فين سندوتشى!

من 5 دقايق بالظبط جه مديرى كده سألنى سؤال قاللى " انتى بتحبى السلمون؟" قلتله "ايوة ليه هو السلمون تحت محظورات الطوارئ؟" دخل مكتبة وخرج وقاللى "طب خدى السندوتش ده اصلى مبحبوش متخافيش ده بيتى "  انا مش عايزة السندوتش على فكرة انا فطرت... صحيح هو سلمون وكده والازمات والعجلات الاقتصادية السلمون بيبقى طبعا شحيح..بس انا فعلا مش جعانة وعندى سندوتشى. المهم نظرا لانه مديرى ومراته عملت السندوتش اضطريت اخده عشان انتو عارفين..اكل العيش!

اولا: ازمة سندوتش العيش الحاف

الموقف ده يا جماعة يلخص حاجات كتير فى حياتنا اهمها طبعا ان السندوتش بقى قيمة اقتصادية مهمة فى ظل التهديدات الرهيبة للبسكلتة الاقتصادية الطاحنة واللى معاها بتقل فرصة المواطن صغير او كبير من حيث السندوتش بتاعة ...

ثانيا: السندوتش الاجبارى

انا مواطنة موظفه عندى متطلبات فى شغلى وفى بلدى وعملنا ثورة طويلة عريضة وكلنا عمالين نحاول ننجحها بعدين فى الاخر المدير عايز يدينى بدل اللى انا عايزاه سندوتش وسندوتش على مزاجه مش على مزاجى.. على اساس انه يعنى ده الموجود ويا تاخدى ده يا ماليش حاجة.. وكل مافتح بقى يعد يقوللى مش انا اديتك سندوتش وستدوتش غالى عايزة ايه بقى.. مش كفاية انى مارامتكيش بالسندوتش فى وشك؟؟ هو حد لاقى سندوتشات دلوقتى بصى حواليكى كده... ده الكل بيضرّب بالجزمة فاحمدى ربنا انى اديتك سندوتش وماسمعش حسك تانى.. انت عايزه توقفى حال الشركة على فكرة يا تاكلى السندوتش يا تسكتى..

ثالثا: قسمة السندوتش

 نفس ذات السندوتش ده بيفكرنى قوى بالحوار الوطنى اللى هو لا حوار ولا وطنى.. اولا لان التراشق بالسبابات مش حوار اصلا ده بيسموه بالبلدى ردح والوطنية هى انك تييجى على نفسك عشان الشخص اللى انت معترض معاه قبل اللى متفق معاه! فمش وطنى والاهم اى قعدة فيها مرتضى منصور مبتبقاش قعده اصلا بتبقى خناقة.. المهم ان اكيد المشكلة فى اختيار الحضور.. ليه بقى لأن فى نفس اليوم كان فى  مؤتمر تيد اكس واللى مر بمنتهى التحضر والتقبل للاخر لان فى ارضية موحده للنقاش مش سوق عكاظ... واكيد مش كل الحاضرين من نفس الخلفية يعنى.. دول رايحين يحلو ودول رايحين يردحوا

رابعا: خناقة السندوتش

 الاحزاب الليبرالية كل شوية تعيط وتقول الاخوان هياكلو السندوتش مننا (على رأى نوارة نجم).. واول ما الاخوان يحسوا ان اليبراليين كسبو نقطة يعيطوا ويقولو انهم قطموا قطمة من السندوتش اللى هما اتفقوا عليه.

خامسا: سندوتش النخبة:

عارفين يعنى ايه نخبة.. يعنى الناس البوبات (جمع بوب أى برنس)  دى اللى بتمثل مجموعة.. اديكو امثلة... حمزاوى نخبة..ساويرس نخبة.. عصام العريان نخبة... مايكل منير ..الائتلاف بقو نخبة..عمرو خالد والشيخ حسان  عارفين الناس اللى هى على طول بين العاشرة مساءا و90 دقيقة والقاهرة اليوم وبعدين نلخبطهم كده فى كل قناة شوية... وعادة دول اللى بيقعدوا مع المجلس العسكرى وبيفهموهم انهم يعنى فاهمين الناس اللى معاهم وبيكلمو باسمهم..

