وانت عايز ايه بالظبط؟؟

صحيح ان السؤال ده ارتبط بشخصية "اللمبى" وهو الشخصية التى نمت وترعرعت فى ال30 سنة الماضية والحمد لله اثبتنا ان الشخصية دى كانت نتاج مناخ وليس تحول بيولوجى للشخصية المصرية.. يعنى بمجرد 20 يوم من مشاهدة الاخبار وسماع شخصيات مصرية مرموقة ومحترمة اتصدمنا لما عرفنا انهم اتمنعوا من الظهور، اتحولنا كلنا لشخصيات مثقفة وسياسين محنكين..ولذلك انا باحمد ربنا انه اسوأ مثال كان اللمبى ومش القذافى...

المهم، مش عارفى ليه عندى احساس انه فى ناس حابه اوى تنكد علينا... يعنى الناس سعيدة ومبسوطة ولأول مرة مهتمين بالوزارة  ومستقبل مصر.. يا جماعة (ولا بلاش كلمة جماعة) ياخوانا وكتاب الله دى حاجة حلوة...

انتو غاويين نكد ليه؟ ما بدل مشاعر فيلم  (غرام وانتقام ) دى وافلام ما بعد النكسة الهابطة ما تيجو نستغل حالة السعادة دى (بالانجليزى Euphoria)؟؟

ارجع لعنوان الموضوع "انت عايز ايه باظبط"

يا جماعة يا بتوع الحزب الوطنى انتو بجد لسه فيكو نفس؟؟  ياخوانا عيب انتو عاملين زى عبد الحليم فى الوسادة الخالية...روحوا شوفوا حاجة غيرنا.. ما هو اصل عمر الى فات ما هيرجع تانى..ولو بعد الشر حصل بالفتاكة كدة مش بعد بكرة يعنى.. ارحموا نفسكو وحلو عنا بقى ببرلمانكو وفلوسكو وبلطجياتكو وجرايدكو وقنواتكو وجمالكوا(اصدى هنا جمل) وحميركو وسلطاتكو وبابا غنوجكو.. كفايا بقة..

اما بالنسبة للجماعة فعلا،ايواّ الاخوان المسلمين،  الشهادة لله انتو اتبهدلتو كتير واتعذب منكو كتير، والشهادة لله برضه ان شباب الاخوان يوم موقعة سوق عكاظ دى استجدعت ولو انى اشك انه كان اصلا القيادات كانت هى اللى امرت بذلك واظن انه كان رد فعل طبيعى من الشباب الللى اتصرفوا بمنتهى العفوية لأنهم مصريين مش لأى اسباب تانية.. بس بصراحة يا جماعة وبرغم كل ده وبرغم انه حاولنا فعلا نفهمكم ونقدر موقفكم بس الصراحة انتو تصريحاتكو مستفزة جدا جدا جدا..يمكن قربت تصل لنفس استفزاز تصريحات الحزب الوطنى (ودى يا جماعة درجة مش كويسة صدقونى).. وهاشرحلوكو ليه،

اولا تصريحات من نوعية ان "احنا لا ممكن نكسب باغلبية" والجو ده... انا لو مكانكو

ماقولش كده. اولا عشان الثقة الزايدة دى مستفزة اوى...اوى يعنى.

ثانيا، كل الناس عارفة انه اللى كانوا بينتخبوا نواب الاخوان كان لسبب دينى مش لسبب اجتماعى او حتى سياسى وده اصلا مالوش اى دعوة بالثورة.

 الحاجة الثالثة انه مش سر انه قيادات كبيرة فى الاخوان هى ذات مقدرة مادية هايلة وده فى بلد زينا انت تقدر على حملة انتخابية عكس كل الحركات السياسية الجديدة..

الحاجة الرابعة ادعاء عدم استغلالكم الفرصة.. انا معاك بس انت مش شايف ان الجملة مستفزة وبتفكرنى بواحد برضة كانت طريقة كلامه كده ونهايته ماقولكش..

الخبر اللى عندى انه انت فى احيان كتير استغليت الجامع لتسييسه وده ماكانش متاح لأى حد.. وعشان كده ليك شعبية.. وانا من وجهة نظرى ان ده استغلال للدين والجامع بس ما علينا انا اجى ايه انا..

الحاجة الخامسة: حزب الحرية والعدالة- وقناة تلفزيونية: الجماعة ليها اسم والحزب اظن لازم يكون قريب من اسم الجماعة.. عدالة وحرية دول كلمات مقدسة مش للاستخدام التجارى كدة...  وبعدين هو فى حزب هينادى بالظلم وكبت الحرية؟؟ يا جماعة احنا كبرنا على الكلام ده بقى.

اخيراّ يا جماعة احنا بقالنا فى مصر بتاع 80 سنة بنسمع عنكم وبقالنا 30 سنة بنسمع انكو  عايزين تبقو حزب. ما قلتوش بقى الحزب ده ايه اهدافه، يعنى التعليم، العمالة، الاقتصاد، الاعلام، الصحة..دوركو ايه وعايزين تبقو حزب ليه ولا هو كده حزب ورياسة وخلاص. وبالمناسبة يا حزب يا جماعة ماينفعش الاتنين...

واخيرا لو سمحتو بلاش كلمة لو عايزين ننزل ونكسب الرياسة هنكسب...عشان ده ماظنش حقيقى ونوع من انواع التكهن بالغيب وبق غلس اوى..  واهم من كل ده بلاش حركة الباراشوت على جهود الاخرين. زى حركة المسرح فى ميدان التحرير، زى محاولاتكوا المستميتة ايهام الناس انه حزب الوسط تبعكوا وهو مالوش اى دعوة بيكو خالص وحركة شيلوا صورة البنت الشهيدة عشان مش مغطية شعرها...بالذمة ده كلام..

يا جماعة الاخوان... انت عايز ايه بالظبط.؟؟؟

القاهرة...يوم من ايامك يا مصر