"صنفنى شكرا" تصنيفك ايه النهارده؟

مشكله كبيرة عندنا.. مش جديدة ولكنها تتطور بسرعة الفمتو ثانين الا وهى التصنيفات السابقة التجهيز.. احكام مسبقة على خلق الله وكأننا مجموعة جزر نونو نونو كده وعمالين نحدف على بعض زلط من الجزر الى احنا عليها..

انا مش غاوية مواعظ وعارفة طبعا ان من الطبيعى ان كل بنى ادم بيحكم على الصح والغلط من خلال دستوره الخاص جدا وهى مجموعة مفاهيم اكيد وصلت لدرجة من الاستيطان فى شخصية كل واحد بناءا على تربيته ودينه وجنسه وطبقته وثقافته وخبراته.. بس المشكله ان الثقافة الوحيده المشتركة عندنا كلنا هى ثقافة الاقصاء وعدم الاستماع بل وسهولة "لفح" اى بنى ادم بحكم مسبق كده من غير ما ندى نفسنا لحظه للتروى..

المشكلة الاكبر كمان انه كل بنى ادم حاليا بيسرع انه يختارله فرقه او تصنيفه والا هيلبس تصنيفه لوز من اى ناحية..

على فكره الموضوع ده مش جديد ومش وليد الثورة ولا حاجة...يعنى قبل الثورة كان عندك عدد كبير من التصنيفات برضة زى مثلا بس زى ماتقول زاد عليها كام مجموعة كده نظرا للاستفتاء

- التصنيف الدينى وما يترتب عليه من حاجات كتير الصراحة مش وقته ندخل فيها

- التصنيف بالنسبة انت كول اد ايه.. يعنى فى مجموعة الناس الان مرتادى تاماراى يوم التلات بالليل

- وكده وفى مجموعة الكول الفنانين ودول اللى لسه بيروحو كايرو جاز

- وفى  الكول على خفيف اللى بيروحو كافيهات وكده

- وفى العائلات اللى بيروحو سيتى ستارز وفى الكول اللى الفسحة بالنسبة لهم كارفور او مول البستان..

- فى مجموعة المتدينين الكول ودول الاجتماعات ممكن تكون فى مطاعم كافيهات او عزومات او سينما او ازهر بارك والساقية

- فى مجموعة المتدينيين شوية زيادة ودى مجاميع الاختلاط فيها (مش اوبشن اوى)

- فى طبعا التصنيف المادى والتعليمى اللى بيحط تصورات مستفزة على الطبقة بشكل عام. اى مثلا ان الطبقة الفقيرة جاهلة وغير واعية ومنحله اخلاقيا وبلطجية وثورة الجياع دى جاية من عندهم وطبعا دول مش بتوع شغل واسوأ طبقة فى مصر نظرا لعدم التزامهم ومع كل الانحلال ده هم برضه اللى هينتخبو الاخوان وانجرافهم نحو الاسلام السياسى هيحصل لا محالة...ازااااااااى معرفش.. منين منحلين ومنين هما اللى هيبوظولنا البلد والحياة السياسية بانهم هينتخبو الاخوان..

- فى الطبقى الفوق المتوسطة اللى بالنسبة للطبقة الكادحة فرافير وسييس.. ولسه بيعتمدوا على بابى فى المصروف حتى بعد الجواز..شباب فيسبوك مجلجل شعره..شاب نوادى.. يعنى مشكوك فى رجولته كده بعض الشىء نظرا لان عنده جهازين من بتوه التفاحة المقطوشة؟