السندوتش ده بقى لذيذ قوى عشان فى نجومية وشهرة وسبوبة تقديم بورنامج تليفزيونى – او حزبى- مش فارقة.. وكمان زن زن زن على صناع القرار بقرارات مايعلم بيها الا ربنا..

اللذيذ بقى فى السندوتش ان النخبة اللى عندنا فى كل مرة بتثبت فشلها بشكل مريييع.. يعنى واضح جدا ان الناس العادية بتفكر بطريقة والنخب دى بتنده فى وادى اخر تماما.. احسن على الله يسكتو بقى..

سادسا: سندوتش الدين..

اهو ده الحراق بقى..كوميديا سودا ..اه وربنا.. السندوتش ده متساب فى الفريزر ووقت العوزة ولاد ال...حلال يحطوا فى المكيروويف وهوب.. ولا ولا ولا ولعت!! وعادة يستخدم كده يوم سبت عشان بس نوضح ان الناس اللى بتنزل الجمعة عاملة فوضى وكده..

سابعا: السندوتش الفاضى: وده للاوضاع المريبة الغير مفهومة واللى لا اجابة لها.. زى مثلا بلالين الاختبار الاسبوعية، حوادث الكنايس، ظهور واختفاء الجماعة السلفيين فجأة وغيابهم كده فى تناغم مريب، صحة الرئيس السابق، الوضع الامنى اللى شكله كده مقصود، الاقتصاد اللى احنا مش فاهمينة، الاعلام المطبلاتى، الفلوس المنهوبة،

ثامنا: السندوتش الحمضان

الصراحة السندوتش ده بتاع الكلام الحمضان من اللى هو القلة المندسة.. الاجندة الخارجية.. واعتقال العيال المدونين وكلام بيطلع من ناس متعلمة على ان الثورة دى بتخرب البلد ووائل الماسونى وان البلد هتموت من الجوع وتاجيل الاتاخابات او دستور اولا عشان ده بلطجة على رأى اغلبية.بالاضافة لمعظم تصريحات صبحى صالح.. وكل تصريحات عمر عفيفى اللى هى مريضة بمرض الوسواس القهرى..

ثامنا: السندوتش المزّة

وده سندوتش فول من العربية اللى فى شيراتون اللى فيكى يا مصر عسل عسل.. تاكله براحتك ومزاجك ونفسك تروحله وتقدر على سعره وتنبسط بيه مش عشان انت مغصوب عليه ولا عشان مفيش غيرة... يا عينى (ممكن يبقى سندوتش كفتة على فكره لا تعارض يعنى)

اخيرا كلمتين: انا لو نازله بكرة نازلة عشان الاتى

-        عشان رئيس الوزرا لما يقول حافظو على ثورتكو يبقى بيقولكو كده "بين شطين وميه" فيلم الطريق الى ايلات على  رأى عمر طاهر (قصدى بيلمح انو مش متضايق يعنى)

-    عشان القيادة فى الجيش اللى قال مع يسرى فودة انزلو عشان اعرف انت عايز ايه

-   عشان اشيل اى حرج عن المجلس العسكرى من اى جهة حاشرة مناخيرها عندنا

-     عشان انا ضد المحاكمات العسكرية لاى شخص ان كان

-  عشان افهم ايه بقى مشكلة الامن

-  عشان افهم الاقتصاد عجزه فين بالظبط

-    عشان سيادة القانون هى الاصل مش قعدات ام احمد للصلح

-   عشان العفو بيكون عند المقدرة وانا شخصيا معنديش المقدرة

- عشان انا عايزة مصارحة مصارحة مصارحة

-   عشان الاعلام عايزله قلمين على وشه (ماعدا برنامج اخر كلام)

-    عشان الاحزاب كلها بلا استثناء طمعانه فى كل السندوتشات (فى كل المينو)

-  عشان تعجيل المحاكمات او على الاقل احط الناس دى كلها قيد الاقامة الجبرية ونشوفهم اما نخلص

- عشان نخلص احنا مابنخلصش ليه؟ مانخلص نخلص بقى..

