عزيزى المواطن.. تمرد بحق ربنا

انا للامانه ولا هنا عشان اقول لحد انزل ولا اطلع..مش لاى سبب غير انى مش فى البلد فمش هفنجر من جيب غيرى.. 

انما انا لو فى مصر كنت قطعا نزلت ودا لان الباشمهندس واصحابه مش بس خدونا سلمه للكرسي وزحلقونا من عليه.. لا دول كمان لا عارفين يدوروا البلد ولا فارقه معاهم انها تدور والباشمهندس قسم البلد تقسيمه بنت ستين غير مكترث اطلاقا باللى ممكن واللى فعلا بيحصل..

انما يبقى السؤال الوجودى اللا منتهى .. حقا حقا..لماذا لا يموت ولاد الوسخه.. يعنى ليه بيموت احسن الناس على طول.. فى بلادنا احنا بالذات ونفضل احنا مزنوقين بين تنتون وتنتن..

ليه يعنى نختار ما بين اما عساكر او دقون.. او فى ظروف ابشع.. مزيج مزرى من الاتنين..

يا نعيش ننضرب بالعصايه وننفذ الامور يا نعيش نخاف من الاكل بالشمال لانخش النار.. ايه بقا..

فين الابداع طيب.. فين التغيير.. طب فين البنزين..

انما نقول ايه.. كما تدين تدان وطول ما المصلحه الفرديه هى المحرك الاساسي لاتتخاذ اى قرار سياسي.. هيفضل الوضع كده.. يعنى مره الاخوان هيكسبوا معركه ومره العسكر معركه مفيش مره الشعب هيكسب اى معركه..

المهم يعنى.. لو ناوى تتمرد يا ريت بلاش تتمصلح بزياده.. يعنى ماتقوليش دم الشهدا مثلا وانت مكانش فارق معاك من سنتين .. ماتقوليش بنزين عيش وميا وكهربا لانها قطعت عند حضرتك بس ماتقوليش حريه لانك لاول مره تحس بعدم امان وماتقوليش بنزين لانك وقفت مره فى طابور بنزين..

حضرتك قررت تثور لانك عشت حياه الفقير يومين.. ولذلك قررت التمرد..حقك طبعا.. ودا السبب الحقيقى لتمرد الناس.. وده برضه السبب الحقيقى لتمرد الناس من سنتين ودا السبب الحقيقى اللى هيخليهم يثوروا تانى لو دا ماتحققش..

يعنى استقرار حضرتك غير دائم..

طبعا ايادى مرسي البيضاء على تفحل الطائفيه والعنف فى البلد شئ مقزز انما للتذكره البحته.. حضرتك طائفى برضه.. يا متعلم يا متنور يا بتاع "الفيس" يعنى مع كل احترامي لحبك الشديد للجيش… بس لما الجيش قال ان فىه شيعه وحزب الله فى التحرير فى ٢٠١١ حضرتك قلت عليهم "اخيه" ولما زماان كده ظهروا البهائيين برضه قلت اخيه..انما بقا دلوقتى بقا فى مفاجاه اننا طائفيين.. طب يا متعلم يا مثقف حضرتك طائفيتك هي من دعت من هم دون منك تحضر وتعليم ووعى لقتل احد شيوخ الشيعه وكل واحد على قد علامه.. بالاضافة لمباركه القائمين على البلد قطعا

وطبعا.. اذ فجاه تظهر تعاطفات مع الجزار بشار الاسد وتعاطفات مع رئيس روسيا!! 

يعنى كون ان جبهة النصره دى شئ مقزز من العنف الطائفي البحت فبشار برضه جزار بس.. ووارثها ابا عن جد بغض النظر عن الشق المذهبى للامر.. 

المبادئ لا تجزأ يا ساده.. ومن منكم نسي ماسبيرو ومحمد محمود ومجلس الوزرا وغيره ومن منكم نسي ١٦ جندى قتل والاف الشباب المحتجز من ٢٠١١ وما دون ذلك.. ومن يصر على الاستعانه بالعنف ليجابه عنف لن يجد الا المزيد منه..

مفيش حاجه بتدوم.. لو مش هنغير بلدنا عشان كلنا نعيش كويس مش عشان نمارس اقصاء للغير فلا تطلب من المختلف معك ان يغير رأيه..

سيبقى من يؤمن بالاخوان مؤمنا بهم وسيبقى من يؤمن بغيرهم مؤمنا بهم .. والوطن يجب ان يسعنا جميعا..

فى الاخر يا جماعة..مؤيد كان ام معارض.. احنا كمواطنين هنقوم وننام فى وش بعض.. والسياسيين بينهم مصالح تتقابل يوم تختلف يوم ليهم بعض.. 

ارحل يا مرسي عن الحكم.. ارحلوا يا جماعة الاخوان.. لم تفشلوا فى اداره فقط.. بل اخرجتوا مخزون الشر فى المصريين كلهم…

اخى المتمرد.. تمرد بالحق..