بنا نفوجأ اننا فجأه بقينا شاطرين اوى فى السياسه ومتمسكين اوى بوجهة النظر بشمل مبالغ فيه لدرجة متطرفة...يا جماعه ممكن والنبى نفتكر ان احنا بقالنا بالظبط 47 يوم بنفهم فى السياسة ده اذا اجزمنا ان اللى بنعملو ده فهم... انا بس اللى مستفزينى هو الجهاد النفسى اللى الناس فيه ده وان الكل قافش فى وجهة نظره (وانا اول الناس دول) رغم ان بجد محدش فينا فاهم حاجة 100%...
يعنى مثلا قدامنا 6 ايام على تعديلات الدستور...حد يا جماعة يقوللى اللى موافق موافق ليه والمعترض معترض ليه..بس ابوس اديكو بلاش شعارات..
طيب انا الحقيقة رحت كذا محاضرة ساخنة للنجم عمرو حمزاوى وطنط تهانى الجبالى ونبيل العربى وناس تانية. برضه سمعت من ناس كتير وقريت لطارق البشرى وغيره وغيره...
انا يا جماعة بس كل مشكلتى انه ماحدش بيرد على سؤالى، لو يا جماعة لو الكل اجمع ان الدستور نو(يعنى لأ)، هنعمل ايه! طب يا جماعة جاليا الدستور لو عدا كده يحصل ايه؟
دا انا سمعت ناس تقولك ايه...يا جماعة ده الاخوان والوطنى موافقين سوف انت بقى...مفكرانى قوى يوم ما ايران وامريكا اتفقوا ان مبارك يمشى، حد جه قال برضه اول مره امريكا وايران يتفقوا...بجد حاجة تفطس من الضحك..
طب خالينا نكلم بلدى كده عشان احاول اقرر وانا بكتب من خلال المشاكل اللى سمعتها:
1- الدستور ده وقع اصلا عشان الشرعية الدستورية تسقط الدستور: صح كده يا جماعة وعشان كده احنا هنعمل واحد جديد نوفى على موسم المدارس انشاءالله، بس انا حابه اقول ان الدستور الجديد مش هيخترع هو يمكن حاجات هتتظبط بس يعنى مش هيكون دستور سويسرا فوالله اللجنه كان ممكن تشطب على العنوان وتقول دستور جديد وماكنش حد هيعترض!
2- قاللك صلاحيات الرئيس ماتغيرتش: طب ياجماعة ما احنا متفقين ان القوى السياسية حاليا غير ممثله للجميع، طب على الاقل حاليا يبقى عندى رئيس قوى عشان البرلمان مايشطحش فى الوقت ده ولو فى بواقى حزب وطنى تبقى تحت السيطرة وفى نقس الوقت برلمان قوى له سلطه على الحكومة فحضرتك يكون عندك سيناريو ايه (جبنا الحلو من هنا وهنزطه على الحلو من هنا)
3- طب بالنسبة لموضوع الصلاحيات: انا معاك، حضرتك كمواطن معترض على النقطة دى شايف نشيل صلاحيات منين: يعنى هو القائد الاعلى للقوات المسلحة، ورئيس السلطة التنفيذية/ واظن القضاء. انا مشكلتى فى القضاء انما احنا هنجيب رئيس لمدة لا نمسكه جيش ولا بوليس ولا وزارة طب يا جماعة نبعت نجيب ملكه انجلترا بقى!! اهى لا بتحل ولا بتربط
4- طب قاللك ايه ده بيخلى المجلس هو اللى يرشح الجمعية التأسيسية للدستور: اولا على قد فهمى هو الرئيس والمجلس هيعملو ترشيح وده بند "ملزم" يعنى الدستور ده اظن يقع لو ده ماتعملش.. انا مشكلتى فى تحديد جدول زمنى.
الحاجة الاهم: مين يرشح الاسماء للجنة دى؟ ما مفيش اختيارات كتير:
- اما المجلس العسكرى- او الاحزاب الموجودة- او الرئيس لوحده.
