منتهى الموضوعية والجدية.

من الواضح ان الدكتورة ايمان تعمل فى مستشفى جامعى كبير. وغالبا من خلال مكالمتها وشكوتها انها فى القاهرة يعنى من الاخر معدودين. طبعا لبعض مرتادى الفيسبوك والتويتر وحاملى الاى بود والباد والفون والاى لاينر برضه معندهمش خلفية اوى غير انها فوضى ومش مستوى وكده.

طبعا ناس كتير ماتعرفش اى حاجة عن كم الاهمال والتسيب والضغط على المريض واهله.. مايعرفوش برضه ان الطبيعى عشان المريض (يتحجز) فى المستشفى (يتحجز لفظ دارج شعبيا بمعنى دخل او ادميتد بالانجليش هو بيعبر عن احساس السجن برضه). المهم عشان يتحجز لازم دور والدور عايز وسطه والوسطة مش موجوده فلازم تزبيط والتظبيط محتاج فلوس والفلوس لو كانت موجودة ماكانش راح مستشفى جامعى. الالطف ان فى اغلب الاحيان الناس تيجى من شتى المحافظات وتاخد دور وبعدين من الزحام متدخلش فيروحو وييجو تانى لحد ما ربنا يكرم. وتانى وتانى.. طبعا التحاليل والاشعة والكراكيب دى على المريض وهى للعلم مكلفة جدا. الجديد هو ان المريض المحتجز لازم يا اما يتبرع لبنك الدم او يحيب حد من اهلة او اصحابة او اى حد لفصيلة معينة مطلوية.. على فكرة ده شرط مش اوبشن يعنى لا يقع الا بوجود وسطة..

طبعا الاكل والشرب والسرنجات والقطن وبعض الادوية والاكراميات كلها على حساب المريض واهلة اللى هيتشحططوا رايح راجع من البلد للقاهرة.. الظروف دى لا تفرق بين اى حالة ان كانت ولادة او لوز او حتى استئصال ورم سرطانى (بتخافو من كلمة سرطان؟؟) اوكيه كانسر او المرض الوحش.. (نصيحة روح معهد الاورام اللى لسانهم نشف عشان يشوفوله مقر تانى.. هه؟  مطلبوش يحققو مع مين كان السبب لأ بس شوفولنا سراير)

نرجع للدكتورة ايمان اللى اتكلمت وبمنتهى الصراحة بتقول المستشفى مافيهاش موارد ولا فلوس ولا علاج ولا اى حاجة على الجنط (الجنط هو ال.. مفلسة يعنى). والاستقبال قفل والمرضى بتيجى وتروح. الامن بيأمن ماتشات الكورة وسايب المستشفيات.

 والست اوضحت انه مستشفى جامعى والمشكلة مش خاصة بالمستشفى دى.. والمستشفيات الجامعية فى  القاهرة هما  تلاتة اربعة يعنى سهل نعرفه..

انا ليه محروق دمى.. عشان الناس اللى اعضائهم كبرت من القعاد على الكنب وبتوع الدستور اولا ولا الاتنتخابات ولا البيضة ولا الفرخة.. كل همهم بس الليبراليين والاسلاميين واليساريين.. هو يا جماعة الدستور ده مش المفروض يخدمنى انا المواطن؟؟ تفتكر المريض اللى فى المستشفى ده يفرق معاه ببصله اللى انت بتقوله؟  هيفرق معاه  لو كلمته عن رعاية صحية، تعليم، كرامة، كفاءة، تكافل؟؟ هه؟ عارف فى ناس بتبيع اعضاءها عشان مصاريف المدرسة وفعلا كلامك ده صفر واقل من الصفر وتفاهه ورفاهية مايملكهاش.. اتكلمو كده على الناس عايزه ايه حاسة بأيه.. بالمناسبه اللى فاكر انه نفد وممكن يدخل مستشفى خاص على اساس ان الوضع احسن..جود لك فعلا.. انت واهم وربنا مايكتبها عليك .

فى مصر العيان بيدفع التمن انه عيان ويعامل معاملة المذنب وانا مسؤولة عن كلامى..كفاية ان اللى عندهم سرطان الناس بتخاف منهم وبيخافو يقولو اسم المرض.

المهم انا مهتمه اعرف انهى مستشفى جامعى ولو حد له معرفة يدلنى لو سمحتو..

نيجى للنقطة التانية.. بخصوص اننا بنقول حرية.. ولما حد بييجى يقوللى الاسلاميين هيحجبو الناس بالعافية (وده قصور فكرى وفقر فكرى وتخلف عقلى عامة) بقول ده ماينفعش ومش دستورى وانا هنزل اتظاهر فى الشارع لو ده حصل.. ماعملناش ثورة عشان نروح من ديكتاتورية للتانية.. حلو؟؟ والجماعة الليبراليين يسقفوا ويحبونى وكده..

 انما ابص يمينى كده الاقى العيال فى جامعتى عاملين افتر جراد ممنوع المحجبات؟؟ نعممممم؟؟؟ ماهو نفس المبدأ يا أمامير؟؟ وزى ما هتظاهر ضد اقصاء اى فكر مهما كان زى ما هتظاهر ضد التمييز ده؟؟ ايه الموضة دى وبناءا على ايه بتحكم على ناس تجيلك بلبس معين ولبس عقيدى فى وجهة نظرها؟؟ وازاى اتحاد الطلبة يتقبل ده ومايكتبش انتقاده؟؟ دى برضه مش دستورى فى اى بلد فى العالم..فى امريكا مفيش كده ولا احنا هنقارن روحنا يا اما بالسعودية يا باسرائيل؟؟

خناقة اهل الكنبة بتوع البيضة والفرخة من الناحيتين الاسلاميين والليبراليين هيقولو حاجة ولا هما غاويين بس جعجعة فى التلفزيون.. ؟؟؟؟؟؟؟؟؟ هه؟؟ ردوا عليا؟؟؟

واضح ان مبدا الاقصاء وسط النخب القديمة موجود ومتأصل ومش نافعين مش نافعين مش نافعين...

امشوا غوروا عايزين ناس حقانية مش ملوثة من ايام القرف. عايزين نكلم فى بلدنا واهلنا واولادنا عايزينهم ازاى مش انتخابات الاول ولا الدستور ولا الزفت..

انصحك بقراية الاربع لينكات دول لعل وعسل عن الدستور والثورات والبنات المحجبة

وخلص الكلام مش سلام.

http://www.shorouknews.com/Columns/Column.aspx?id=475518

http://www.youtube.com/watch?v=ACYusZII748

http://www.almasry-alyoum.com/article2.aspx?ArticleID=300514

http://www.facebook.com/profile.php?id=741985248#!/notes/menna-adli-el-kiey/%D9%85%D8%AD%D8%AC%D8%A8%D8%A9-%D9%8A%D8%B9%D8%B9%D8%B9%D8%B9%D8%B9%D8%B9/10150215688362904