الصافى فى القرار الانتخابى الوافى -ليه شفيق لا

كبداية وقبل القفز بالاستنتاجات انى لن انتخب شفيق فانتخب مرسي، مش صحيح! انما عشان الصراحة انتخاب الفريق شفيق بالنسبة لى هو اعدام الحلم والسنة ونص اللى فاتوا! صحيح انا اؤمن ان الثورة هتيجى تانى امتى انا معرفش فشوفت ان واجب عليا ادافع عن الانجاز الوحيد اللى جيلى حققه بدل ما جيل ابنى ييجى يحقق ثورة ويقوللى 'عملتوا ايه انتو؟'  طبعا كل واحد حر فى اختياره انما الداعى الوحيد اللى يخلينى اكتب البتاعة دى مش انى املى عليك اختيار ولا اقنعك بثورة وتغيير ولا اتهمك انك 'اسلاموفوبيك' ولا اشتم فى اياً من المرشحين. الغرض هنا هو انى اقول انت حر فى اختيارك انما ارجوك لا تحاول تبرر الينا بفوبيتك الرهيبة او محاولات لتبرير قرارك بمبررات مالهاش اى منطق. لو هتنتخب شفيق خليك زى شفيق. الراجل واضح وصريح ومبارك بالنسبة له مثل اعلى ولم يتنصل من الجملة. انت بقا متقوليش انا ثورى وباختاره! قول اقنعنى او انك شايف انه انسب او حتى يلعن ابوكو كلكوا بس اتسق مع ذاتك. نفس الكلام بالنسبة لمرسي وانصاره..اختيار البعض نابع من انهم شايفين انه اختيار انسب مش معنى كده ان اللى رافض الاشتراك فى الانتخاب بالامتناع او الابطال خايف او جبان. اطلاقا. هو شخص متصالح مع مبداه وشايف ان الاختيارين بالنسبة له هباب حتى لو هباب احسن من هباب مهبب! طيب ليه بالنسبة لى شفيق لا: ١- انصار شفيق: ليس سرا مطلقا ان انصار شفيق اللى من الاول هم من كانوا ضد الثورة وضد اللى بيحصل وده حقهم رغم انى عجزت عن فهم السبب. انما ماشى. المجموعة بتاعة انا اسف يا ريس وتحالف محمد محمود وعمرو مصطفى وعمرو اديب وتمورة وتامر من غمرة والهام شاهين ولميس جابر وسماح انور. طب سماح انور لازم تدين بالفضل للثورة اللى بعثت اسمها على الساحة من جديد. وطبعا خالد الذكر الاعلامى توفيق عكاشة. انا لا اتبع منهج الشباب اللى ذكرتهم فوق مع احترامى لهم طبعا انما اختلافنا على مبادئ فى الحياة وانا بشوف معظمهم عنده هسهس. وبارانويا من الاخر مفرطة لدرجة تقبلهم القمع طالما انه لا يطالهم. لا يمثلونى وبالتالى من يختارونهم لا يمثلونى برضه ٢- المؤامرة الاخوانية القطرية الايرانية الامريكية الاسرائيلية الكنتاكية! لا شك ان الاخوان ضربو المثل فى الندالة والرزالة والجهل وعدم الكفاءة. بل واهتمام المجلس الموقر بملابس المواطنين الداخلية اكتر من قوت يوم كان العنوان الرئيسى للجلسات طوال ثلاث اشهر. ولكن الاخوان فى الاخر ليسوا جزءاً من نظام قمعى استبدادى حصر البلاد وقتل من قتل واعتقل من اعتقل وافقر الجميع. ٣- ييجى واحد يقوللى الاخوان مش مفروض يكون معاهم كل حاجة ولو ركبو هيشبطوا: سليم انما للامانة ولا حد فينا يعرف جايز احسن من ما شوفنا وجايز اوحش. الاهم انه طوال ثلاث اشهر فائتة لم تصمت القوى السياسية ووقفت امام اى قرارات للبرلمان بدليل اللجنة التاسيسية وده معناه انه سهل اننا نوقف القرارات ةاللى مضايقانا لو اجتهدنا ووقفنا بالمرصاد وده شغل الاعلام والمجتمع المدنى والشعب. الشعب نفسه لم يهتم بالتصويت لهم وخسرو ١٠مليون صوت فى تلات اشهر. بل ان الخمسة مليون صوت اللى مرسي اخدهم دول نتاج ٨٠ سنة شغل الاخوان والخمسة مليون بتوع شفيق نتاج ٦٠ سنة حكم عسكرى! ومن اول ما خيارات مدنية طرحت نفسها اخدت مش اقل من عشرة مليون صوت.  ٤- تعالو نعد الاجهزة المهمة فى الدولة: جيش او مؤسسة عسكرية مهولة- داخليه- قضاء- شعب وشورى- حكومة ومؤسسة رئاسة- مخابرات عامة وعسكرية- محليات- نقابات- اعلام. بالعين المجرده وبالفتاكة لو حصل الاخوان على مؤسسة الرئاسة هل تعتقد انها تتحول لمستبد وقاعد فى السلطة وهى لا تمتلك اى سلطة او صلاحيات على مؤسسات كبيرة بالشكل ده؟ انا عايزة اقول ان الاحزاب السياسية دايما تطمع فى كل حاجة بس بالمخ كده ٤ سنين كافيين فى السيطرة على كل تلك المؤسسات؟ اكييد لا خاصة لو احنا صاحيين قوى وواقفين بالواحده زى ماعملنالهم فى البرلمان. انما مع الفريق شفيق انت بتحط البيض كله فى ايد الجيش والبرلمان يحل وفورجيت ايت لو شوفتوا انتخابات تانية! يبقى مين اللى عايز كل حاجة فى جيبه؟ فكر يا عزيزى المواطن!  ٥- شفيق فرد مدنى والاخوان جماعة دينية: مرسي جماعة دينية متشددة كمان وغامضة ومريبة وتحتاج توثيق ومراقبة انما هو مين اللى اداها الوقت دا كله من غير اى تسجيل رسمى وسابها ترزل على الناس؟ المجلس العسكرى. وعشان يكون فى معلومك سيظل الوضع على ماهو عليه عشان تفضل الفزاعة عايشه! وعلى فكرة الفريق شفيق مش فرد ومش مدنى طبعا الفريق شفيق مؤسسة عسكرية اعلامية مخابراتية داخليه قضائية هو النظام بذاته فلو كفة حد اقل تبقى مرسي مش الفريق شفيق. وطبعا هو ليس مدنى مش عشان بيلبس مدنى يبقى مدنى! هو عسكرى من مؤسسة عسكرية يعتز بذلك ويصرح به وده يحسبله. وبعدين انتو مش قولتو ابو الفتوح لسه اخوان عشان طول عمره اخوان، ما شفيق برضه من العسكر عشان قضى عمره فى الجيش .. المبدا  واحد! ٦- الاقباط: اتفهم تخوفهم ولا احكم على حد بل بالعكس هما ضربوا المثل فى عدم الانسياق ورا المؤسسة الدينية بدليل تصويتهم لعمرو موسي وحمدين ومش قابلة الناس اللى ظايطة فى موضوع شفيق والكنيسة دا شغل لجان الكترونية. انما انا عايزة افكركم بس ان بداية الثورة كانت مظاهرات شبرا بعد كنيسة القديسين اللى لحد دلوقتى يرفض المسؤولين الافصاح عن مرتكبيها! طب حادثة العمرانية؟ طب حوادث الكنايس اللى بشهادة الشهود شغل امن دولة وش . طب سيبوا كل ده ماسبيرو.. ابشع ابشع ابشع حادثة فى وجهة نظرى اما غسلوا مخ الناس وقالوا ان المجند ارتبك فقتل ٢٧ مواطن ارتباكا والاعلام اشتغل لاجل انقاذ الجيش من الاقباط. انا عارفة انكو مابتطيقوش الاخوان وده حقكو انما المدرعات المرتبكة؟ عايزة افكر الكل ان الاقباط قدموا اول شهدا للثورة من نوفمبر والقديسين ومن اطهر الشهدا اللى هو مينا دانيال.  ٧- البرامج الانتخابية: بينما يتقرب الاخوان للشعب  ببرنامج موضبينه اخر توضيب فيه كل شئ بالتفصيل، طبعا محدش قراه بل استقطعو حتة تاجير قناة السويس لقطر دى اللى ماظنش فى بنى ادم يكتبها حتى لو ناوى يعنى. انما الفريق شفيق تعالى على الشعب ومقدمش برنامج. اللهم فلاير فيه الخطوط العريضة لمشاكل مصر اللى كلنا عارفينها ٨- العلاقات الخارجية: الكل هيموت ويرجع العلاقة مع امريكا! بدليل ان زى ما شفيق راح الغرفة الامريكية خيرت الشاطر برضه كان ضيف شرف الشهر اللى فات. امريكا يهمها علاقة كويسة مع اسرائيل ومصالح اقتصادية راس مالية والاخوان والمؤسسة العسكرية معندهمش مشكلة فى الاتنين. ٩- نيو ليبرالى: الفريق شفيق قدم نفسه كمدنى نيو ليبرالى. انا مش هقول غير حاجة واحدة 'انتو بذمتكو تعرفو ايه هو النيو ليبرالى' ؟ وطبعا ليس الفريق شفيق مدنيا ولال مكانش هيبقى فريق. بالمثل، يرى انصار مرسي انه اخد افضل برلمانى فى العالم. مين الى انعم عليه بهذا اللقب والمننافسة مع مين طااه؟ حاجة بطيخ. والطريف انه بيقال انه درس فى امريكا. انا معرفش درّس ازاى والانجليش قالب معاه فيومى كده. وطبعا طله الاستبن صعبة جدا. دا غير جنسية اولاده اللى لم يفصح عنها .   ١٠- تصريحات: بينما ان تصريحات مرسي سمك فى مية ومخارج الفاظه تنم عن تطجين مبالغ فيه الا ان تصريحات الفريق شفيق اللى عادة لما مبيكونش متعصب بيبقى مؤدب جدا وبيقول يا فندم على طول ومع ذلك تصريحات شفيق لا تناسبنى. حيث انه شايف المواطن المصرى 'مطيع' بطبعه ومطيع دى بتحسسنى بضرب الشبشب او انى كلب. دا غير انه لم يستبعد استخدام القوة المفرطة لفض التظاهرات ولم يحدد حتى اى صيغة قانونية او حتى نوع معين من التظاهرات. بل ان الفريق شفيق يعتز بمبارك وعمر سليمان اللى الشعب المصرى عانى منهم حبتين تلاتة اربعة على اقل وصف.  واخيرا يهدد الفريق شفيق بكشف المستور للعديد من الناشطين من خلال علاقتهم بامن الطولة اللى المفروض منحل واللى وجود المعلومات دى معاه ان صحت يدل على انه متفق مع سياسات جهاز امن الدولة وان الجهاز حى يرزق عادى. ١١- الكفاءة: بينما يعتز الفريق شفيق بكفاءته كوزير طيران مدنى واظن انه كان ناجح الحقيقة الا انى اذكر يوم حلقة يسرى فوده وكنت ساعتها شفيق مش مضايقنى خالص لما اتسال: الناس هتنتخب بالرقم القومى ولا البطاقة الانتخابية لم يعرف؟ يعنى اجراء صغير زى ده ومش حتى سياسي مكنش عنده اى خلفية عليه! يبقى معيار الكفاءة هنا مجروح برضه!  ١٢- انا مش واخده توكيل من الشهدا بالحديث عن دمهم بس انا راضية زمتكم بعد سنة ونص من الثورة المضادة المدبرة اروح اعمل بالظبط اللى هما عايزينه منى؟ وهما هنا معناها الاخوان وشفيق عشان الاخوان عادى يتفقوا مع المجلس على التقسيمة ويبيعوا ويسيبوا شفيق يكسب حتى؟ يعنى بعد انضف من فيكى يا بلد يموت تحت المدرعات وبالسلاح اللى دافعينه من ضرايبنا نعيده تانى؟  واحد هيقوللى هنعرف نشيل شفيق ومش الاخوان. هو انت بتنتخب عشان تشيل؟ وبعدين دا المجلس العسكرى اللى مالوش شرعية مش عارفين نرفع هيمنته علينا هنعرف نشيل اللى جاى بشرعية؟ انما ارجع واقول النهاردة او بكره ربنا له فى خلقه شؤون.  ١٣- هنبقى زى ايران وافغانستان وبتاع- هنبقى كده بمزاجنا ومش هنبقى كده بمزاجنا برضه وبعدين احب اطمنكو ايران شيعة يعنى ولايه الفقيه ده شئ مقبول احنا معندناش ولاية فقيه. وعلى فكرة الشعب الايرانى عايش حياته ميت فل وسبعتاشر وابقو اسالو اى حد عاش هناك. ولو ان انا ضد المجتمعات المنافقة عموما يعنى. واخيرا حد حاسس ان شفيق ومرسي زى سليم البدرى وسليمان غانم كده. بالرغم من راسمالية الاتنين وانهم زى بعض فى حاجات كتير الا ان الصراع بينهم صراع طبقى يعنى هتلاقى الطبقة العليا مع شفيق لانه يمثلهم ومرسي شبه الغلاب فى لبسه ومعرفته بالطبقات الكادحة مع انه راسمالى بحت. للمرة الاخيرة انا لا مع ده ولا ده .. كل الحكاية قلت افضفض بكلمتين وارجو من اى شخص ناوى يختار اى مرشح ميبررش اختياره لو مصمم تبرره يا ريت يكون فيه منطق عشان كلنا نتعلم. وشكرا

خلص الكلام: تصوت او لا تصوت تلك هى المشكلة

مبداياً كده انا لا ناشط سياسي ولا محلل استراتيجى ولا حتى بفهم فى الانتخابات ولا التحالفات ولا اكتر الناس ثقافة ولا ثورية! فى هذه الظروف العصيبة واللى هيبقى عندنا رئيس جمهورية منتخب من الشعب ذات نفسه اللى انتخب البرلمان، وفى نفس اليوم الذى يجب فيه اننا نحتفل بام 'العرس' الديموقراطى ينتحب فيه بعضنا، ويكتئب فيه بعضنا بل ويرتعد فيه بعضا اخر. على مدار السنة اللى فاتت انا مكدبش عليكو الدنيا عندى اتفلترت. كان عندى امل، رجعت اكتب تانى، فكرت يمكن فى الحاجات اللى بحبها واعدت استنى الثورة لما تخلص عشان اعملها ..انا حتى قلت ارجع ومقعدش مع جوزى عشان مكونش زى اللى بيجرو ويسيبوا البلد(طبعا مع اسباب اخرى). انا مكدبش عليكو انا النهارده حاسة انه الامل ضاع وخلص وانى حاليا فى مشهد النهاية من فيلم الارهاب والكباب! المهم اكتر حاجة الواحد استفادها من السنة ونص اللى فاتوا هى انه اتعرف على ايجيبشنز! والصراحة فى عدد من المشاهدات اللى اعتقد مش من الحكمة اطلاقا انى اقولها بس بصراحة انا فى مود صراحة وفضفضة جايز عشان انا حاسة ان نفسي هتقفل من الكتابة لو شفيق او مرسي كسبوا! - الخوف والهلع والفوبيا: اكتشف ان احنا كمصريين بنخاف قوى من بعض ! يعنى للامانة المجتمع المسيحى فى مصر يخاف ان تتولى شؤون البلاد حكومات محافظة دينيا خوفا على هويتهم وفى نفس الوقت يرتعد اللى بيتقال عليهم الاسلاميين من نظام الدولة اللى دائما وجدت فى قمعهم اوتاد تدعم شرعيتها ! فى نفس الوقت وكلامى هنا على الناس العادية وليس القادة، يشعر الاسلاميين دائما وابدا ان الليبراليين دول بيبصلهم من فوق ومتقنعرين قوى عليهم وفى اى فرصة هيقضوا عليهم. الاحساس ده مخللى الطرفين ميتين من اشباح لا اساس لها من الصحة وطبعا النظام القمعى هو السبب. -حب تعذيب الذات: يتميز الكائن لمصرى انه دائم الحكم على الشعب انه جاهل وحيوان وغبى ومنافق واجرامى ولا يستحق اى ديموقراطية بل واخره معانا العيش على المعونات والصدقات! بالرغم ان شعبنا بشكل عام شعب طيب واخلاق ولو قارنت نسب الاضرابات والاعتصامات والجريمة ونوعيتها والظروف اللى بتحصل فيها هتشكر من كل قلبك بلطجية مصر. - السادية: بعض المجموعات تري ان التخلص من المجموعات المختلفة معاها حلال فيهم. خلينى اقوللك ان احساسك ان حياتك انت تعنى اهانة وموت الاخرين ده احساس سادى .. بمعنى لو شايف ان فلان يستحق يعتقل مثلا او حتى يتضرب زى البرادعى او حتى شفيق عشان انت تعيش هو نفس مبدا البعض انه اعتقال الاخوان هو الحل..