لاننا شعب "متدين بطبعه" و"غير عنيف بطبعه" و لان المصلحه العامة ودرء الفتن والخوف من فضيحة البنت وعشان منعملش مشاكل وعشان البنت برضه ممكن تكون السبب.. كلها اسباب واهيه ورثناها ابا عن جد.. اعتدنا ايضا تسييس الجمل والبعد عن الصراحة والتحوير وماتجيش من الاخر وتقصد غير ماتقول وماتقولش للاعور انك اعور فى عينه .. اتعودنا كمان ان المنافق سياسي وبيمشى حاله والصريح جلياط والملاوع صايع واللى دوغرى مقفلها..والغرض بالنهاية المصلحة العامه وعشان الدينا تمشى..
لا حبيبى دي مش مصلحة عامه.. ده تع*** خاص بسيادتك. والسياسه والجهبزه دى طبعا بتشتغل وفقط من الاكثر قوه وسلطه على الاكثر قهرا وضعفا..
كل ده وبالتاكيد لعنه- اكيد لعنه من اله فرعونى قديم وسرحت على الشعب كله
نخش فى الموضوع!
يمكن عشان الواحد بقاله فتره بعيد شويه عن المحروسه.. نسى طقوس السيدات فى النزول للشارع وهى تتلخص فى بودى كارينا من تحت وتلات جاكتات من فوق طبعا الاخير لابد وحتما يكون نازل على الركبه.. ده لو بالجراه الكافيه لارتداء بنطلون.
كمان ضرورى تركبى كاميرات المراقبه واجهزة التصنت فى قفاكى عشان تسمعى وتشوفى نظرات من خلفك وتاخدى الحذر من اى حركه كده ولا كده؟
طبعا لازم تقعدى ورا فى التاكسى مافيهوش ناس وعلى كنبه عليها ستات فى الميكروباص وقريبه من الباب. غير انك لو شايفه مجموعة شباب تتراوح اعمارهم بين ٩-٧٠ لازم تنزلى من على الرصيف احتياطى لابعدين الطفل يفرقع بمب فى رجلك او شاب يعمل او يسمعك كلمتين بايخين.. طبعا ومهم قوى.. اوعى تجرى او تضحكى او تزعقى فى الشارع.. ومافيش داعى تعدى من قدام امن مركزى او حراسه او امين شرطه او قسم او عربيه.. ولو بتسوقى ارجوكى بلاش تشاء الظروف يكون امامك عربيه ترحيلات.. ولا حتى اوتوبيس نقل عام او خاص او مدرسة ثانوى بنين..
لعب الرياضه فى الشارع غير وارد عشان ماتفكريش كتير ولو عربيه قربت منك اجرى بسرعه بعيد لو اودى الامر بحياتك وده عشان لو مشدكيش فى العربيه هيقولك كلام رزل او هيلتفت باقى الشعب للتعليق او على افضل الظروف ممكن يبقى قصده بس يتريق عليكى بانه يحدفك بقشر لب او يبخ عليكى بخاخه مياه او اسوا انه يحدفك ببيضه فى خلقتك..مش محتاجة اقوللك على الخروج بالليل ولا وركوب اسانسيرات مع بشر.. لان الفرض الاول انهم ليسوا بشرا..
عارفين اللى فات ده كله.. كان تمام وكنا عايشين بيه عادى.. المؤسف اننا ماكناش شايفين اى حاجه غلط.. معظم البنات بتغلْط نفسها وبنات زيها.. ماهو امال لو ماشيه كويس ليه هيحصلها كده؟؟
الجديد بقا ان بعد كل تعليمات الامان دى… مش كفايه.. لا والاسوا.. التحرش مبقاش بالكلام ولا الشتيمه ولا المقلب ولا التريقه ولا اللمس.. لا ده بقا حفله.. حفله تحرش تتطور الى اغتصاب ثم تعذيب ثم قتل بالمره.. واظن ان فى القريب العاجل هتتقطع حتت ويعملوا حفلة شواء فى مدينه الانتاج برضه وياكلوها على العشا..
عارفين المشكله فين.. المشكله ان محدش عايز يعترف بالمشكله.. التبرير التبرير. لازم يكون فى سبب.. يا اما من البنت يا اما انها مؤامره مدسوسه… لا يا سيدى… هذا ما جنت ايدينا.. ايوه.. لازم نعترف ان السيدات المصريات الجدعات اللى انتو بتتشدقوا بالجدعنه مقهورين الى حد مش بطال وانتو مش عايزين تعترفوا بده.. مقهورين لانهم لسه بيتم ملاحقتهم والحكم عليهم باعتبارهم حته لحمة وعرض لابد من ستره..