- عشان انا عايزة اساعد بلدى وعايزة اساعد الجيش..

قولو يا جماعة المشكلة فين ومانبقاش رجالة وجدعان اما سدينا  معاكو ويبقى ليكو الكلام

- عشان ال800 اللى ماتو وال 6000 اللى اتصابو دول مايعرفوش يعنى ايه سندوتش

ومن حقهم لما ماتوا على الاقل نحاول ننفذ اللى ماتو عشانه.

      اخيرا... الجماعة اللى بتبيع الناس عند اول محطة كده كل مرة (يوم 24 وامبارح) وبتشنع على الناس اللى نازلة              وترجع تقول بنهزر.. دمكو تقيل ومبنحبش الهزار وانا اعرف واحد هزر كده برضة وكانت نهايته سوده..ايوه اقصد قيادات الاخوان ومش الشباب.. وايوه صبحى صالح..

 واحب اهدي الاغنية دى لأى واحد يستندل مع اصحابه بشكل عام..وقصدى انه يشنع على الناس بالزور

وشكرا وبون ابيتى

http://www.youtube.com/watch?v=7iZ4rV8GR4U

الفتنة اسمها سوسن

الموضوع مش محتاج تهريج لانه على حافة الهاوية زى مابيقولو. بس للاسف هو الموضوع خليط من الكوميديا السوداء اللى البلد كلها كانت هتروح فى خبر كان عشان خلاف عاطفى او عائلى او الاثنين معا.

بمنتهى الامانة مواضيع "عايز اختى " ده بصرف النظر عن مين اللى بيسأل يعنى المفروض اللى يتظاهرله مناصرى حقوق المرأه مش المتدينيين من اى دين.

اولا لما حد من الجماعة دول بيقوللى يا مدّعين الحرية ازاى لا تطلبوا الحرية لحد (من وجهةنظرهم)مخطوفة، ردى بيكون ان الجماعة دول مش طالبين حرية دول طالبين "وصاية" واحتكار. بمعنى انهم مش فارق معاهم مبدأ الحرية على قد ما فارق معاهم  "نصرة" وجهة نظرهم بصرف النظر عن الادوات..نوع من الديكتاتورية الغبية اوى.

الاهم من كده ان لو اى حد من ائتلاف "المسلمين الجدد" دول لو اخته طقت فى دماغها مثلا خلع الحجاب او ان مراته تخرج من غير موافقته سيمارس عليها فى اغلب الظن قمع مبالغ فيه..

طب انا اللى عايزة اقوله بس.. هل حد شاف السيدة كاميليا فى التليفزيون او السيدة عبير.. انا طبعا لا ادافع عن الهبل اللى بيحصل بس يا جماعة ازاى محدش شايف ان المشكلة ان الطائفة الوحيدة اللى من حق الكل يعاملها كأنها درجة تانية هى المرأة..

المرأة فى مصر الطبيعى ان تعيش فى مجتمع عائلى سلطوى وسياسى سلطوى وعملى سلطوى..

يعنى كل واحدة من اللى عليهم مشاكل ناس لا حيلة لهم.

المرأة ليس لها حق التعليم فى الكثير من المناطق فى مصر، وطبعا لو اتعلمت يكون لحد معين وفى مجالات معينة وطبعا فى وظائف تشتغل على مسؤوليتها. بمعنى لو اشتغلت فى الاعلانات او الفن او الصحافة او اى وظيفة سيادية فطبعا لازم يكون ده على حساب حياة اسرية غير مستقرة ده اذا كانت هتتجوز اصلا..

