اعرف نفسك وعلّم عليك انت برضه

اسمحولى بس اغير  معالم المثل اللى بيقول اعرف صاحبك وعلم عليه بأنى اغيره ليكون اعرف نفسك وعلم عليك انت نفسك برضه..

اكتشفت مؤخرا مدى صعوبة هذا السؤال... حد فينا يعرف نفسه يعنى حافظ نفسه كده جوانى برانى (انسايد اوت يعنى) ايوه احنا تقريبا بنكون عارفين عايزين علمى ولا ادبى.. صحيح ملاكش يد قوى تنقى الكلية بتاعتك وبعدين تتخرج تفرض على نفسك وعلى اللى حواليك احساس كداب انك شاطر فى الشغلانة اللى لاقيتها وانك اهم واحد فيها وانت لا شاطر ولا حاجة ولا انت بتشتغل كمان قوى يعنى وبمنهى الواقعية هما كمان يفضلوا انت تسيبهالهم مخضّرة.. بس نهايته الكل يعنى بيخضع فى الاخر للظروف وبيتحملو بعض علشان انت محتاج للشغلانة عشان الاقساط وعشان مديرك برضه محتاج واحد يعمل عليه ريس وهو برضه عامل زيك بس زى ماتقول داس فى ال..غميق يعنى وسبقك..

انما سؤال اعرف نفسك بقى مش بس فى كونك فى الشغلانة الصح السؤال هو انت صح فى الشغلانة؟؟؟

يعنى عادة لما بنقابل مشاكل فى الشغل اقرب حل يريحك وفى نفس الوقت يطلع الغل اللى جواك وتسب وتشتم وتغلط فى المكان والناس والشغل وكله.. انا مش قصدى انك انت اللى تطلع غلطان انا قصدى جايز محدش فيكو غلطان جايز انت بس ده مش مكانك..

يعنى حقيقى ومعروف البنى ادمين فى انواع منهم يلفق فى الجو الوظيفى وفى ناس ماتلفقش (اى تنفع بس بلغه الترزية).. ابويا بيقوللى ان شخصيات الناس تختلف بالنسبة لأرضية الحرية لكل شخص..

يعنى اللى يستحمله فلان ماينفعش لعّلان واللى يمشى مع زيد يقف مع عبيد..

انما الاهم هل الواحد المفروض يغير من نفسه عشان الشغل عايزك منظم اكتر او عايزك اكثر مرونة ؟؟

هل المفروض والطبيعى ان معظم اللى عنهم 25 سنى فما فوق عندهم حالة من اللخبطة المهنية بمعنى لا هم مبسوطين ولا عايزين يسيبوا الشغل واللى يبفكر يسيب مش لاقى شغل ولو فى شغل انت نسيت اصلا انت كنت عايز تعمل ايه فى حياتك...

السؤال هو لما ييجى موقف فى شغلك يفرض عليك نوع من انواع احجام الحرية عشان ده هو النظام المؤسسى.. هل تخضع للاحجام ده بدافع انك بتتعلم ولازم تتطبع وتهذب كده عشان تكون شخص محترم.. ولا المفروض ان شخصيتك ملكك بحلوها ومرها (طالما انت يعنى شايف شغلك وماشى طبقا لقانون المؤسسة) بمعنى مش ضرورى خالص ان كون طريقتك مختلفة شويه انك غلط. ولا كون مديرك او مكانك طلب منك تغيير حاجة فى شخصك مش غلط برضه.. ممكن تكون انت فى المكان الغلط انت اصلا مش شخصية تقدر على تحمل التوقعات المطلوبة منك فى مؤسسة ما..

كلام نظرى عشان النقطة الاهم هنا هو ان معظم اللى هيقرا المدونة دى هيتفق معايا المشكلة هو "ايه البديل" انا معرفش ياريتنى اعرف.. بس لازم تعرف نفسك وتعلم عليها وتعرف على الاقل انت ماتنفعش فين.. فا يمكن الخطوة الجاية تعرف انت تحب تروح فين وتعمل ايه..

والاهم.. مفيش حاجة ببلاش وكل قرار له ما له وعليه ما عليه!!

وخلص الكلام...سلام

برجاء اضافة تعليقك على المقال لو عاجبك مش عاجبك اشتمه او قللنا حل ينفعنا