هل سالت نفسك احنا ليه بيحصلنا كده. هل تاملت كده ليه الخرا بييجى عندنا ويلزق فى وشنا. هل انتابك يوما احساس ان الامل فى الناس والبلد والدنيا مفقود وان الغلب والقرف والزبالة والضرب على القفا من حدنا ونصيبنا لا محالة؟
ايوا عزيزى المواطن. دى حقيقة مش خيال ولا مفر منها. واسبابها معروفة ومحدش بيتغير ولا يغيرها عشان كده سنظل دوما فى هذا الخراء الشنيع ونحكم اما بالاخوان او اما بمبارك وامثاله.
عارف ليه عزيزى المتسائل؟ عشان ناس كتير زيي وزيك. مين احنا؟ نحن اللى قاعدين عالفيسبوك والتويتر ليل نهار نندب ونشتم الناس ونحكم على الغلابة والمطحونين وفى الاخر لامواخذه انا وانت قاعدين فى التكيف وبنتشمس وهنضرب الحجر المتين ونصيف وكدهوك.
بيس معنديش ادنى مشكلة. بس عارف بقا المشكلة انه امثالنا سيادتك هما الانطاع اللى فاضيين انهم يقولو على بقيه الناس همج وجهلة وفقرا وريحتهم وحشة ولازم ينضربوا بالجزمه. امثالى وامثالك برضه اخرك حملة تبرع هنا. قرشين نرميهم هناك. بوست كده تويته كده. صوره لشهيد حدود الامن المركزى وصوره لاشلاء طفل وصوره للشيخ برهامى واخبط لايك لبرهامى ولا مرسى ولا دور الكنيسه واهى بتقضى. الجميل بقا انه بعد كمية البغض والنطاعة والاستعلاء والقرف اللى بنحمله للبعض عندنا نرجسية يا اخى ولا كاننا شعب الله المختار. المتعلم احسن من اللى جاهل لدرجة مناداة البعض انه يمنع من التصويت والسنى احسن من الشيعى والمسلم فى البلد اغلبية فيمشى كلامه على المسيحى غصب واقتدار يعنى وطبعا الراجل احسن من الست والدقن احسن من اللى من غير والغنى احسن من الفقير والستايل احسن من البيئه واللى من القاهره احسن من اللى براها واللى فى سينا خونه واللى فى الصعيد متطرفين واللى فى الدلتا جهله.. كل القرف ده ويقولك انا مايهمنيش طفل غزه قد طفل مصرى وطفل غزه اهم من طفل فى امريكا مثلا وطفل من ديانتك اهم من طفل تانى وطفل من طايفتك اهم من طفل من طايفه تانية وطبعا من طبقتك اهم من طبقه افقر..
المزايدين زى ماهما والمبرراتيه زى ماهما والاخوان الطامعين زى ماهما ودوله مبارك واتباعه زى ماهما والاعلام زى ماهو وحجب الحريات زى ماهو والمتطرفين اللى بامخاخ زلط وافكار شاذه فشخ زى ماهما.. وعارف مين زى ماهم برضه.. الغلابة والاطفال اللى عايشين بالعافية وبيموتوا بالسهل.. الغلابه فى كل مكان فى الارض ومن كل الاطياف.. اللى ماتو فى محمد محمود والثوره والاستاد وغزه حتى واسيوط والعبارة والحدود وعساكر الامن.. هما اللى بيعيوا ولا يتعالجوا الا بالشحاتة ولا بيتعلمو الا بالتيلة ولا بيشتغلو الا بالعافية ولا بيعيشوا اصلا عشان بيموتو فى اى مرحله من دول…
عزيزى واجه نفسك وانا معاك بالحقيقة.. المشكلة فينا. عارف ليه؟ عشان انا وانت منتفعين. فى قرارة نفسنا احنا عايزين شارعنا بس يتسفلت وولادنا بس يتعلموا ويتعالجوا ونتامن لان الغلابه الجعانين هيسرقوا حاجاتنا.. وايه يعنى اما يموت خمسين عيل هنا ولا عيلين هناك.. الاهم نبرر لمرسى عشان هو من الاخوان ومناصرته شريعة او العكس المهم ننتهز الفرصه عشان نشتم مرسى ونترحم على ايام مبارك ولا شفيق. انما العيال اللى ماتت ولا ان الفقير حياته تتحسن.. لا خالص.. امال مين هيشيللى الشنطة وينضف العربيه ويركنها ولا يجيبلك الديليفرى الساعة ٣ الصبح ومين تتعصب عليه عشان عملك النيسكافيه سكره زيادة ولا اتاخر علىك فى الاورد فى اى ريستوران..
.. النضاف ماتوا فى الاحداث او اتشوهت نفسيتهم فى السجون او من كتر ماشافوا جثث..
نعيب على الخرا والخرا فينا وما لزماننا خرا سوانا
No comments:
Post a Comment