قصه قصيره حزينة: ارث الخمسه جنيه ونص

قصة قصيره حزينة (غير حقيقية)

الحج علاء (رئيس عمال بمصنع بويات بحلوان- له ثلاث اولاد محمد-ايه- اسلام) اكبرهم محمد ٢٠ سنه - ثالث دفعته -سنه ١ هندسة بعد الاعدادى) 

ام محمد- سيدة منزل بالمقام الاول ولكن تنزل لسوق الخدمات وقت احتياج الاسره ( يعني دروس ثانوية عامة-مواسم-زنقة عيد) 

الخميس : محمد ينزل الكليه- يوصل يتبقي من مصروفه ٥جنيه ونص .. يحتاج محمد للذهاب للمطبعة لتصوير بعد الملازم.. 

الجامعة مقلوبة: العيال الاخوان عاملين مظاهرة والاسر التابعة واقفة معاهم. الطلبة خارجين يشوفوا ايه حصل.. 

الظابط ادى انذار بالفض وطلب من الشباب العوده داخل اسوار الجامعة. يرجع اغلب الطلبة وسط قنابل غاز محدوده.. محمد داخل الجامعة مالوش فى الكلام ده اصلا ولا له فى السياسة.. يتحرك لقضاء مشاويره ويخلص...

تبدا هجمات قوات مكافحة الشغب مره اخري .. قنابل الغاز تدخل حرم الجامعة هرج ومرج - اصوات سارينة عربات الامن المركزي -طلبه بتجري - شباب بتحاول تخرج البنات- فى خرطوش- لا حى - لا خرطوش- لا حى- طلبة مصابين- محمد متصاب برصاص او خرطوش. اسعاف ياخوانا.. خلى الشباب ينقلوه - من هنا لهنا- امر الله نفذ.

ام محمد والحج علاء فى المستشفي الجامعي. زمايل محمد.. 

يا ست ام محمد الواحد مش عارف يقولك ايه.. ايه يابني.. شوفى انت مؤمنة ودا امر الله-اعتبريه شهيد- اتصاب النهارده فى اشتباكات مع الامن.

ام محمد : لا يابني محمد مالوش فى الكلام ده.. محمد هيبقي مهندس ومالوش فى السياسه

الزملاء: ربنا يقويكى يا ماما. يا حج علاء ال٥ جنيه ونص دول كانوا فى جيب محمد. البقاء لله..

الحج علاء: خمسه جنيه؟ والواد؟ وال١٩ سنة اللى فاتوا وتعب السنين؟ والواد؟ 

الزملا والدكاترة: ابنك يعتبر شهيد يا حج..

علاء: ومين قال انى عايزه شهيد انا عايزه مهندس. انا عايز ابني.. 

الحضور: ربنا يعوض عليكوا .. لا اله الا الله 

الام: صمت مفيش حتى دمعه.. تصلبت كتمثال 'عدم نهضة مصر" 

تمت

عشان فايزه مش اكيد عايزه

في واحد من ايام التدوين والدوشه ضد التحرش والاعتداء الجنسي ضد المراه ومن الواضح اننا هنضطر اننا نعمم انه مش ضد المراه كامله النمو كامراه.. لا ده كمان بدانا ندرج تحت التحرش والاعتداء الاطفال مادون ال٦ سنوات واخرهن الطفله زينه..

والحقيقه انه من الصعب فى وجهه نظري ان المتحرش المتمرس صاحب الصولات والجوالات فى عالم التحرش انه هيكون مهتم بقرايه تدويناتنا على النت.. 

بقالي فتره نفسي اعرف ايه هي مبررات الاغتصاب والاعتداءات الجنسيه عموما؟ الاعتداءات الجنسيه على بشاعاتها موجوده فى كل العالم وبشكل يومي.. ايه مبررها وازاي المجتمع بينظر ليها وازاي بيعاقب المعتدين وازاي بينظر للضحايا؟ هل احنا كمصريين بنبص للامر بنفس النظره؟ وليه معدلات التحرش عندنا وصلت لمعدلات لا تصدق…

الحقيقه فى وجهه نظري ان المجتمع المصري مشكلته الاساسيه هو عدم الصراحه مع نقسه.. واجبار نفسه على ممارسه النفاق الذاتي وتغيير الواقع لحين تصديقه ورمي التهمه على الغير