- اما بالنسبة للمجلس العسكرى فكلنا مش عايزين ده عشان اكيد فى تحيز للمؤسسة العسكرية وده مش عيب، وعندك احزاب بوجى وطمطم المتاحة حاليا، او الرئيس مع نفسه وانا الحقيقة بقول هو انا اقول لأ لمجلس فيه 500 نفر واختار شخص واحد مهما كان يختارلى اسامى انقى منها؟
- انا وجهه نظرى انه وماله ان الرئيس والمجلس والوزرا هما اللى يعملوا الليسته واحنا ننقى اللجنة اللوز.
5- طب قالوا برضة انه ليه مايكونش متزوج من اجنبية اوحمل جنسيه اخرى. انا شخصيا ضد الاثر الرجعى، انما موضوع الزوجة ده ما هو برضة حاصل فى الخارجيه والجيش.. يعنى لو الناس فعلا شايفة كده يبقى نكلم فى القانون ده على الخارجية والجيش..اللطيف برضه ان ولنفرض ان الرئيس ده مثلا مزاجة مزة من اثيوبيا وقررنا نتدخل عشان مياه النيل (بعد الشر) هنعمل ايه والراجل الغلبان هيعمل ايه؟
وبعدين يا جماعة ما ينفعش واحد ياخد جنسية تانيه ومزة اجنبية ويبقى رئيس جمهوريه فوق البيعة..يعنى الناس هنا بتكح تراب.. (نفسنه اوى هنا)
6- الماده الثانيه: والله انا وجهه نظرى انه كل شئ قابل للنقاش والتغيير مطلوب طبقا لمعطيات المجتمع اللى احنا فيه..
7- اخيرا فى نقطة ان المرأه مش مكتوبه عندنا فى الدستور ده...انا كونى امرأه مصريه متعصبه، متنازله المرحله ده عن الحق ده واول ما الدستور الجديد يتكتب انا اول واحده هطالب بيها.
8- واخيرا نظرية المؤامرة، ولو ان النظريه اللى هقولها دى طفولية جدا، هى مناسبه لعقلى البسيط. انا شخصيا شايفه ان الوطنى والاخوان يوم ما التعديلات دى يتقال عليها لأ هيكون فرصتهم اقوى من اى حد وده لأنهم من زمان معتادين خوض الانتخابات فى فوضى عارمة وبالاتفاق احيانا والخزوقة بينهم احيانا اخرى (اخرى= تانيه). فا من وجهة نظرى الجاهلة جدا ان لو قلنا لأ فى حالتين: يا اما نرجع للدستور المأساه 71 او نكون من غير دستور خالص..وساعتها كل القوى السياسية برضه مش هتعرف تعمل احزاب عشان مافيش دستور او عشان دستور 71 مستفز..ده بالتالى يدى لمييييين الفرصة يشتغل فى الحوسه دى ...الوطنى والاخوان والجماعات المريبة الاخرى اللى الشغل فى الضلمة ده كان لعبتها اصلا.. بينما القوى السياسية اللى احنا عايزنها تعمل احزاب قاعده ياعين امها تصلح ونتتخانق على الدستور. (ضحكات شريرة متقطعة)
9- حاجة اخيرة: اللى لسه مش واخد باله ان الجيش عايز يخلص وجاب اخره ومصمم يقعده يبقى لازمله نضاره.
10- نظريه المجلس الرئاسى: انا حقيقه شايفاها فكرة غير مفهومة ومش فاهمه ايه نوع شرعيتهم لأنهم غير منتخبين ومفيش مجلس ولا دستور يراقبهم!
نهايته، التغيير مطلوب طبعا على ان التغيير يكون صورة معبرة لواقع البلد مش الكتالوج اللى الناس عايزة البلد تمشى عليه..يعنى احنا عملنا الثورة الاول فسقطت شرعية مبارك واتغير الدستور مش العكس. والاهم ان الديموقراطية ليها تمن زى الدورى فى الكورة كده، ممكن الاهلى يفضل ياخد الدورى ويوم ما الزمالك يشد حيله الدورى يتلغى والكل لازم يلتزم برأى الاغلبية... اقصد ان لو اتوافق او اترفض كلنا لازم نمشى عليه وماينفعش نقول انا مش موافق فا مش لاعب...ده يبقى ساعتها احنا مافهمناش اى حاجة
ودى طبعا كراكيب فكرية فى منتهى الجهل من مواطن مصرى مطحون فكريا ومحروم سياسيا ومهدد اقتصاديا
وشكرا
No comments:
Post a Comment