ده فكر طايفى مستبد غير انه غير واعى وجاهل ومش صحيح كمان! وهو الطريق الامثل لنزاعات اهليه. -مصر التى لا يعرفها احد: لما تتفرج على سي بي سي مثلا وتلاقيهم بيكلمو تحس انهم فاكرين ان البلد اغلبيتها ناس شبه المذيعين وان اهالى العشوائيات وضحايا الفقر واموات السرطان دول اقلية! اطلاقا الجعانين دول هما الاغلبية وجوعهم السبب فيه النظام ولما. بيحصل انفلات امنى اول ناس يعتدى عليها ولما بيحصل مظاهرات هم اول من يقتلوا ويصابو وتشوه سمعتهم واعراضهم التى لا تسوى ولما تسوى جثثهم بالارض لا يتذكر احد غير ان المدرعة ارتبكت لتقتلهم وانه نار النظام ولا جنة غيره! - العسكر ملهمش فى السياسة! اكبر مقلب تشربة على بق واحد. لا يفهم العسكر فى المسايسة لكن يفهم فى المكر والخداع وعشان كده اتخدعنا سنة ونص نعود فيهم للمربع الاول. -نفس الناس: هما هما نفس الناس اللى كانت ضد الثورة هما بتوع اسفين يا ريس هما بتوع المجلس العسكرى هما اغلبيتهم ناصرى شفيق! العسر حويط والترتيب معمول من زمان. -الاخوانى بيئة: هو بيئة ومتامر وشق الصف الثورى واصبح شوكة فى ضهر الثورة ولكن فى الاخر مواطن غير مسلح رزل وغبى وجلياط انما غير مسلح! - انتخب النظام وبلاش حدتانى عشان يجيبلى الامن. حد لسه مش واخد باله ان الامن والبنزين بيقطعوا حسب الظروف ؟ زى الفتنة الطائفية. - افة حارتنا النسيان: ماسبيرو امبابة اطفيح منشية ناصر جمعة الغضب موقعة الجمل قناصة الداخلية تهريب المساجين موقعة مسرح البالون مجلس الوزا التبول على الناس سحل البنت محمد محمود رمى الجثث فى الزبالة! شفت تعليق لشخص انه يفضل انتخاب ابليس ومش هتنتخب مرسي لانه يكره المسيحيين ولكنه لم ير ان المجلس العسكرى يدهس المواطنين ويجند التليفزيون ليشعل فتنة ويحرض الناس على مهاجمة المتظاهرين المسحولين تحت المدرعات! ده اقذر انواع الكره -مجتمع الكريم شانتيه: وهم ولاد الناس الاكابر اللى دائمين الحكم بالسلب على الشعب المصرى ومعايرته بجهله وقرفه اللى هو مالوش فيه يد! اكثر الطبقات جهلا واندفاعا وهلعا وطبقية وطائفية مقنعة تحت ابتسامة وشعارات هى الطبقة الغنية الفيسبوكية! فهم دائمى الندب ويعتقدون ان الحوار على الوول بيجيب عيال! ونضال حقيقى! وكمان مش عاجبهم الغلابة! الغلابة اختاروا ٧٠٪ مرشحين راوو فيهم تغيير واتعرفوا على برامجهم. انما ترفع وانانية المرشحين هى من اتت بالمهزلة اللى احنا فيها دى. ايتها الطبقة النضيفة يا تتعلموا يا تسكتوا ارجوكو! واخيرا احب انبه ان الانتخابات الرئاسية ما هى الا مسلسل اخره ان المجلس العسكرة حاكما برئيس دون صلاحيات محدده وان البرلمان الزباله لو كان طلع قانون العزل بدرى كان نفعنا! ياريت لا داعى للندب وكله ينتخب زى ماهو عايز! واخيرا لا انسي البرادعى اللى بامانة مقالش اى حاجة غلط لحد دلوقتى! وخلص الكلام ..سلام!