قالولنا زمان ان جزء كبير من اسباب التحرش راجع للبنت ولبسها فلبست البنات الحجاب والكارينا الرداء كله.. قالولنا ان السبب كمان اخلاق البنت والاختلاط فامتنعت البنات عن الاختلاط.. قالوا الكبت الجنسي للشباب والمخدرات والبطاله …

كل ده جميل.. وكلها اسباب من السهل جدالها فعلا.. انما المشكله هنا هو ان دائما البعد عن السبب الاصلي للمشكله.. المشكله الاصليه هو عدم سياده قانون وان المعاكسه والتحرش  تم التصالح معهم من قديم الازل فى مصر.. الثقافه العامه بتبرر ده وبتنظرله نظره الكوميديا.. 

"بوز جزمتك يدل علي انوثه طاغيه" او طرقعه بوس عادل امام على المسرح فى الواد سيد الشغال وضرب الممثلات بالجزم .. احمد بدير ودوره الدائم فى الشرقنه على اى ممثله واعتبار ده نكته وكوميديا.. وتراث طويل عريض من ان البنت المفرطه فى شرفها اما هبله او سيئه السلوك وتستحق الضرب المعاكسه .. بالاضافه الى رسم صوره للزي المناسب للمراه وهو المحتشمه غير المحجبة.. يعني المحجبه تبقي متطرفه والقالعه منفلته.. فكره حريه اللبس اصلا او واقعيته فى الميديا منعدم.. اكتر من ٧٠٪ من السيدات المصريات محجبات ويتم التحرش بنفس ذات النسبه من المصريات محجبات او قالعات او محتشمات..

بالرجوع بقا للدول الاخري.. لا يقع اللوم على المراه الا فى عدم وعيها بالبيئه المحيطه زي بالضبط لو تمت سرقتك فى الشارع.. كون ان مع حضرتك فلوس فى الشارع لازم تتوخي الحرص .. ودور القانون يجيبلك حقك.. نقطه.. مفيش اي بني ادم يقدر يلوم على رداء اي حد.

 خلينا واقعيين.. محدش فى مصر ولا غير مصر محروم جنسيا .. فى ناس غير قادره على الزواج ايوا وفي ناس مش عايزه تعمل حاجه غلط ودول لا اظن هيدخلوا فى اعتدائات عنيفه.. 

اذا التحرش والاعتداء اللفظي والجسدي هي جريمه ونقطه لابد من تجريمها ثقافيا وقانونا.. لا مجال للفكاهه والضحك.. 

التحرش كمان فى مصر  اصبح انعكاس على انحطاط فى كل معاني الانسانيه بشكل عام .. الاعتداء الجنسي هو نظره دونيه للمراه باعتبارها اضعف.. ولان الشخص ده فى الاغلب تم قهره عموما يقوم يمارس القهر نفسه على من يظنه هو اضعف.. التحرش كمان حلقه فى سلسله من التمييز الدينى والعرقي والجنسي والطبقي اللي تفشي ويتم تدعيمه بصفه مستمره فى كل مكان.. يعني الغلبان بلطجي والغني حرامي والمسلم احسن من المسيحي والسني احسن من الشيعي والابيض احسن من الاسود والولد احسن من البنت والمحجبه احسن من الغير محجبه ..ده غير احساس الشخص دئما بنرجسيه رهيبه بشكل شخصي وبشكل عام.. كون اننا اجمل شعوب الارض وحسن ناس …كل ده قافل خالص مبدا الاعتراف بمشاكلنا.. فى الطريق لحلها..

البدايه للحل هو الصراحه فى مواجهه المشاكل والامور وبناءا عليه طريقه الحل تيجي .. انما مع التعنت دائما فى الاعتراف بالمشاكل والاصرار ان فايزه اكيد عايزه.. مفيش ولا مشكله هتتحل..