- عندنا طبعا المجمعة اللى بتسمى نفسها حاليا ليبراليين.. وهما مجموعة ناس كده لقوا نفسهم لاهما اهلاوية ولا زملكاوية فراحوا دخلوا الفريق ده.. الفرقة دى مشكلتها انها المفروض تكون اكثر الفرق تفتحا على الاخر وهى اللى تقوم بتقريب المسافات بين الجزر بس هى بعد الثورة اتخذت موقف شبه موقف الاخوان من قضايا كتير بس بالعكس.. فاذا كان الاخوان (طبقا لنوادر صبحى صالح) ليهم طلعات تفهم على انها اقصائية فالمجموعة دى شغلتها انها تقف عالواحدة وتشتم فى الاخوان والسلفيين.. لاهم ناويين على حوار ولا حاجة ولا الاخوان برضة.. هما مبسوطين كده بنكش شعر بعض..يعنى مثلا تلاقيهم بما انهم معاهم موبيل بكاميرا يصورو اى يافطة محل عليها ماشاء الله يجروا يبعتوه على انه استخدام الدين فى الحياة السياسية..والنكته ان الليبراليين اللى المفروض يكونو اكثر الناس تفتحا على الرأى الاخر سريعى الحكم على اى معترض لوجهة نظرهم بل وتصنيف مجموعات كبيرة من البشر على اساس دينى رجعى خزعبلى برجل مسلوخة..ومعندهمش اى استعداد لبذل اى مجهود..انا بتكلم على النخب اللى ظاهرة قدامنا دائما وابدا فى التلفزيون نحن مرتادى الكنب

بمنتهى الامانه يا جماعة.. ايه البلاهة ده ومين المتخلف عقليا اللى فاضى للسقطة واللقطة لمعارك الهبل دى.. وكأن كل مشاكلنا حاليا ان الاخوان مانزلوش المظاهرة.. وان المرأه ينفع تترشح.. وان الاقباط ليهم حق المواطنة.. ايه التخريف ده.. وايه القضايا اللا خلافية دى والبديهية.. وايه حروب طواحين الهوا دى.. و ايه النخب الساذجة اللى بتطلع تكلم على التليفزيون..؟؟ انا بس عايزه انبه ان الظاهر ان النخب دى كلها ومن دون تصنيف كبرت وخرفت.. لانهم بيتخانقو نفس خناقات ايام مبارك.. نفس الخناقات.. والمصيبة ان الشباب نظرا لشبابهم معندهمش موانع التواصل.. وده مش جديد ..ماتنزلوا التحرير وتشوفوا.. بس للاسف كلنا لسه بنتحرر من التصنيفات السابقة التجهيز دى.. وده صعب عشرين مره لان فى نخب محتكرة ونعينة نفسها تكلم باسم الناس..

طبعا الامثلة لا تعد ولا تحصى.. انا لا انا اخوان ولا اخوات انا شخص عادى.. ماعنديش مانع اسمع ده واستمع لده.. لان فى مشكلى فى السمع فى البلد.. امبارح واحد اعرفه كان بيهاجم بسرى فوده عشان حس انه بيدافع عن بن لادن..يسرى فوده كان بيشرح القضية بموضوعية.. صديقى عايز يسمع القصة والرأى زى مايكون هو اللى قاله ومعندوش استعداد انه يسمع اى وجهة نظر مخالفة ذات وزن من واحد شاف بن لادن رؤى العين (وبالمناسبة انا وجهة نظرى ان بن لادن ارهابى صنعته امريكا اول ما كبر عضها ف..ضهرها)

عندى رجاء خاص.. ارجو من جميع النخب اللى بتسمى نفسها اى اسم انها تفسح المجال للشباب فورا..احنا نحب الرأى يكون استشارى انما اذا كنتو كلكو فى بيوتكو بتقولو لأولادكو انكو كبرتو وخلقكو ضاق.. احنا نستحمل ضيق خلقوا ليه بقى.. الله؟؟؟ سيبوا الشباب يا جماعة ينطلقوا هما اجدر وافضل ونفسهم بطبيعة الحال اطول وسرعتهم مواكبة للشارع.. ده فى ناس بتكتب حاليا مقالات ردا على احداث حصلت من شهر ولسه بيقولو ويعيدوا...اه حاجة كمان ينوبكو ثواب فينا.. والنبى تنقولنا الناس اللى بتكلم فى التليفزيون.. كتير كده اعصابنا معادتش بتستحمل عته (اى تخلف) !!

ارفعوا ايديكم عنا نبوس ايديكم..حان وقت الراحة وجمايلكم على راسنا بس كل يوم بيبان ان النخب دى غير ممثلة اطلاقا..وبمنتهى الامانه لوممكن نلوم حد على خدمة صنفنى شكرا معندناش اى حد نقدر نلومه الا انتو واحنا مش عايزين ولادنا يلومونا ان فرصتنا جتنا نصلح البلد وضيعناها فى خناقات تافهة تافهة ونفسيات قديمة بينكو وبين بعض..

والسلام ختام