دولة فخفخينية

المصرى ده يطلع مين؟؟؟

من زمان اوى اوى فلقوا دماغنا بموضوع المصرى ده.. محاولة منهم ان كلنا كده ناخد اصطمبة واحده..وعادة دى عادة الحكام اللى هما عايزين ياخد البيعة لوت واحد عشان العملية تبقى سهله وماتفلقهمش.

فكان يقوللك اصل المصرى فرعون، لا المصرى ده اصله مالوش فى الشغل، المصريين دول اجدع ناس.. يا عم مصر دى ام الدنيا، الطفل المصرى اذكى طفل فى العالم، المصرى عايش ازهى عصور الديموقراطيه (شوف الفجر مش عصر الديموقراطية لأ ازهى عصورها) المصرى هيفضل مصرى (مش مفهومة اصلا دى حاجة حلوةولا وحشة)، المصريين اهمة حرامية وقلالات زمة، المصرى ده اصله كده!  ده الستات الاجانب يموتو فيهم (لا تعليق)، خير اجناد الارض، اصل احنا عاطفيين، اصل المصرى متدين بطبعه، المصرى فرفوش وهلس بطبعة، المصرى كسول لوجوده بجانب وادى النيل، المصريين دول لازم يستعبدو، المصريين دول غير العرب خالص دول اللى علموا المنطقة كلها، لأ المصريين جهلة، مصر هى ام الوطن العربى، مصر قبطية، لأ اسلامية، لأ افريقية، لأفرعونية ، المصريين مش مستعدين للديموقراطية، لأ مستعدين للديموقراطية، مصر جوها حلو، لأوحش.

وعند سيل من الاغانى الوطنية اللى حاولت تعريف الهوية اللى بل ودعم احساس الوطنية اللى ماكانش محسوس اصلا بها من اوائل التمانينات..عندك مثلا رائعة اغنية انا من البلد دى (فا ايه يعنى؟؟) مصر هى امى، اغانى محمد ثروت كلها حيث انه معندوش غير اغانى وطنية واغانى اطفال اهمها جدو على عنده حمار طيب خالص مش مكار واظن انها كانت اسقاط سياسى على الشعب المصرى يعنى بس للاطفال.. وعندك محمد الحلو أوى.. طبعا اتطورت الاغانى الوطنية بما ان محدش كان بيسمعها الى اغانى نفاقية وفقيعة (اى بتفقع اللى بتلاقيه فى وشها) على سبيل المثال لا الحصر اخترناه وبايعناه واحنا معاه لمشاء الله .. الاظرف ان لطيفة كانت بتغنى مقطع مهم جدا وانا لحد دلوقتى مش فاهمة لطيفة كونها تونسية مالها نختاره ولا نطفحه ما تفنجر من جيبها. عندنا لامؤاخذه اديها كمان حرية... عندنا اغانى مرحلة مابعد  محاولة الاغتيال ودول من كتر ما هما تيت مش فاكراهم بس اظن كان فى واحده لعمرو دياب. شيرين ليها اغنية اسمها ريسنا.. هى تمشى على ريس عمال برضه او نظار عزبة والنوايا عند الله ممكن نبقى نستخدمها فى عيد العمال على فكرة.. وفى مجموعة حديثة وهى مقترنة بماتشات الكورة زى والله وعملوها الرجالة (على فكره كان قصده ماتش كورة يا قللات الادب)، واغانى حماقى اللى هى اصلا بترفع الضغط زى ماهو بيرفع الضغط والسكر والكوليسترول بصوته ده (ده صوت ؟) عندك بهاء ابو السلاطين الللى بيقوللك يا غاليا عندى زى امى وياما زعلت انا امى.. والحقيقة انه اختلط عليه امر الاغنيةالوطنية لخلاف شخصى مع الحاجة يعنى لا يمسنا مطلقا، وعندنا تمورة اللى له اغنية وطنيه رغم انه متهرب من العسكرية من اصله..

