عودة الندل

مين هو الندل يا جماعة.. مين هو.. الندل هو اللى اول ما يشم نفسه كده شوية يتمرع عليك لامواخذة..

تتميز هذه المرحلة اللى احنا فيها بعودة جميع الندلاء من هنا وهناك.. يتميز الندل عندنا انه عايز يقسم الكيكة قبل ما تخلص فى الفرن او انه يورث الميت قبل ما يموت.. هيبيع نفسه والبلد والعيشة واللى عايشنها والقضية وامه شخصيا فى سبيل المصلحة "الشخصية".. مش العامة.. يولع العامة على فكرة..

الندل هو من الممكن ان يتاجر باّلامه واّلام الاخرين فى سبيل كرسى (ليس تيفال).

الندل هو شخص لا تزول عنده الندالة بكبر سنه بل على العكس تزداد اكثر وتتفحل وتتتوغل وتقتل وتستمر وتستمر وتستمر.. الندل كل ما يكبر يحلى ويتحول من مجرد ندل لواطى متحول زى ترانسفورمرز كده..

الندل يبيع نفسه للشيطان.. الندل بيطلع فى التلفزيون كتير اوى اوى. الندل هتلاقيه دايما بيكلم عن استقرار البلد وحبه ليها وانه عايز يقوم بدوره للبلد اللى هوه طبعا لازم يكون دور قيادى. الندل هو راجل مستحمى ومتكلين (ريحته حلوة) جاى بعربية يرتدى اى حاجة بدلة جلباب او اى كان انما هو نضيف.. الندل معترض دائما وضد اى فكرة مش لاى سبب غير انه مش هو اللى عاملها فقط.. الندل سهل عليه قوى التعريفات يعنى هتلاقيه بيقول على المتدين اسلامى والمش متدين علمانى او ليبرالى هتلاقيه بيقول على المتظاهرين قلة على المعتصمين بلطجية.. المعتصم طبعا لو لابس تومى او رالف لورين يبقى متظاهر محترم او جاسوس انما لو غلبان وحاطط جل فى شعرة وبيحاول يبقى شكلة زى تمورة يبقى بلطجى طبعا..المصريين عندهم بالنسبة له يفتقدوا الوعى والفطنة والاستعداد للديموقراطية..

الغلابة عنده غير مهمين اطلاقة لدرجة انه بعضهم فكر فى اعتبار الامّى بنصف صوت المتعلم.. الشهيد عنده مقتحم للقسم. ورشوة اهل الشهيد عنده ديه.. والصح عنده حنبليه فارغة والغلط عنده اسلوب للحياة... طبعا الطبيعى ان الناس عنده يا اما مندسين من امريكا يا من السعودية وهو اساسا بياكل عيش يا من امريكا يا من السعودية.

الاسم الحركى للندل هو النخبة او النكبة زى ما بعض الناس مسمياهم..

ندالة النخبة تتميز فى عنجهيتها المفرطه غرورها المتزايد وافراطها فى احساسها بنفسها بشكل يبعث على الغثيان.. تكمن الندالة اصلا فى انهم عينوا نفسهم متحدثين باسم مجموعات من الشعب وهم ما لم يحدث ولم يخول اليهم هذا الدور من اساسه...بل على العكس دول دخلوا الناس فى سجالات وخناقات ووصلات ردح لا تمس الشارع بصلة على الاطلاق... النداله الاكبر بقى ان مش بس انى بدخل الناس اللى هما شايفنهم غلابة فى خناقات عن الدستور ونيجى مثلا عن ان الناس بتاكل بالجزمة وبيضرب عليها قنابل مسيله للدموع انتاج 2011 يعنى لسه فريش ماتلاقيش لأى فسل حس.. مجرد شجب وندب...نفس الطريقة بتاعة موظفين وخونة وطراطير مناديب الجامعة العربيه لما اسرائيل تخبط الخازوق.. الناس دى عندها انها تطلع فى التلفزيون اهم بكتير من انها تعمل اى حاجة مفيدة اوتقول كلمة حق فى واحد غلبان او يقفوا زى الرجالة..

