فهم مواطنه مصريه غير متخصصه
من الديباجة وحتى الباب التانى - الفصل الاول
ملحوظه: المقال طويل جدا- لو من النوع اللى بيزهق ماتضيعش وقتك!
زمان زمان اوى يوم ما نزلنا يوم ٢٥ و٢٨ مرورا بكل يوم عدت فيه الثورة والمواقع والاغانى ولحظة التنحى واول حلقة لباسم يوسف واغنية فى كل شارع فى بلادى.. فاكره كويس كل احساس فى الاول وفاكره القرار اللى اخدته عشان نجيب طفل ومفيش داعى للسفر لان اصبح فى امل فى البلد. فاكره كمان انى قررت يومها ادى كل حد فرصه للحوار والنقاش افتكرت انا كنت عايزه اعمل ايه وادرس ايه ومكانى فين.. كان طبعا عندى امل ان جهاز الشرطه يبقى جهاز مستقل والتعليم نبدا نغيره والاعلام يتحرر والفنون تنطلق والنضافه فى كل حته.. انا فاكره نقاشاتى مع السايس واللى بيساعدونا فى البيت والقعده مع عم عبد الله البواب ومجموع سواقين شارعنا فى حلقات نقاش مطولة.. وبمرور الوقت ابتدت الامال تتحول لجولات صراع من اجل البقاء .. المرحلة الانتقالية اصبحت انتقامية برعايه المجلس العسكرى ومباركة من الاخوان اللى شايفى ان المتاطية مع الريح بتجيب نتيجة. وصلنا اخرا لجولة الاعاده بين شفيق ومرسى ودى الحقيقى كانت بداية النهاية وده لان الاختيار وقتها كان لمجرد الاختيار بين سيئين..
انا اسفه عن تطوبلى وجهلى ولكن دا حد فهمى للعربى اللى المفروض مبسط للبنى ادم البسيط..
عن الدستور.
بداية هذا الدستور الحقيقة غير مقنع وهو وثيقة ممكن تكون اى حاجة غير دستور لعده اسباب:
١-اللجنة التاسيسية بكل اعضائها السابقيين والحاليين والمنسحبين: انا انتخبت نواب مجلس شعب مش نواب عنى فى لجنة تاسيسية وبناءا عليه فكذبة انها منخبه غير صحيحة بالنسبى لى. انا تم التلاعب برايي والتاسيسية اصلا بها عوار واضح
٢- انا لم يمثلنى اى شخص فى اللجنه دى اصلا واللجنة مش اقل من ٦٠٪ منها اتجاهات دينية حتى الكنيسىة والازهر .. مع تبجيلى لمناره الازهر فهى غير منوطه بتمثيلى فى الامور الحياتية واظن الكنيسه ذات الشئ
٣- كل تلك المناقشات وساعات العمل لم يسالنى احد ولم يتم استطلاع رايي عن اى شئ ولا حتى الروية العامة للبلد ولا حتى سمعت حد بيتكلم فى النقطة دى؟
٤- كل مصادر الاطلاع على المسودات والصورة النهائية كانت من خلال الفيسبوك قبل اى صحيفة او مصدر موثوق وتم نضليلى عمدا او اهمالا بكمية مسودات مهوله لا يعتد بها
٥- المسوده النهائية الحزينه كانت وفقط من خلال الانترنت وحد علمى ان مستخدمى الانترنت فى مصر اقل من ١٠٪ وبناءا عليه فالمواطن العادى العامل معظم اليوم اغلب الظن لن يقرا لانه عنده ١٥ يوم يقرا ويفهم ويناقش ويستوعب ويصنع قرار وغالبا سيخضغ لشحن طائفى السلطة الحاكمة هى السبب الاول فيه وعموما هو هيسمع كلام يا اما التوك شو يا اما الشيخ او الكنيسة
٦- تم التقامر علينا فى خلال اسبوع بان تسهينا الدوله باعلان دستورى ثم الانتهاء من الدستور الكفته فى سواد الليل وكانه عقد عرفى مش عقد اجتماعى ثم حشد مؤيدى الرئيس تحديدا فى يوم معين لتاييده على قراره باعلان الاستفتاء وكاننا فى مسلسل رخيص او مواطنبن درجة تانية او مغيبين او غير مؤهلين
٧- اخيرا، انا اصلا معترضه اجمالا على الطريقى التى تم بها التصويت وميعادة والوقت المخصص لدى للقراءة والفهم والنقاش ومعترضه على طريقة التعامل مع ناس المفروض انهم رجال دولة كانهم فى فصل ومعترضه على اعضاء الاحتياطى اللى جم يقولو امين ومعترضه على قسمة البلد نصين ومقامره بالبلد من اجل مكاسب سياسيه او شخصيه بحته .. انا معترضه على الابتزاز مبدا انا والديكتاتوريه ولا الدستور الجديد؟ هو هو مبدا انا ولا الفوضى.. ومعترضه انه يتم اهمال كل موجات الاعتراض وكانه ولا شئ ومعترضه على استغلال الوضع اللى ناس كتير فيه اقتصاديا بتمرير دستور ان لم نفترض فيه سوء النيه لكننا نرى فيه دونيه المستوى الذى كنا نامله لدستور كلنا اتبهدلنا عشانه سنتين ..