ولحد ما ده يحصل بقا انشاءالله.. مفيش سكوت عزيزتي.. وواضح اننا مضطرين للرجوع للاسلحه التقليديه الا وهى الشبشب :) 

الحل هو القانون وتغيير الثقافه.. والله اعلم 

حتى لا نستهبل اكثر من كده: We all screwed up

في بيت من ابيات قصيده للامام ابن القيم كان بيقول ايه.. فإن كنت لا تدرى فتلك مصيبة *** وإن كنت تدرى فالمصيبة أعظم

اظن ان معظم مرتادى الفيسبوك والتويتر الكرام انهم مروا على البيت دا هنا ولا هنا مع تحريف ولاد الحلال بسبب الكسل فى الكتابه على جوجل لتصحيحه

من الاخر كده وعشان نكون واضحين.. وعشان انا جبت اخري من الهري والمغالطه والفنجره والعجرفه والمزايده والندب والشحتفه والاستموات هما كلمتين

عزيزى الثائر: ثورتك فشلت وماهياش مستمره ولا حاجه.. ثورتك كانت عيش حريه عداله اجتماعيه وانت الحمد لله محققتش نص الاهداف دي حتى.. بل الاصح انك شاركت فى الماساه اللى البلد فيها بعجرفتك ووهمك انك قادر تصلح البلد فمحاباه الاخوان تاره ومحاباة العسكر تارات.. وحضرتك لابس لابس.. والوضع اسوا من الاول واحنا محققناش حاجه.. حتى برنامج باسم يوسف اللى طلعنا بيه من الدنيا فكس خلاص واحنا غير قادرين علي فعل اي شئ.. ياللا بقا نتزنق على سلم النقابات نزعق ونهتف ونهيص والبلد محلك سر..

عزيزى الاخوانجى: انت مش مظلوم. انت اخترت مصيرك. انت طول عمر قياداتك عينها بس على السلطه. حتى طريقتها فى مساعده الفقرا كان على سبيل الشحاته والرشوه فى الانتخابات ومخاطابتهم للالتحاق بالجماعه ومفيش يوم واحد الا يوم موقعة الجمل الا ووقفت مع الناس ولسه فيها قولان.. اول ما مسكت السلطه مكملتش سنه واحده واستاثرت واستغبيت واستعليت وظلمت. واول حاجه عملتها انت قمعت الثوار وتعاونت مع نظام كنا بنحاول اسقاطه

عزيزى الاخوانجى: اسوا شئ هو ان قياداتك بتورطك كل يوم ومات منهم اعداد قدمتوهم قرابين لحفظ تنظيم.. يعني انت ماصنتش دم اصحابك. اذا فهذا الجو من الاستموات والاستعطاف اسموا موحن.. احنا كلنا لبسنا اللبسه دى اصلا من تحت راسك.. فاسكت شويه..وياريت لو تقول اسف.. هتفرق

عزيزى محب (الجيش واللي ييجي منه) معنديش مانع خالص. حقك ومستحقك. تحب السيسي وعنان وطنطاوي والروينى وتنتخبهم لا مشكل.. انما بص بقا عايز تعيط يوميا ان مصر بتحارب الارهاب الداخلى وان الوقت وقت الحرب وان مصر ماشيه فى السكه الصح وان الاف البشر بيموتو كل شهر وان حوادث تعذيب وقمع وذل وتحرش ومقتل ييجى ٦٠٠ فى الشارع ان معاهم سلاح وان فى ماسبيرو الاقباط هجموا عالجيش وان مصر ام الدنيا واحلى بلد فى العالم فانت حاجه من اتنين.. انت يا اما كذاب اوى اوي.. اوي يعنى يا اما عندك مشلكه رهيبه فى التعامل مع حقيقه واقعه وبتصدق التليفزيون كانه باباك ومخك بيترجم حقايق بتشوفها عينك بشكل مختلف وبناءا عليه فانت يا محتاج تراجع ضميرك يا تشوف دكتور نفسانى ونظر عشان تركب نظاره لبصرك ونضاره لبصيرتك.. 

عزيزى السلفي… انت فين يا عم.. من ايام لازم حازم وانتو ربيتولنا الرعب.. مش باينين يعنى.. واخبار باربيكيو المدينه ايه.. شوف انا اعرف اسود الاسلام دول كانوا يقولوا ما يفعلون ولا يخشون فى الحق لومه لائم وانتو كلامكو كتير الحقيقه وباين انتو كان نفسكو بس فى الباربيكيو فهنيئا لكم به.. تصدقوا انت بس اللي طلعتوا بمكسب فى الليل دى..

