وللمغتربين ، حظا اوفر .. فى وطن اخر

الصراحة يعنى.. لم اكن انتوى انى اكتب اى حاجة الفترة دى (ولو ان لم اكن انتوى بتفكرنا بايام سودا بس اهو بقا) نظراً لان كل الناس بتقول كل حاجة فيبقي بما انه مفيش اضافة اسكت احسن.. انما انا استفزيت من بوست قريته وكام تعليق بخصوص حاجة كده زى عزل المصريين بالخارج عن الادلاء باى راى ليهم فى اى حاجة تخص البلد.. اخرها الحقيقة بوست كان بصريح العبارة انه اللى هيقول راي مخالف له هو شخصيا تبقى لامواخذه حمرا وبترتر واحسن له يحط جزمة فى بقه ويسكت...

وطبعا الامر ده كان مسبب ان المقيم فى الخارج عايش 'رغد العيش' وبيقبض بالعملة الصعبة وبيعمل باربيكيو فى البارك بينما المصريين فى مصر عايشين البيض بجميع صوره.. 

طب شوفوا بقا... المصريين بالخارج حاجة كده بتاع ٧ مليون نفر فى بلاد الله لخلق الله. فيه اللى طفح الدم لحد ماشترى بيت وعمل الباربيكيو (نفسنة ١)  وفيه اللى كان على مشارف الموت فى مركب مخروم وفيه اللى مذلول فى دول وباسبوره رهن كفيل.. فى برضه اللى قاعد فى شغلانة على كف عفريت وبيقبض عالحركرك ويبعت العملة الصعبه (نفسنة ٢) لاهله وبيته اللى مش معاه.

فيه برضه شباب بتدرس وبتشتغل بعيد عن اهاليها.. فيه برضه ناس اتغصبت بسبب احوال البلد للخروج نظراً لظرف البلد وفيه مصريين فى بلاد الشياكة  وفيه فى بلاد بتركب الافيال ..انما الاهم والاكيد بقا ان كلهم مصريين فى اى بقعة على وجه الارض ...مصرى عن عين التخين ... والمصرى اللى زيك زيه ده يقول رايه ويعجبك او لا موضوع يخصك.. والمغترب ده سايب اهله برضه وله معارف واصحاب واولاد واهالى هو ماراحش القمر! وايوه لو معاه جنسية تانية حقه يقول رايه برضه حتى لو الراي ده مش عاجبك.. وبالمناسبة حصر العاملين بالخارج انهم فى بلاد العالم الاول ده نوع من قصر النظر والجهل.. مطلوب من حضرتك اطلس مستحدث وتشوف العالم على بعضه بغض النظر عن قوالب "فى اوروبا والدول المتقدمة ده" 

وبالمناسبة اى بنى ادم فى الحياه من حقه يقول رايه فى اى بلد ايا كانت امال يعنى الناس شاغله روحها ليه بارسال رسايل لل سي ان ان لما مش فارق راي العالم الاخر..

الموضوع قلب من شوفونيه وتصلب راي وجهل .. لا كمان ده اصبح فوبيا من اى حاجة بره الخط الحدودى على الخريطة. 

اما بالنسبة للسياسة انا حقيقة مش ناوية اتكلم لانه معنديش اضافة.. انما رايي المتواضع.. البلد دى هتتحسن بس يوم ما الكل يعرف انه هيفضل فى اخوان وسلفيين لابد الابدين وحسن البنا هيفضل له مريدين.. وهيفضل فى ناس بتفضل حكم عسكرى وشايفاه انسب .. فقط يوم ما الكل يعرف يعيش مع بعضه مش ضد بعضه البلد هتبقى احسن.. هى المفروض منافسه مش خناقه.. 

اما بالنسبة لحاله الهلع اللى طايحة فى البلد.. دا مش جديد هتهدا زى مابتهدا وترجع تقوم وتهدا.. انما الناس اللى بتخسر صحابها ومبادئها عالسياسة عندى كلمة اخيره "ماتتشددش اوى كده" بكره الاخوان يقعدوا مع العسكر زى ما طوووول عمرهم بيقعدوا ومفهمنا انهم اعداء.. هتخسر صحابك وانسانيتك عالفاضى؟!! لا العسكر بيمشي للابد ولا الاخوان هينتهوا للابد.. Face it ! اما للاراء بتاعة وللمغتربين ان يضعوا البلغة فى افواههم.. احب اقوله ان البلغة already فى بقهم.. دفعوا مقدم ولو مضايقينك اوى يعنى ممكن تلغى تصويت المصريين بالخارج زيادة اقصاء..وحظاً اوفر فى وطن اخر

والله الموفق والمستعان