ولكن قررت انى اقرا الدستور بند بند واكتب ملاحظاتى واسئلتى.. واعذروا عدم فهمى لانى غير متخصصه
١- الديباجة:
- اولا يعنى ايه دى وثيقى ٢٥ يناير. دا دستور مصر عموما ولا يملك احد ان يتحدث باسم ٢٥ يناير خصوصا. دا المفروض عقد اجتماعى للبلد مش لحدث بعينه. اعذرونى بس دى مجاملة رخيصه شوية
- ثالثا: النساء شقائق الرجال وشريكات فى المكتسبات والمسؤوليات: ويرد عليها فى الماده الخامسه عن تكافؤ الفرص كمان وذكرت كلمه مواطنات لمره اولى واخيره فى الدستور. وبناءا عليه فالمواطنه جزء من المسؤليه الوطنيه ولكل لم ترد اطلاقا اى ماده بمساواتها بالرجل فى الحقوق ولم ترد مواطنات ككلمه بعد ذلك، وحذفت المادة الخاصه بالمراه كلها عشان محدش يزعل. انما ذكرت المراه المعيلة والعامله كلاهما مره واحده وهكلم عليها بعدين.
تاسعا: الامن نعمة كبيره. يعنى ايه؟ الامن هو من اصل الحياه ومسؤليه الدوله والمجتمع..
حادى عشر: ذكرت الكنيسه (مفرد) وانا حد علمى فى ٣ كنائس فى مصر
٢- المقومات الاساسية:
- مصر موحده غير قابلة للتجزئه: يعنى ايه؟ ماهى موحده من ايام مينا؟ حد يفيدنا ماهو المخزى من الماده
- الشعب المصرى (يعتز بانتمائه لنهر النيل وافريقيا) - انا الحقيقه شايفه ان ده تعريف هزيل.. مصر جزء مهم من افريقيا ونهر النيل شريان الحياه بها ومورد امن قومى.. انما نعتز بالنيل؟ كاننا بنعتز ببورتو مارينا يعنى..
- يشارك بايجابيه فى الحضاره الانسانيه؟ يمعنى ايه يشارك بايجابيه؟ اذا كنا غير معترفين باى معتقد غير سماوى هنشارك ازاى؟ نروح نصدر بطاطين للكنغو مثلا؟
-٣- انا فاهمه مبادئ الشريعه الاسلامية انما يعنى ايه مبادئ شرائع المسيحيين واليهود..
٤- لماذا الازهر من مقومات الدولة. اظن مكانه يجب ان يكون فى الجهات والهيئات والمستقلة. ويسرد انه يؤخذ راى الازهر فى الامور الخاصه بالشريعه؟ طب ماهو الدستور كله لازم لا يخالف الشريعة وبناءا عليه يؤخذ راي هيئة كبار العلماء اجمالا. الى اي مدى يؤخذ برايه؟ ومين اللى هيعين هيئه كبار العلماء؟
شيخ الازهر مستقل وغير قابل للعزل, كان ممكن اضافه الا بما يرد فى القانون من مخالفات مثلا. انما اجمالا كده غير قابل للعزل؟ ويحدد القانون طريقه اختياره.. اشمعنى؟ الدستور محدد كل هيئات الدوله واختيار رؤساءها ماعدا الازهر واللى اظن ان الشيوخ صرحوا انهم عايزينه بالانتخاب.
٥-
٦- مبادئ الديموقراطيه والشورى: الماده دى المفروض تكون مع اول ماده.. وانا مش فاهمه مبادئ هنا معناها اهداف الديموقراطيه ولا الديموقراطيه كنظام.. وما المقصود بالشورى لو فى ديموقراطيه؟
٧- لا يجوز ان ينشا حزب سياسي يميز بين المواطنين؟ ( ما اى حزب قائم على اساس دينى حزب يميز بين الاديان) ضرورى اضافى ايه انواع التمييز (اقتصادى واجتماعى وطائفى وعرقى وجنسى)
المقومات الاجتماعية والاخلاقيه:
٨- ما هى سبل التراحم؟ وما هو حد الكفايه؟ يعنى يجب تعريف حد الكفايه بالنسبه للوضع الاقتصادى والاجتماعى الحالى
٩- طبعا كلمه المواطنات يجب ان تذكر كل مره بتكتب مواطنون..كلمة مواطنات لم تقرن بالمواطنون ولا مره, ولم يذكر ان للمراه اى حقوق بل هى فقط مشاركه فى المسؤليه ومكتسبات الثوره يعنى التصويت وبس.