معلش روح طعٌم الكلب وماتقولش انا مشيت قدامه ليه..
عارفين ليه مش عارفين نحل مشكله التحرش ولا هنعرف؟ عشان الاستعباط.. التحرش فى مصر هو ملخص لمشكله مصر…
هو انتقام من شخص مقهور بمحاوله قهر واذلال شخص اخر.. المطلوب اخراج شهوته الجنسيه وشهوته فى الانتقام- فرويد فى افضل صوره. المشكله ان المتحرش شخص اما ان ظروفه الاقتصادية تمنعه من الزواج او انه متزوج ولكنه يشعر بالذل والجهل والاهانه فيمارسها على غيره وفى الحالتين هو يستحق التعليق من رجليه..
المشكله عزيزى المستعبط انك مش عايز تعترف اننا شعب مش متدين بطبعه مفيش حاجه اسمها كده فى الدنيا.. اظن لو كان متدين بطبعه اصلا ماكانش مصر والمنطقه العربيه نزل فيها كل الاديان والانبياء.. ماكانو هيؤمنوا من اول مره..
المشكله انك عزيزى الشاب تم للاسف تربيتك غلط. قالولك ان اللى تصاحبها ماتتجوزهاش. وان البنت لو بتلبس كده تبقى كده ولو بتخرج كده تبقى كده. طب انت دورك ككائن سلبى كده مستقبل؟ مالاكش راى؟ مالاكش اتجاه؟
حضرتك عزيزى الشاب ماما دلعتك (زعلت انى قلت ماما- مشكله تانيه) ايوه.. كام واحد فى البيت كان له دور؟ قليل!
حضرتك عزيزى المدافع عن الداخليه بعزم مافيك.. دول اول من يقوم بالمعاكسه على فكره.. الداخليه…اللى المفروض رمز السلطه والحماية هي ممن يتحرشون بالبنات والسيدات..فى كام واحده هنا سمعت لها كلمتين من فرد امن اى كانت رتبته؟
عزيزى الليبرالى اللى خايف على حريه الابداع.. حضرتك اللى قلت للناس ان اى واحده لابسه مايوه هي بنت بايظه واى ولد وبنت بيتكلمو يبقى بينهم شئ سيكو سيكو وان المفروض ان اى شاب من اى مستوى لما يشوف بنت بسواريه يريل على روحه وان اى واحده ست متزوجه متجوزه وبتكلم ابن خالتها تبقى خاينه..هل من مره طلعت واحده لابسه مايوه مثلا بتلعب رياضه او مع اهلها؟ لا لازم يكون فيها شبهه؟
اما قداسه القس وفضيلة الشيخ.. فمع اجلالى لكم جميعا وانتو على راسى بس هو مين اللى خلى الستات كوره بيتخانقوا يقعدوها فى دير ولا تروح الجامع..
اما بالنسبه للى بيسموا نفسهم رجال دين.. فانتو ربنا يتولاكو لانكو اتحرشتوا بافكارنا كلنا…
عزيزى الثورى العتيد.. اقعد مع نفسك وانت بتنبذ العنف وبتطالب بالحريه.. شوف الاول انت قدها ولا لا.. مش متخيله انك بتطالب بحريه رجالى.. اسفه.. احنا كستات وامهات وبنات من كبيرنا لصغيرنا مش مستعدين نكمل كده.. مش مستعدين نفضل نلبس طبقات ونفكر ميت مره قبل مانعدى شارع ونفكر فى الشغلانه تنفع ولا لا وبنروح امتى… مش هنتسنى تانى اما واحد زى توفيق عكاشه يقول على واحده عبايه بكباسين وبعدين ناس تسقفله عشان ضد النظام..مش مستعدين اننا نكون شوال رز يتغدا بيه معتصمو مدينه الانتاج مش مستعدين يقولولنا ايه اللى ودانا هناك..مش مستعدين نتجوز من شيخ فحل عشان ناكل لقمه ونتستر مش مستعدين نسكت لا على فرد امن ولا فرد بواب بعد كده..
وانت بتنادى بالحريه كده فكر انت قدها ولا لا.. عشان خلاص احنا مش ناويين لانتعذب ولا نتهان ولا نستعبط..
استعبط لوحدك بس ماتنتظرش الحريه وانت بتنافق نفسك..
انتهى
No comments:
Post a Comment