من غير عنوان
انا ماعدش ليا مزاج ولا خلق اكتب عن السياسة وماظنش حد له اى استعداد يدخل فى نقاشات سياسية. الحقيقة اننا كشعب اخدنا قفا جماعى مزدوج على غفلة. شوف اما تمانين مليون مواطن يتسكعوا قفا مفاجئ؟ شئ يعنى يستحق المتابعة.
من ساعة ما رسيت الامور على اخر خيارين انتخابيين واظن ان الغالبية العظمى قد تمزقت تمزيقا. فقد تظهر وبلور وانبت ودعم ذلك الموقف كل انواع الخلاف بين الشعب وبعضه بشكل الحقيقة مقرف. الطبقى تمسك بطبيقتة والطائفى بطائفيته والجاهل بجهلة والسطلوى بسلطويته والاهبل يا عين امه بهبلة برضه! ومن ساعتها يا ولداه والبلد مش طايقة بعضها!
بقينا عاملين زى مريض الاكتئاب اللى من كتر ما مكتئب ابتدى يضرب نفسه ويعذبها!
الصراحة برضه احنا معانا حق. ماهو اللى حصل فينا مش شوية سنه ونص بنتشقط لبعض اما شيبنا. شوفت حد خد حقه؟ طب شوفت تغيير جذرى؟ طب مش جذري؟ طب شوفت خطوات ثابتة نحو تغيير؟ انا شوفت حفلات تخرج وانقطاع كهربا وحر فظيع ووضع اقتصادى مهين وفساد مستشرى وسخافة من صانعى القرار اللى جايين فى الهيافات ويتصدرو!
اخر كام يوم ناس سالتنى عن اللى حصل عند نايل سيتى وسالت ناس عن اللى حصل فى دهشور. ليه ربطت الحدثين ببعض! اقوللك.. ارائى فى القضايا دى مبتعجبش ناس كتير بس نقول وخلاص! لو للحظة انكرت او بررت تهجير عائلات قبطية عشان قاتل واحد تبقى طبيعى تبرر سحل وبهدلة عزبة بحالها عشان واحد او مجموعة بلطجية. الاختلاف الوحيد كونك طائفى فى الاول وطبقى فى التانية .
احداث دهشور هى واحد من سلسلة احداث طائفية نرفض حتى الاعتراف بها عشان نحلها وهى مش الاولى ولا الاخيرة. الاحداث الطائفية متفجرة من التسعينات ومحدش بيحل والظاهر محدش ناوى. الدونية والقرف هو تبرير دع لاى سبب كان.
اخى المواطن انت بتعيب على الفقير جهلة! هو تعييبك عليه مش هيفيد بس صدقنى بكرة يفرقع فى وشك!
اختى الموطنة السعيدة بمهاجمة الامن العزبة بشكل كامل انا راضية ذمتك ! تخيلى نفسك فى عزبة عشوائية امامك فيرمونت. حضرتك اكبر مشكلة عندك ان الكهربا بتقطع احيانا فالتكييف مش شغال. اظن احساسك كمواطنة عشوائية وانتى اكبر امل ليكى حمام ادمى! لا والباشاوات داخلين خارجين يستمتعوا بينما يكح مواطنين العشوائية تراباً. انا لا ابرر البلطجة والاجرام. بس بحط الامور فى نصابها. وضع الطبقات الفقيرة فى مصر هو نفس وضه عزبة الرملة بل اسوا. لا تتوقع منهم ردود افعال رزينة وافكار مرتبة ونقاش موضوعى وحلول هايلة. للحق توقعنا منهم ثورة جياع ومعملوهاش..لكن صدقونى قربت. قربت ليه لان الفقير دائما هو ذيل القامة والثورة فشلت وتحقيق العدالة الاحتماعية اصبح بعيد المنال و دور الدولة لرعاية اى حد كان واصبح فى علم الغيب والجنزورى وطنطاوى والاخوان طلعوا اصحاب واحنا كولنا خدنا شبشب !
هل وقعت عزيزى المواطن الصالح فى حيرة اتبرع لمين! للايتام للمعاقين للصم والبكم للنور والامل للروماتويد للسرطان للقلب لزويل للنظر لابن السبيل لسجينات الديون ؟ ده دول اللى معاهم فلوس للتليفزيون.. لما المواطن الميسور مطلوب منه التبرع لدول واما المواطن الغنى شايف ان الفقير سيظل معتمداً على حسنته ماهو طبيعى يحصل ده فى نايل سيتى اما يكون دور الدولة منعدم تماما كده والفقير مكسور عينه. واما نكون متعلمين ونقول حوادث الطائفية فردية وانك متواجهش نفسك بالحق يبقى هتكرر وتكرر تانى وتانى لحد متولع فى وشك ووشى.
طبقيتك وطائفيتك عزيزى المواطن لن تفيد. لن ينتهى عدد المواطنين الفقراء والمعدمين ولن تنتهى طوائف اخرى ..ما سينتهى فقط هو اخر ذرة حب واحترام بينك وبين اى منهم! فان انفجروا فى وشك ووشى فاعلم ان انانيتك وطمعك ونركسيتك واحساسك ان فى شخص عنده الصواب المطلق والحق المطلق وان الشخص ده انت ! وساعتها لا تلومن الا نفسك!
فى بلد يتجاوز معدموها ال٣٠٪ لا تتوقع ان قمعهم يعنى عدم وجودهم! بل يعنى ترسيخ مبدا الانتقام والبلطجة والسبوبة والنحتاية!
واهو كلام
خلص الكلام..سلام
Another Excellent piece - but who listens - and more so - who actions - and even more - Who cares :(
ReplyDelete