١٠ تحرص الدوله على الطابع الاصيل للاسره المصريه وتماسكها واستقرارها؟ اولا غير واضح اصلا ما هو الطابع الاصيل للاسره. وكل اسره ليها طابع وكل مدينه لها طابع . واصلا غير واضح ماهى اصلا السبل اللى هتخلى الدوله تحرص على تلك المبادئ. ةكيف تحرص على استقرارها مثلا؟ السبب لسؤالى الا يكون ده ضوء اخضر لتعنت قانونى لقوانين الطلاق مثلا او الورث او الزواج الثانى. وده ممكن جدا لان الفقره تنتهى بما ينظمه القانون.
- نفس المادة ا دى تنص على الاتى: تكفل الدولة خدمات الامومة والطفوله بالمجان (حلوه الحتة دى), والتوفيق بين واجباتها نحو اسرتها وعملها العام؟ يعنى وضع كلمة التوفيق بين امرين فى مادة مفادها الحديث عن الاسرة معناها ان تكون الاسره اولويه (والاسره اولويه لاى ست على فكره مش محتاجة خالص تذكره من حد, ولكن ما اراه هو تلميح لمايقضة المراه بين عملها العام واسرتها. اما ان كانت الماده تقصد مثلا ان المراه تاخد حقوقها كامله فى العمل العام وحرص الدوله الكامل على توفير كافة سبل التوفيق بين الاسره والعمل كما ينص القانون (يعنى اننا نسهل عليها حياتها مش نعملها ابتزاز نفسى) واصلا انا مش شايفه اى مشكله لاضافى الرجال فى الدستور لان استقرار الاسره ليس دور المراه وحده.
- اما فقرة الاهتمام بالمراه المعيلة والارمله والمطلقه فيجب سرد امثله للاهتمام المذكور والا لا داعى لذكر ماده كده من باب الفنجره
- تكفل خدمات الامومه والطفولة/: يعنى يا ريت حد يسرد ايه هي الخدمات.
١١- مادة الادب والاخلاق والحضاره والحقائق العلمية: انا مش فاهمه ايه الدور اللى تتخذه الدوله لحماية الاداب والاخلاق العامة. فلو يكون فيه توضيح لما كان فى ذهن كاتبى الدستور. وما هى الحقائق العلمية اللى هنحافظ عليها الارض كروية مثلا؟ ولا الحقائق العلمية مثلا ان البنت تنفع للزواج عند البلوغ؟ وان المراه غير الرجل بيولوجيا؟ واصلا لا يوجد اى حقيقة علمية مؤكده فى المطلق يبقى يا ريت توضيح. والقانون هينظم ايه هنا بالتحديد.
١٢- تعريب العلوم والمعارف: انهى علوم وانهى معارف. ياريت نركز نمحو امية ٤٠٪ من الشعب و٢٠٪ متعلمين بيقروا بالعافيه اولا وننهض علميا ومعرفيا ويكون لينا اختراعاتنا وبعدين نعربها براحتنا. انا شفت الاستاذ جمال حشمت تقريبا بيدى مثل ان العلوم معربه فى سوريا!! طب مش هرد!!!
ثالثا: المقومات الاقتصادية:
اولا: الدستور لا رؤيه اقتصاديه له اصلا.. يعنى كلام مرسل. وانا اعرف الفرق بين الكلام المرسل والخطوط العريضه. يعنى احنا نظام اقتصادى مثلا راس مالى منتفتح عالبحرى؟؟ وانا مافهمش فى الاقتصاد كتير انما لو النيه انه يكون زى ما هو حاليا فانا اسفه ده اسمه فشل.
- ايه هى التنميه المطرده؟
- يستثنى احيانا وطبقا للقانون بعض موظفى اجهزة الدوله من حد اقصى للاجر. ليه؟ وماهى الاستثناءات؟ ماهو مادام قلت استثناء يبقى فى قاعده واحنا استثنيناها لسبب او قضيه او حاله.. ماهى؟
- من هم اهل البادية؟ اهل الصحرا يعنى؟ الباديه ده مش مصطلح قبلى بعض الشئ؟
١٥- انا سعيده ان الزراعة لها ماده لوحدها والاعتراف بها. ياريت حد من الاخوة الفلاحين يطمنونا انهم مرتاحين ليها
١٧- الصناعات الاستراتيجيه: ما هى تلك الصناعات تحديدا؟ طيب مادور الدوله فى الاحتكار، تكافؤ الفرص بين الاستثمارات الاجنبة والمحليه. طيب العماله واولويه العمل للمصريين- حقوق العمال فى التنمية- الموارد البشريه عموما ودور المستثمر فى نعضتها- البيئه الامنه للعمال والقاطنين حولها)
اصلا ماهى الرؤيه.