رساله اكثر نداله:

الى كل عشوائيين الطبقة الكوول... انا اسفة البلطجية من الطبقة دى... مش الغلابة.. الناس اللى بيضايقها قوى شكل التوكتوك وعمرهم ما سألوا نفسهم ان التوكتوك بيحل مشكلة ناس ولا ان مين اللى دخل الجهاز ده مصر ومشاه فى الشارع قبل ترخيصها؟ واللى زعلانين قوى من الميكروباصات... انت تعرف تعيش عيشتو وتبقى كويس..طب ده دلوقتى والمرفهين بيكسرو القانون لمجرد المزاج.. الاسبوع اللى فات واحدة ست مصممة تدخل عكسى وبتجبرنا على الرجوع بضهرنا فى الشارع.. قاومنا وفى الاخر بتقول " ما كل حاجة غلط انتو بس اللى صح"؟ وبعد ما اصرت واصطف خلفها سرب اضطرينا للخضوع لها..

ادى يا سيدى المرفهين.. خد عندك بقى.. عربيات حمص الشام على الكوبرى عشوائية انما الكافيهات اللى شاغلة الرصيف فى الزمالك مش عشوائية..شياكة... الفرح الشعبى عند تمثال رمسيس فى طريق المطار بلطجة انما اشغال وسط البلد عشان فرح "كول" اناقة.. الزحمة فى وسط البلد مأساه انما التزاحم عند سيتى ستارز استثمار وجذب للسياحة.. واللى عنده مثل يقوله

والندالة بقى ان دووووول يسموا الغلابة اللى مات منهم ييجى 800 واتصاب منهم ييجى 5000 واللى اتسعّر كل شهيد منهم 5000 جنيه مش طايلنهم وان هم دول اللى خلصوا الدنيا يوم ...28 مش حضراتهم اصحاب الكنب والشلت والجرى فى السوبر ماركت وقت الثورة وشراء ربع طن لبن و40 رغيف فينو باعتبار ان كنا هنقلب الصومال فى يوم..

انا عايزة اضم صوتى لصوت محمود سعد يا جماعة قولولنا المتظاهرين يلبسوا ماركة ايه طيب عشان مايبقوش بلطجية.. هه؟؟؟ ولما نبقى كلنا ولاد ناس وماشيين زى الناس نبقى نشتم بعض...

واحب برضه اعترف بحاجة.. اللى بتقولو عليهم حوش دول هما اللى بيأكلونا عيش.. انا شخصيا بشتغل فى شركة جل اللى هى العيال بتلزق شعرها بيه وتنزل الشارع.. واى حد بيشتغل فى بيبسى وبى اند جى وهنكل والخ الخ.. الناس دى انت بتقبض عشان هما بيشتروا

ماتضطروش العما الطبقى والندالة الاجتماعية دى تدفع بالناس دى بدل ما كانت بتحميكو وعملت بأصلها وخلفت ظنكو وماكانتش ثورة جياع ماتدفعهمش للقيام بالثورة دى عن طريق انكو بتدخلوهم فى خناقات مالهاش اى تلاتين لازمة زائد قهركو وحكمكو عليهم..

على فكرة اللى مشكلته ان تماراى هيقفل وعشان كده بيتخانق.. بجد مشاكل عموم الناس اهم بكتير من احتياجك للسهر...

 "من كان منكم بلا خطيئة فليرمها بحجر" المسيح

احب اوضح انى مش ضد الحريات ولا مع الفوضى بس انا فععععلا ضد هذه النخبة المستفزة اللى ملهاش اى لازمة..النخبة اللى نشأت وترعرعت فى ظل حكم استبدادى صعب (وليس مستحيل) ان يظهر منها مجموعة تحترم الحريات تتفهم الفقر وترسى العدالة وتزرع الديموقراطية وتوالى التغيير المستمر..

ولأن عودة الندل عودة شكلها عودة قوية والندلا صوتهم عالى وراجعين راجعين..

محتاجة اننا نقف جنب بعض مش ضد بعض... فانشاءالله الاجابة 8 يوليو

 والله الموفق

واليكم كليب عودة الندل

وخلص الكلام.. سلام