المرأة ملهاش حق فى احيان كتير تختيار الزوج وطبعا الطلاق منه ده شئ مستحيل.. مش فى المسيحية بس على فكرة.. المسلمين برضه محرمين الطلاق على نفسهم عشان الشكل الاجتماعى او عشان العيال او لان الطلاق هيأدى لمشكلة مادية بما ان الستات معظم الاحيان معتمدين على الزوج وبما ان عادة طلب الزوج انها تقعد فى البيت فالقعدة معناها انه غالبا هتلاقى شغل بطلوع الروح ده ان لقت.

المرأة برضه ليس لها حرية الاعتناق.. يعنى ماهو كام واحد بيسلم او يتنصر ولا حد يعرف ولا حد يفرق معاه. انما الست..لا والف لا.... ماينفعش ازاى يعنى "اكسر للبنت يطلعلها عشرين باين ولا كام" . انا مش بكلم عن الدين انا بكلم عن الحرية...

والست طبعا ماينفعش يتعرف عنها ان ليها علاقة مسبقة قبل الزواج..علاقة بريئة قصدى.. يعنى من الاخر معظم الناس بتتجوز بنات ليهم اصطمبة معينة.. مش غاوية مثلا مناكفة او عندية.. والاحسن تكوا اصغر ببتاع عشر سنين كده خام وتربيها على ايدك.. على فكرة لسه موجود الفكر ده وانا مش ضده. انما انا ضد النفاق.. يعنى لو ده المطلوب ماشى يبقى مطلوب من الاتنين ولو فعلا ده المثال الصح يبقى يكون فعلا ده الحال مش الغلاف والحقيقة طبعا مختلف..

لو فى اى دروس مستفادة من موضوع عبير وكاميليا والدروس فيه كتير هى ان الصراحة المجتمعية اصبحت واجبة وفريضة.. عندنا مشلكة نفاق اجتماعى ونابعة من مجتمع مشوه عشنا فيه من التسعينات.. هتقوللى يوه بقى النظام القديم والكلام ده.. هرد واقوللك مش مسألة النظام مسألة الانفتاح الصورى بالفضائيات والمسلسلات التركى وانت سقف الطموح الحقيقى فى بلدك بصراحة متغيرش من سنة 1960..

افتح الاعلام التافه عالبحرى ماشى انما تعليم حقيقى، تفكير انتقادى يعتمد على طرح الاختلاف، فرص عمل، فرص معرفة، ممارسة سياسية او حتى مجتمع مدنى حقيقى مفيش.. مفيش خالص..

اللى يحصل ايه...قاعد بتتفرج انت على البيت الى فى العشق الممنوع والستات الامامير دول.. لانت بتشتغل شغلانة مالية فكرك ولا عندك حاجة محترمة تشوفها ولا انت عمرك هتلبسى كده ولا حتى حد هيتعامل معاكى على انك مواطنة درجة اولى.. تبقى النتيجة ايه...احباط احباط احباط.. يولد احساس بفك القيد ده مهما كانت العواقب.. وده بالظبط اللى حصل للست عبير

اخيرا.. انا ملاحظة ان المشاكل الطائفية كلهما سببها ستات وبنات.بدليل ان الشاب السلفى السيد بلال اللى اتعذب لما مات ايام حادثة الكنيسة محدش سأل فى امه. واحنا يا بنات مصر عرفنا كده مسلمات ومسيحيات..الاحزاب بتتعامل معانا على اننا جينا فى كونتينر من الصين والبضاعة فيه مش عارفين يصرفوها. ولا كأننا هنا من قبلكو وكليوباترا حكمت العالم من 3000 سنة.. ولذلك ايه رأيكو يا بنات مصر احنا ناخد بعضنا ونمشى عشان الناس يقعدوا هنا ويعم السلام والوئام.. وسلام