اخواتي المواطنين.. حقايق يمكن تضايقك.. الحقايق دى كنا نعرف عليها من ايام مبارك انما احنا دلوقتي عارفين عنها وعارفين مدى حدتها وقسوتها وتكرارها.. 

وكالتالى بعض تلك الحقايق على سبيل المثال لا الحصر

- مصر دوله من العالم الثالث ثلث سكانها تحت خط الفقر- مصر بلد بها نسبه اميه كامله مش قليله وجهل عنيف علي جميع الاصعده- مصر فى اااااخر مصاف الدول تعليميا يعنى ترينداد وتوباجو مستوي التعليم الحكومه احسن من مصر (مصر اللى اخترعت الكتابه)- مصر مش ام المنطقه العربيه (يمكن كانت)- مصر خدماتها منعدمه من زمان- والعيشه فيها صعبه- مصر ثالث دوله عالميا للتحرش الجنسي (بعد افغانستان) ويتم السكوت عليه- مصر اثارها بتتنهب عيانا بيانا والناس القائمين عليها بيروحوا يحموا الاثارات بنفسهم واعرف ناس- مصر بلد سجونها مزريه ولا يتم الاعتداد بالاعراف الدوليه وليها قضايا تعذيب عده لحد اليوم- مصر دوله تتعامل مع المساجين باعتبارهم شكاير اسمنت فى شحنه بحيث يتم خنق المساجين فى عربيه الترحيلات دون ان يحاسب بشر- مصر بها اعلام خاص يقمع برنامج ساخر تطبيلا لحاكم عسكري واعلام حكومى يتبلطج ويذيع ماتش مش من حقه- مصر بلد اتغلب ٦-١ من بلد افريقي ورغم ان مدرب المنتخب امريكاني والماتش يذاع على الجزيره الا اننا لا نكف عن شتيمة البلدين. - مصر بلد غارق للاكواع فى منظمه فساد منظمه لدرجه انك ماتقدرش تركن عربيه من غير ماتأبج السايس- 

مصر بلد يذل فيها الاجانب اللى مش عالمزاج ويتدلع فيها اللى عالمزاج حسب مزاج الحاكم- مصر عندها مشكله مياه وعندها ملاعب جولف-مصر عندها رعايه صحيه تجيب العيا وسوء تشخيص وتلوث مقيت ونسبه عاليه من الاصابه بالسرطان.

اقوللك حاجه كمان.. انت اصلا محظوظ انك علي قيد الحياه.. انت  لو طفل مهدد فى اتوبيس مدرسه ولو فى قطر مهدد ولو فى عربيتك مهدد ولو مريض مهدد ولو بتولدى مهدده ولو واحده ست مهدده ولو مسيحي ليلتك كحلى ولو واحده ست او بنت مسيحيه ورايحه فرح ربنا معاكى.. 

احنا كمصرريين واخوات وايد واحده بنحل ازاي؟؟ انا اقوللك..بطريقه تسلم الايادى ونشيد غرباء بتاع الاخوان..

حضرتك طبقه راقيه تزيط للسلطه ال "اون ذا روكس" تبعت "تشاريتي" للفقراء

حضرتك اخوان تظيط عكس السلطه وتكلم الغلابه بنشيد غرباء وتبعت "خير" للفقراء

حضرتك طبقه وسطى اكتر واحد المفروض يسعفنا شاغل نفسك بس بالتليفزيون وزيت دابر فاتيكا.. لا فكرت فى تعليم عدل ولا حتى تصليح صرف حمام البيت (زي ذات كده بالظبط) 

حضرتك طبقي كادحه وبتحاول تعيش.

عندى خبر وحش.. مصر لا هي ام الدنيا ولا بالمنظر دا هتبقي قد الدنيا.. مصر مش محتاجه معجزه ولا ثوره.. مصر محتاجه ٥٠ بنى ادم بيحبوا البلد وعندهم ضمير وعندهم معرفه وبتوع شغل ومالهمش فى نظام السبوبه.. بس الحقيقه على راي باسم يوسف.. احنا مابيعشلناش بوبات..

انا شخصيا عايزه اتاسف عن احكام غلط اخدتها على ناس واراء غلط عن ناس وتقديرات غلط عن الثوره ومابعدها.. وشايفه انه الكل لازم يراجع نفسه ويخليه صريح كدا ويجيب من الاخر ويعتذر لانه we all screwed up