الورقة العرفى والقاتلة المستديره

الورقة العرفى والقاتلة المستديره

تتسارع احداث مصر يوميا واضف اليها احداث شخصية بتحصل للبنى ادم العادى اهمها ان الواحد بعيد عن وطنه حاليا.كل ما تفكر تكتب حاجة عن البلد واوضاعها تحس بالكسوف انك سايبها. عامل كده زى اللى يبكتب جواب لامه من الغربة، واحشاه بس مكسوف انه مش معاها يراعيها وياخد باله منها. بس بصراحة زى ما البعد صعب وبيخليك عايش بنص بنى ادم او اقل. نصك التانى فى مصر وعايش بنص انما البعد برضه بيخليك تشوف الصورة من بعيد شويه وساعتها تقارن بين مواقفك جوه الحدث وموقفك وانت براه وتلاحظ التقارب او الاختلاف. 
ومن ساعة ماوصلت وقبل مااسافر كان الحديث عن ٢٥ والذكرى واللى هيحصل فيه. وانا اقول والله يا جماعة ماهيحصل حاجة. والرهان كان دايما على العدد كل مابنكون كتير كل ما بنكون فى امان.وكل ماتفرقنا اختلافاتنا وعنادنا كل ما سهلت قوى قوى ان الكماشة تقفل على شوية مننا.
انا حاليا لا استطيع ان افهم هل هناك احدا على وجه البسيطة لا يعلم ولا يعى ان سيناريو الرعب ده هو مدبر بعناية ومسبق ايضا؟ السيناريو ده شغال طبقا لوصفة سحرية وليست سرية والوصفة ليها ادوات تمويلية ووجوه اعلامية واعلام موجه رسمى وغير رسمى. لم يعد ذلك سرا واللى يا جماعة مايشوفش من الغربال يبقى اعمى البصر والبصيرة والقلب.
تحديدا من يوم ماسبيرو وكل شئ انكشف وبان. فبعد كل اتحاد وتكاتف شعبى بعيد عن الصفقات السياسية الصفيقة تحصل مصيبة. بل ومن ساعة ماسبيرو تحديدا بدات الادوات الاعلامية بروباجاندا مهولة مستوحاه من وصفات هتلر وجوبلز. الظاهر ان الشخص اللى كان بيفكر فى الاول مشى وجابو واحد انصح شوية ثم اصبح ناصح وبجح.
ظهرت بوضوح علامات مريبة لصفقات سياسية ومماطلات للمحاكمات بل ويراهن الجميع على ان الموضوع ينام اساسا. ثم بدانا مرحلة نقص الموارد والتى اثق انها ناقصة فعلا ولا تحتاج مؤامرة للتوضيح! ثم تتعاقب الموجهات وبناء الجدارات العازلة فى قلب وسط البلد. يعقب ذلك تغيير حكومة بحكومة لا تختلف ان لم تكن فى رايي اكثر بطئا ولا يفهم لها احد لا صلاحيات ولا مسؤوليات لانها بمنتهى الامانه لم تقوى على اداء دورها الامنى ولا السياسى ولا الاقتصادى!
توالت الاختطافات للنشطاء واستمر سيناريو التشويه للجميع بمعنى الجميع ٦ابريل كفاية منظمات المجتمع المدنى جميعا الاشتراكيين الثوريين فتيات المتظاهرات الثوار عموما شباب الاخوان والنهاردة الالتراس.. لم يتبقى احدا لم يشوه الا قيادات الحرية والعدالة والسلفيون. وانا ازعم ان الخطوة الجاية عليهم وهنشوف. حالة الصمت الرهيب واتخاذ مواقف محافظة جدا من قبل حزب الاغلبية شئ اصبح غير مفهوم. اتفهم اتخاذهم موقف سياسى محافظ يتماشى مع كونهم حزب محافظ بس كده انت عامل زى العيل اللى لابس لبس العيد قبله ب٣ايام ونايم بيه! انضمام الاغلبية البرلمانية لحوادث لا تحتاج الى لجان للتحقق هو امر حتمى! فبدل ما تبعتوا الشباب ياًمنكم فى البرلمان اسمعوا الشارع! لان الشارع ملك الناس مش ملك من يحكم. ولا حق لاى احد حماية البرلمان لان المفروض فى جهاز داخليه مدرب. جهاز اثبت عدم جدارته نظرا لغياب منقطع النظير. فبدل ما المجلس ان يستجوب او يسحب الثقة يستعيض بلجان شعبية خاصة به. 
ما حدث اليوم ما لم يكن مدبرا فهو تواطؤ وتخاذل لا ترضى به اى دولة من جهاز امنى. وبما اننا عندنا برلمان نيو طازه خلينا نشوف ناويين يعملو ايه! لو فض مجالس يبقى ادينا عرفنا ان الانتخابات بصفقاتها ببابا غنوجها كان مسلسل تركى عامل زى العشق الممنوع كده. حزب الاغلبية اتبسط من القعده وباعتقاده ان الميل للموجه هيجيب نتيجة! الكلام ده كان ممكن لما كان الراجل اللى بيفكر راجل طيب واهبل انما حاليا الراجل اللى بيفكر دماغه متكلفة. 
هذا الاسبوع اذ فجاة انفلات امنى مهول ماسوره وطفحت. اعلام لنفخ الحوادث واثارة الرعب وارسال رسائل باشاعات لزوم الشطشطة! بالمناسبة اليوم اللى اتسرق فيه البنك hsbc اتسرق بنك جمبينا فى هيوستن. والامر فى الاخبار لم يتخطى خبرا فى نشرة. فى مصر اتعملله مسلسل رعب. ينتهى الاسبوع ب٧٣ شاب يموتوا بسبب ماتش كورة! والعدد هنا مخيف لان واضح اننا بقى عندنا مناعة من العدد فهما كمان ابتدوا يزودوا! حادثة مريبة فى وجهة نظرى المقصود تصفية للالتراس بالمرة! ولو افتراضنا عدم وجود مؤامرة فهو تخاذل يتدنى لمستوى المؤامرة والاتنين واحد لان النتيجة ٧٣ اسرة ودعت شبابها فى ليلة. 
ماهو اغرب ان تنقل طائرات حريبة اللاعبين بينما يتشحن المصابين والقتلى فى قطر ٣الفجر. ويتسائل المشير عن سكوت شرفاؤه عن التصدى 'للناس دى" .. وبيان الاخوان فاضلله تكه ويبقى شبه يبانات الجامعة العريبة ام نشجب ونستنكر وتضع الضحية والمعتدى فى نفس الكفه وهو ما لا يرضاه شرع او دين.
اخيرا حان وقت ان الورقة العرفى اللى بين الاخوان والسلطة انها تتقطع وترجع الاخوان لاهلهم اللى هما احنا- فى الشارع لان العلاقة شكلها بقا مفضوح!! وفى الاخر هما اهلنا برضه واحنا اولى بيهم! غدا تتكشف اخر فرصة. هل البرلمان ده برلمان بجد ام ان صلاحياته كصلاحيات الجنزورى؟ ام انه محدثة وفقط؟ 
نحتاج كلنا ان نسال الله ان يربط على قلوبنا وان يلهمنا ويفرغ صبره علينا. فالهم تقل قوى والشباب اللى بتروح بقت اكتر من اللى بتيجى! 
يا اخواننا ارجوكم مزقوا تلك الورقة العرفى بقا واشترو الناس. اللى بيشترى ناسنا مابيخسرش ابدا! 

المجد للشهداء..والصبر لاهلهم ولنا 

وخلص الكلام..سلام