وطبعا بيكون فى مناسبات مهببة كده بيحشدولنا مظاهرة من المغنيين والممثلين يقولو اى فتى  زى مثلا جايز ظلام الليل واللى حصر الدور العربى فى حلم ده يعنى عشان لو كلب فكر فى انه يعمل حاجة يفتكر انه حلم... وعندك اغنية اللى ظهرت بعد حادثة الكنيسة فى اسكندرية واللى مالهاش لحن اصلا بس على العموم هما قايفوها وبتزل دلوقتى كاغنية للثورة..اذا كان اغنية شهداء 25 يناير ماتوا فى احداث يناير  بقت اغنية الثورة..زى بعضه

قصر الكلام... مصر دولة فخفخينية... اى والله..يعنى بالصلاة على النبى احنا (ال اوف ذا ابوف) كل دول مضروبين فى الخلاط....

انا معرفش الحقيقة التعريفات اللى الناس بترددها دى بناء على دراسة يعنى ولا مجرد تصور ولا الجزء اللى بيبقى فاكرينه من كتاب التاريخ ولا ايه بالظبط! ومعرفش برضه اذا كان اى حد من حقه يحصر هوية امة بحالها فى جمله..مظنش ان ده اصلا ينفع...

انا مقدرش اعرف المصرى ده يطلع ايه ولا احطله علامة كده تحددله هوية عامة.. انما كل اللى اعرفه ان المصرى هو:

الشخص العادى اللى بتشوفه كل يوم يطلع نكته على وضع مهبب

هو اللى بيتشعبط فى متوسط 3 مواصلات يوميا عشان يروح شغله ويقبض اقل من مصروف بنزين عربيتك

هو برضه اللى جزء مش بطال فى حياته مضطر يجازف بحياته فى طابور عيش

هو نفس الشخص اللى فى الاغلب عايش فى بيت من اسرة زحمة جدا اغلب الاوقات واحد منهم يا عنده فشل كلوى، يا سرطان والباقى يتعاملو عادى بالنسبة للضغط والسكر.

هو الشخص اللى بيتضحك عليه كل عيد عمال بالعلاوة

هو برضه اللى عنده استعداد يدفع دروس خصوصية ويتداين عشان التعليم زفت ويدافع عن المدرس الخصوصى لأن مافيش حل

هو الشخص اللى زيى وزيك اللى عنده دايما نوع من الاحساس بالذنب اما بيشوف طفل شارع

هو اللى زيى وزيك عايز يعيش كويس ويربى عياله ويتعلمو ويبقى حلم انه رئيس جمهورية حلم مشروع وطبيعى لا يعاقب عليه القانون

هو الشخص اللى يوم مانزل الشارع شاف ناس تانيه يمكن شكلها مختلف عنه بس معندهاش مشكلة من الاختلاف ده

هو الشخص اللى اتسحل واعتقل واتضرب واترش بالميا واتحدف عليه قنابل مسيلة للدموع وجمال وجلاليب واللى شاف واحد مات جنبه لمجرد انه قال "فى حاجة غلط يا جماعة الوضع مش صح"

هو الشخص نفسه اللى مش بس كده لأ اتشوهت سمعته واتبهدل واتقطع عنه التليفون واللى طلقوا على عيلته الحرامية من السجون واللى اتوقعوا ان الناس هتاكل فى بعض فاحمت بعض..

هو البنى ادم اللى زيي وزيك عايز حياة طبيعية ادمية محترمة

هو  الللى بعد كل العذاب ده مستعد يسامح ويكرم ويقول معلش لو حد عمله تعظيم سلام على التليفزيون.

المصرى بقى بالنسبة لى هو البنى ادم اللى بعد كل ده بدل مايفكر يمشى من البلد قرر يكمل فيها ويستنى هو اللى هدفه مش اكتر من بلد محترمة وعيشة كريمة وحرية وكرامة وعدالة

انا متوجعوش دماغى بالتعريفات البايخة والاحكام العرفية اللى فرضينها على مخكو واللى رافضين حتى تسمعو التانى بيقول ايه.. انا الناس اللى بعد كل الغلب ده اما تكلم معاه يحبك واما تناقشه يسمعلك وفى الاخر يقولك بلدنا يعنى هنروح فين مالناش غيرها..

هو ذات نفس الشخص ده هو المصرى شكله بقى موضوعة دقنه دينه لونه..متفرقش..