١٨- الثروات الطبيعية: اصلا لازم سرد للثروات الطبيعيه. الاراضى والصحارى ونهر النيل- البيئه النظيفه الحدود.. الثروات الطبيعيه برضه هى كل ما بداخل الاراضى والبحار فى محيط حدودنا.
كل مال لا مالك له هو ملك للدوله: لماذا لم يضف بما يتظمه القانون؟ لان الماده واسعه اوى كده.
١٩- نهر النيل ياعالم يا هوو- نهر النيل منصوص انه ثروه قوميه- نهر النيل امن قومى امن قومى يا عالم -ويجب اصلا ان الماده دى يا اما تكون فى مقومات الدوله او الامن القومى.
٢- الماده ٢٠- بتتكلم على الثروات والممرات المائيه- والحقيقة لازم تضاف للماده ١٨ وخلاص..وياريت الممرات المائيه نسميها باسماءها (قناة السويس) وبكده يكون ده ملك للشعب
٢٤- الملكيه الخاصة مكفوله وهايله ولا يجوز فرض الحراسه عليها الا بامر قضائى- وبعدين فجاه يقول, وتنتزع للمنفعه العامة؟ يعنى ايه وماهية تحديد المنفعه العامه. ثم يضيف مقابل تعويض يدفع مقدما، والاصح ان يضاف ان التعويض بما يتناسب مع اسعار السوق والوضع الاقتصادى الراهن.
٢٥- ما هو الوقف الخيرى اللى الدوله عتعيد انشاءه ورعايته؟ واشمعنى البند ده اللى فيه رؤيه مستقبليه
٢٧- انا مفهمش فى حقوق العمال كتير: انما افهم عربى. انا شايفه مسؤوليات عليهم ومش شايفه حقوق ليهم الا فى مجالس الاداره. طب فين حقوق العمال فى التنمية البشريه, دخل كريم بدلات بيئه أمنه للعمل وبيئه نظيفه ومواعيد للعمل محدده.
-فى نقطة, لاحقا فى الدستور يتم ادراج اسم عامل لاى حد يعمل مقابل مرتب او عائد. ده معناه ان التمثيل فى مجالس الاداره للعمال ولا الموظفين ولا مناصفه ولا ايه؟ ايضا شايفه ان ده فقط فى القطاع العام ويترك عامل القطاع الخاص والاستثمار الاحنبى تحت ضرس صاحب الدكان..
٢٨- تشجع الدوله على الادخار- يعنى ايه؟ بمعنى مثلا ان الدوله تفتح الابواب للبنوك ومؤسسات الماليه للعمل فى مصر.. ماشى حلو.. قول بس انت قصدك ايه بالموضوع
٢٩- ما هو التاميم اللى لاعتبارات الصالح العام وما هو التعويض العادل وعادل من منظور من؟ وما الفرق بين التامين وانتزاع المكيه فى الفقره ٢٤؟ كمان ما هى المؤسسات اللى ممكن تتامن؟ ايه نوعها؟
الباب التانى: الحقوق والحريات- الحقوق الشخصية
٣٣- المواطنون لدى القانون سواء وهم متساوون فى الحقوق والواجبات العامة لا تمييز بينهم فى ذلك؟ ممكن تكتبوا مواطنات كمان هداكم الله
٣٥- محتاجه تركيز: لازم اذن نيابه مسبب حين القبض على اى مواطن. وبعدين يقول انه بعد الحبس لازم يعرف سبب حبسه خلال ١٢ ساعه؟ طب ازاى مش اذن النيابه مسبب؟؟ وبعدين ممكن يعد ٢٤ ساعه خلالها يتم التحقيق. بعد كده بيقول حبس احتياطى وظروفه، ايه هى ظروف واسباب الحبس الاحتياطى وحالات التلبس.
٣٨- حريه التواصل وعدم التجسس على المواطنين بيقول لا يجوز مراقبتها ولا الاطلاع عليها الا لمده محدده؟ ده كلام؟؟ وبامر قضائي مسبب للشخص اللى هيتجسس يعنى.
٤٠- الحماية من الظواهر الاجراميه دى ممكن تتبدل بالجرائم لان المفهوم هنا هو ان الظاهر انها جريمة.
٤١- بند حقوق المراه لغى تماما. انا معنديش مشكله.. بس كل مره هتقول مواطنون اذكر المواطنات. او ضع ماده تفسيريه لان المواطنون تشمل الكل.
