عزيزى المواطن السعيد اوي بفتره انتخاب جديده.. اتبسط يا مواطن وارقص وهيص.. حقيقه الفرحه دى حاجه جميله وشحيحه ومن حقك بغض النظر عن الاسباب.. وعزيزي المكتئب كمان.. اكتئب لو دا مريحك ومحسسك بالانجاز ودعم المظلوم..
انما سعادتك وتعاستك مش فارق فى حقايق واضحه يمكن تكون مش متداوله ومفيش حد عايز يسمعها انما انا بفضل افتكرها وافكر نفسي بيها عشان الصح صح والغلط غلط..
- اولا السيسي رئيس مصر حاليا..شئت ام ابيت اما قاطت.. دي حقيقه
- مرسي فى السجن حاليا.. يعني مش هو اللي بيبعت تويت ولا هو اللي بيقول خطب من السجن ولا هو اللي بيذيع خطابات
- رابعه مدبحه بكل المقاييس وانكارك ليها مش هيخليها مش مدبحه
- ماسبيرو كانت مدبحه وانك تتناساها او تغفر لمرتكبيها او تلاقي اسباب ليها برضه مش هينفي انها مدبحه
- فى ناس مظلومه بالاف فى سجون ومعتقلات . اختيارك لغض النظر عن دا او ابداء تبريرات من اي نوع مش هيغير من دا. فى ناس محبوسه فى وصولات امانه واخده احكام اكتر من ضابط قاتل او حاكم ظالم
- مصر بلد كبير وله اهميه, حقيقه
- مصر مش اهم بلد فى العالم - حقيقه
- مصر فيها شويه رقاصين ومعرضين هيهدوا البلد علي دماغنا - حقيقه
- مصر فيها ناس كويسه بيتم اسكاتها او ترهيبها - حقيقه
- مصر تستحق تبقي احسن - حقيقه
- عدلي منصور رجل طيب بس- حقيقه
- الناس مش كلها بتحب السيسي- حقيقه
- مش كل معارض للسيسي اخوان - حقيقه
- الاخوان ومحبيهم ماليين البلد وجزء منها- حقيقه
- مصر بلد فيها تحرش جنسي - حقيقه
- الناس بتتحرش بالبنات فى ميدان التحرير بصرف النظر مع مين- حقيقه
- مصر مستوي التعليم فيها سيئ - حقيقه
- مصر مستوي الصحه زفت- حقيقه
- مصر مستوي الامانه والاخلاق فيها مش قد كده- حقيقه
- مصر مستوي خدماتها فى انحدار- حقيقه
- الجهاز الاعلامي فى البلد عايز يتفور - حقيقه
- الاعلام كله بيكذب- حقيقه
- ٣٠ يونيو ثوره اطاحت بالاخوان- حقيقه
- ٢٥ يناير ثوره اطاحت بمبارك حقيقه
- اي من النظامين هيرجع بشكل دائم--- مش حقيقه
هذا وان كنت اقريت او لم تقر بالحقايق اللي فوق فهي حقايق مش هتتغير بتغيير رايك…
النوايا الحسنه والاحتفالات والتهجيص مابيغيرش حقايق..زي بالظبط ما العياط ومصمصه الشفايف والندب ما مبيغيرش حقايق..
اللي بيغير الحقايق اولا الاعتراف بيهم وبعدين الشغل عليهم .. ولا بدعوات العنف ولا بالتبرير ولا بالظلم الزياده ولا بالانتقام ولا بالاحاسيس خالص.. بالعقل ..
البلد هتتغير اما امثال عواجيز المجلس القومي للمراه اللي ادوا وصله ردح لبعثه الاتحاد الاوروبي ودرس مجاني فى معاني وطنيه الحرب العالميه التانيه- ياخدوا جنب ويسيبوا ناس عايشه معانا فى القرن ال٢١ تشتغل
البلد هتتغير اما تقر بالظلم السياسي والطبقي والديني وتشتغل عليه.. مش بتبريرك لفعه ايا كان السبب
احتفل عزيزي المواطن او زيد فى العياط بس مش هتغير حاجه.
استمر فى الاستماع للاعلامي المفضل اللي واخد فلوس نظير قعدتك مسطول قدامه وهاري نفسم لشير لاي بوست جاي غالبا من لجنه اليكترونيه .. استمر لا الكهربا هترجع ولا وضعك هيتحسن ولا هتبقي قد الدنيا صدقني..
No comments:
Post a Comment